Gec-tez futbol reallığının bu nöqtəsinə gəlib çatmalıydıq: Səudiyyə Ərəbistanı klubu Vinisiusa idman tarixinin rekord müqaviləsini təklif edir. Ciddədən olan “Əl-Əhli” “kisənin ağzını açıb” – futbolçulya 5 il üçün milyard avro verməyə hazırdı. Klubda artıq Avropa futbolunun sabiq ulduzları var: Eduar Mendi, Riyad Mahrez, Roberto Firmino, Frank Kessie, Merih Dəmiral, Roxer İbanyes, Qabri Veyqa. Yaxınlarda “Əl-Əhli”dən ayrılan Allen Sen-Maksimin “Fənərbaxça”ya qoşuldu.

Səudiyyə Ərəbistanı klubları bu yayı nisbətən “təvazökar” keçirir. Liqa Obameyanq, Naço, Bonaventura, Vitinya, Mussa Diabi və bir neçə başqa məşhur persiona ilə zənginləşsə də, ötənilki keçidlər fonunda bu siyahı solğun görünür. Vininin “Əl-Əhli” ilə müqavilədəki mümkün imzası futbol ictimaiyyətini elektrik cərəyanı kimi “vuracaq” və bu Şərq ölkəsini yenidən bütün diskussiyaların mərkəzinə çevirəcək.

Braziliyalı isə hələ imtina etməyib. Ən azı Avropa mediası belə yazır. Gözlənildiyi kimi, “Real” alıcı ilə təmasa keçməyib, sadəcə, susqun şəkildə vingerin müqaviləsində nəzərdə tutulan milyard avro məbləğində kompensasiyaya işarə edib. İki milyard avro xərcləmək isə hətta ərəb zənginlər üçün də problemlidi. Problemlidi, ancaq mümkünsüz deyil.

2023/24 Vinisiusun karyerasındakı ən yaxşı mövsümdü. İspaniya nəhənginin lideri 24 qol, 9 məhsuldar ötürmə ilə “Qızıl top” uğrunda mübarizədə əsas favoritlərdən sayılır. Və bu mükafatı alması tam realdı – şəxsi statistikası möhtəşəmdi, meydandakı hərəkətləri göz oxşayır, komanda titulları yerindədi, madridlilərin oyununa ciddi təsir edir. Belə görünür ki, dünyanın ən yaxşı futbolçusu statususuna yiyələnmək üçün tam bəs edən özəlliklərdi.
Təbii ki, belə futbolçunu hər kəs istəyər. Ancaq kim verməyə razılaşar? Braziliyalının hələ cəmi 24 yaşı var, parlaq dönəmi irəlidədi. O, pul naminə böyük karyeradan imtina edən adama oxşamır. Özü də “Real”da heç də pis qazanmır (ilə 20 milyon avro). Hətta belə şayiələr də gəzir ki, Florentino Peres oyunçunun şəraitini yaxşılaşdırmaq haqda düşünür. Düzdü, fikirləri qarışdıran 9 sıfırlı məbləğ çox şeyə qadirdi. Deyilənə görə, vingerə hələ ki konkret təklif çatdırılmayıb, bu üzdən ortada “yox” cavabı yoxdu. Braziliyalı detallardan xəbər tutmaq və əlinə dəqiq rəqəmlər olan kağız almaq istəyir.

İstisnasız futbol motivləri ilə yanaşı, Vinisiusa belə maraq göstərilməsinin siyasi konteksti də var. Hər şeydən belə görünür ki, Səudiyyə Ərəbistanı 2034-cü ildə futbol üzrə dünya çempionatını qəbul edəcək, sadəcə, başqa namizəd yoxdu. Məhz Vinini DÇ ərəfəsində yerli liqanın əsas təmsilçisinə çevirmək istəyirlər, bu niyyət futbolçunun özünə də çatdırılıb.

Çox güman, mövcud vəziyyətdə həlledici amil “Real”ın prezidenti Florentino Peresin braziliyalıya münasibəti olacaq. Boss həmişə onun istedadını yüksək dəyərləndirib, haqqında xoş sözlər deyib, çoxsaylı qalmaqallar zamanı həmişə müdafiə edib. Belə çıxır ki, Vinisius Ciddəyə köçmək fikrinə düşsə, klub rəhbərliyi ilə sərt şəkildə didişməli olacaq.

Bu yazını Peresin futbolçunun tərəqqisini nəzərə alanda aktuallığını itirməyən, 2021-ci ilə aid sitatı ilə bitirməyə dəyər. Sadəcə, təvəssür edin ki, müraciətin əvvəlində “Əl-Əhli”nin adı var: