“Siti” Superkuboku 7-ci dəfə qazandı - İCMAL
İngiltərədə futbol mövsümü ənənəvi olaraq, Superkubok uğrunda oyunla açılır.
Bu dəfə “Uembli”də son çempion “Mançester Siti” ilə kubokun finalında elə məhz “şəhərlilər”ə qalib gələn “Mançester Yunayted” qarşılaşdı.
Komandaların mövsümlərarası dövrdə keçirdiyi yoxlama oyunlarının nəticəsi maraq doğurur. “Siti” buna qədər “Milan” (2:2), “Seltik” (3:4) və “Barselona”ya (2:2, penalty seriyasında) uduzaraq yalnız “Çelsi”yə qalib gələ bilmişdi. Ancaq bir məqam da var ki, Qvardiola həmin oyunlarda eksperimental heyətdən yararlanmışdı. “Şəhərlilər”in bir çox oyunçusu, məsələn, Foden, Rodri, Stounz, Uoker uzun keçən mövsümün ardından hələ də dincəlir. “Yunayted” isə sonuncu yoxlama oyununda “Liverpul”a uduzsa (0:3) da, daha əvvəl “Betis”lə (3:2), “Reyncers”ə (2:0) qalib gəlmişdi. “Qırmızı şeytanlar” zədəlilərin – debütant Yoro, Heylunn, Van-Bissaka, Şou, Fiş, Lindelöf və Malasiyanın köməyindən məhrum idi.
MY bu oyunun gedişində iki qəfə qələbəyə yaxın oldu, ancaq son anda imkanı qaçırdı. İlk yarı tribunalara toplaşan 75 minə qədər azarkeşin ürəyincə olmadı. Komandalar çox ləng davranırdı, müntəzəm səhvə yol verirdilər. Düzdü, “Siti” bir qədər “canlı” görünürdü və hissənin sonuna qədər qol vəziyyətləri yaratmağı bacardı. 2-ci hissədə meydanda daha maraqlı mübarizə getdi. “Yunayted” daha maraqlı, kəskin hücumlar qurdu. Əvəzəetmələr də oyunun axarını canlandırdı. Qapılar önündə təhlükəli vəziyyətlərin sayı artdı. 82-ci dəqiqədə topu sağ cinahda ələ keçirən Qarnaço mərkəzə meyilləndi, oyundaşları müdafiəçilərin başını qatdı, argentinalı qapının küncünü “nişan aldı”. Bundan dərhal sonra Sançonu əvəz edən Reşford imkanları boşa verdi. Hər kəs MY-nin qələbə qazanacağını düşündüyü anda “Siti” bərabərlik qolunu vurdu. Bobb qapıçı meydançasının küncünə asma etdi, burda Pelyistri ilə mübarizədən qalib ayrılan Bernardo Silva hesabı bərabərləşdirdi. Qvardiola dərhal De Bruyne ilə Akeni meydana buraxdı. Ya penalti seriyası, ya da oyunun taleyini elə əsas vaxtda həll etmək üçün. “Lotereya”da da əvvəlcə “Siti”nin oyunçusu, daha dəqiqi, Bernardo Silva büdrədi. Ancaq Sanço ilə Evansın qeyri-dəqiqliyi “Siti”ni tarixində 7-ci dəfə Superkubokun qalibi etdi. Bu turnirdə qələbə sayına görə rekordçu “Yunayted”di (18). Mükafatı ötən il “Arsenal”ın qazandığını da xatırladaq.
Mançester Yunayted – Mançester Siti 1:1, p. – 6:7
MY: Onana, Martines, Evans, Maquayr (Pelyistri, 59), Dalot, Maynu (Kollyer, 59), Kazemiro, Dyallo (Qarnaço, 59), Maunt (Maktominey, 59), Fernandeş, Reşford (Sanço, 83).
MS: Ederson, Lüis, Akanci, Diaş, Qvardiol (Ake, 90+1), O”Rayli (Nunyeş, 63), Kovaçiç, Bobb (De Bruyne, 90+1), Makeyti (B.Silva, 80), Dokyu (Savinyo, 63), Holann.
Qollar: Qarnaço, 82 (1:0). B.Silva, 89 (1:1).
Penalti seriyası: Fernandeş – 1:0. B.Silva – 1:0 (qapıçı). Dalot – 2:0. De Bruyne – 2:1. Qarnaço – 3:1. Holann – 3:2. Sanço – 3:2 (qapıçı). Savinyo – 3:3. Kazemiro – 4:3. Ederson – 4:4. Maktominey – 5:4. Nunyeş – 5:5. Martines – 6:5. Diaş – 6:6. Evans – 6:6 (üst). Akanci – 6:7.
Vərəqələr: Nunyeş, 68. B.Silva, 87 – sarı.
Hakim: Carred Cillett (Qold-Kost).
10 avqust. London. “Uembli” stadionu. 78146 tamaşaçı.
Reaksiyalar
Xosep Qvardiola:
“Mövsümə hazır olub-olmadığımızı deyə bilmərəm. Bu gün uduza bilərdik, sona bir neçə dəqiqə qalmış məğlubiyyətə yaxın idik. Ən yaxşı formamızdan uzağıq ki, bu da normal haldı. Ancaq mövsümə kubok qazanmaqla başlamaq əladı. Həqiqət ondan ibarətdi ki, bu qələbə heç nəyi dəyişmədi”.
Erik ten Haq:
“Belə nəticə ilə barışmaq çətindi. Komanda yaxşı oyun göstərirsə, oyunun əsas vaxtında və penalti seriyasında irəli çıxırsa və sonradan uduzursa, adama heç xoş gəlmir. Belə məğlubiyyət adamı yaralasa da, qəbul etməliyik. Bəzən ağrını da sınamaq lazımdı, o adama daha yaxşı çalışmaq üçün motivasiya verir. Bu oyunun əsasında gəldiyimiz qənaət odu ki, “Siti” ilə bərabər səviyyədə rəqabət apara bilərik, bunu liqaya da daşımalıyıq”.
Digər xəbərlər
