Qarabağ (Ağdam) – Turan Tovuz 0:1 (0:1)
99. Mateuş Koxalski – 5,0
20. Riçard Almeyda – 4,5
(6. Julio Romao, 46) – 4,5
55. Bədavi Hüseynov (k) – 5,0
30. Abbas Hüseynov – 4,5
(22. Musa Qurbanlı, 78) – qiymətsiz
24. Aleksey İsayev – 4,5
27. Toral Bayramov – 5,0
90. Nəriman Axundzadə - 5,5
81. Kevin Medina – 4,5
17. Hamidu Keyta – 4,5
(10. Abdulla Zubir, 65) – 4,5
19. Redon Cica – 4,5
(18. Olavio Juninyo, 65) – 4,5
15. Leandro Andrade – 4,5
(7. Yassin Benzya, 65) – 4,5
Ehtiyat oyunçular
97. Fabian Buntiç
12. Sadiq Məmmədzadə
13. Bəhlul Mustafazadə
44. Elvin Cəfərquliyev
66. Patrik Andrade
2. Mateus Silva
11. Emmanuel Addai
Baş məşqçi: Qurban Qurbanov
Komandanın ən yaxşısı: Nəriman Axundzadə

1. İvan Konovalov – 5,0
4. Şəhriyar Əliyev (k) – 5,0
10. Xəyal Nəcəfov – 4,5
(33. Eltun Turabov, 78) – qiymətsiz
8. Tural Bayramlı – 4,5
(13. Fərid Yusifli, 46) – 4,5
88. Faiq Hacıyev – 5,0
(7. İsmayıl Zülfüqarlı, 78) – qiymətsiz
5. Roderik Miller – 5,0
23. Alexandro Serrano – 5,0
15. Emmanuel Hakman – 4,5
25. Denis Marandiçi – 5,5
80. Otto Con – 6,0
21. Aleks Souza – 5,0
(11. Ayxan Quseynov, 66) – 5,0
Ehtiyat oyunçular
71. Mehman Hacıyev
41. Sergey Samok
39. Sadiq Quliyev
44. Rüfət Əhmədov
99. Sadiq Şəfiyev
70. Məzahir Məmmədzadə
20. İbrahim Ramazanov
22. Nahid Əliyev
Baş məşqçi: Kurban Berdıyev
Komandanın ən yaxşısı: Otto Con

Qol: O.Con, 18-p.
Con, 90+4-cü dəqiqədə penaltidən yararlana bilməyib (üst).
Vərəqələr: R.Miller, 5 (qeyri-idman hərəkəti). A.Serrano, 15 (qeyri-idman hərəkəti). Y.Benzya, 19 (hakimin qərarına etiraz). R.Almeyda, 20 (hakimin qərarına etiraz). K.Medina, 89 (qeyri-idman hərəkəti) – sarı.
Hakimlər: FƏRİD HACIYEV, Kamran Bayramov, Teymur Teymurov, Tural Qurbanov (hamısı Bakı).
VAR hakimi: Əliyar Ağayev (Bakı).
VAR hakiminin köməkçisi: Akif Əmirəli (Bakı).
Hakim-inspektor: Anar Salmanov (Bakı).
AFFA nümayəndəsi: Bəhram Qurbanov (Bakı).
24 avqust. Bakı. “Azərsun Arena”. 2000 tamaşaçı (4677 yerlik).
Birinci hissəyə 3, ikinci hissəyə 5 dəqiqə əlavə olunub.
Oyunun qiyməti: 6,0.

Yeni mövsüm start götürəndən bəri futbol ictimaiyyəti səbirsizliklə Berdıyevlə Qurbanov duelini gözləyirdi. Hər birinin özünə görə uğurları, şan-şöhrəti var. Və hər biri də fərqli oyun üslubundan yararlanır.

Əlbəttə, Zaqreb “Dinamo”suyla cavab oyunu Qurban Qurbanovun heyətlə bağlı planlarına təsir etmişdiş Əvvəlki iki turda rəqiblərini eksperimental heyətlə belə asanlıqla üstələyən “köhlən atlar”ın Berdıyevin sərt müdafiəsi qarşısında necə çətinlik çəkdiyini gördük. Deməli, bu mövsüm “Qarabağ”ın çempionluq yolunda əməlli-başlı əziyyət çəkəcəyini güman edə bilərik.

Yenə də “Qarabağ” ənənəyə uyğun qalaraq, meydanda dominant tərəf idi. Amma “köhlən atlar” nə qədər hücum qursalar da, tovuzluların müdafiəsi heş bir keçidə imkan vermirdi. Qonaqlar müdafiə olunmaqla yanaşı, əks-hücumlar zamanı da yetərincə təhlükəli olurdu. Belə durumlardan biri də 14-cü dəqiqəyə təsadüf etdi. Cica ofsayda düşəndən sonra sərbəst zərbə ilə dərhal əks-hücuma atılan “bozqurd” Marandiçinin cərimə meydançasına göndərdiyi ötürmənin ardından penalti zərbəsi qazandı. Belə ki, ötürmədən sonra Bədavidən geri dönən topun ardından İsayevin Aleksi yerə sərdiyini görən baş hakim VAR-a baxaraq, medyan sahiblərinin qapısına 11 metrlik cərimə zərbəsi təyin etdi. Topun arxasına keçən Otto bu fürsəti boşa vermədi – 0:1. Qoldan ruhlanan qonaqlar 21-ci dəqiqədə daha bir təhlükəli vəziyyət yaratdı. Cərimə zərbəsindən sonra Marandiçinin qapı önünə göndərdiyi topu Hakman saxlamadan birbaşa “çərçivə”yə tuşladı. Lakin ağdamlıların yeni qolkiperi Koxalski zərbəni dəf etdi. Epizodun davamında künc zərbəsi qazanan tovuzlular yenə meydan sahiblərini daha diqqətli olmağa çağırdılar. Yenə də Marandiçinin ötürməsindən sonra Aleksin başla qapıya göndərdiyi topun qarşısını Koxalski gözəl seyvlə kəsdi. Artıq dominantlığın “Qarabağ”ın əlindən çıxdığını deyə bilərik. 35-ci dəqiqədə Bayramovun qapı önünə ötürməsindən sonra Keytanın dabanla vuruşu yerdə qalan Nərimandan geri döndü. Ardınca Leandronun və daha sonra Abbasın zərbəsini bloklayan “Turan Tovuz” müdafiəsi topun tora qovuşmasına icazə vermədi.

Fasiləyə üstün durumda yollanan qonaqlar matçın qalan dəqiqələrində də fəallığını qorudu. 60-cı dəqiqədə pressinq hesabına Millerdən topu qazanan Nərimanın qapı önünə göndərdiyi ötürmə təhlükəli alınsa da, Cica buna yetişə bilmədi. İrəliləyən dəqiqələrdə ağdamlılar hər iki cinahda hücumlar qururdu. Amma illərin təcrübəsi Berdıyev elə bir “beton sədd” çəkmişdi ki… 82-ci dəqiqədə tovuzlular da real qol fürsətini boşa verdi. Ayxanın ideal ara ötürməsindən sonra Otto Koxalskiylə təkbətək mübarizədən məğlub ayrıldı. Bərabərlik qolu üçün can atan meydan sahibləri yenə də hücumlarda fəallıq göstərirdi. 87-ci dəqiqədə Nərimanın ötürməsindən sonra Juninyonun başla zərbəsi “çərçivə”dən aralı keçdi. 90-cı dəqiqədə Ayxanın ötürməsindən sonra Şəhriyarın başla vuruşu auta çıxdı. Epzidoun davamında isə “Turan Tovuz” futbolçuları əllə oyuna görə etirazlarını bildirdilər. VAR-a baxan Hacıyev bu dəfə də “nöqtə”ni göstərdi. İlk penaltini düzgün yerinə yetirən Ottonun zərbəsi qeyri-dəqiq oldu. Bir qədər sonra Ottonun Mediadaan sıyrılaraq “çərçivə”yə göndərdiyi zərbə də qapının üstündən keçdi. Son saniyələrə qədər bərabərlik qolunu vurmağa çalışan “köhlən atlar” yekunda məğlubiyyətlə barışmalı oldular.

Beləliklə, Ağdam təmsilçisi Zaqreb “Dinamo”suyla cavab oyunu ərəfəsində məğlub olaraq işini bir qədər də çətinə saldı. “Turan Tovuz” isə turnir cədvəlinin vahid lideridi. Bu qələbə həm də Kurban Berdıyevin 72 yaşının tamamına gözəl hədiyyə oldu.

Gözdən qaçmadı
* “İmarət Tayfa”, “Qarabağ Ordu” və “Ultras Turan” tribunadakı yerindəydi. Onlar sonacan komandalarına fəal dəstək verdi. Hətta “Qarabağ”ın fanklubları oyundan sonra da məğlubiyyətə baxmayaraq, komandanı dəstəklədilər.
* “Turan Tovuz”un ilk penaltisindən sonra Qurban Qurbanov yan xətt hakiminə etirazını bildirdi.

KAMAL SƏFƏR