Bəli, “Qarabağ” “Linkoln”u mübarizədən kənarlaşdıraraq Çempionlar Liqasının 3-cü təsnifat mərhələsinə vəsiqə qazandı. Bəs ağdamlıları növbəti mərhələdə kim gözləyir? Cavab bəllidi: Bolqarıstan “Ludoqorets”i.

Razqrad təmsilçisi 2-ci təsnifat mərhələsində “Dinamo-Minsk”i evdə 2:0 məğlub etsə də, neytral meydanda uduzdu – 0:1. “Ludoqorets”i yaxından tanımağa dəyər.

Razqrad təmsilçisi 1945-ci ilin noyabrından fəaliyyətdədi. Özü də necə? Klub kənd futbol komandalarının birləşməsiylə qurulub. Ən aşağı liqada – 3-cü divizonda mübarizə aparmağa başlayan kollektiv 1961-ci ildə 2-ci, 2011-ci ildə isə əsas liqaya, yəni elitaya yüksəlib. Göründüyü kimi, klubun uğurlar səlnaməsi o qədər də zəngin deyil. “Ludoqorets” 1997-ci ildə şəhərin digər təmsilçisi “Antibiotik”lə birləşib. 2010-cu ildə varlı sahibkar, əczaçı Kiril Domusçuyev klubu himayəsinə alıb və böyük vəsait xərcləməyə başlayıb. Beləliklə, elitaya yüksəlmək mümkün olub. “Ludoqorets” sözünün mənası da maraqlıdı: ludo – dəli, qora – meşə...

Komanda aqressiv və sürətli oyunla rəqiblərinə başağrısı olmağa çalışır. Yəni özlərini “dəli meşənin qartalları” hesab edirlər. Razqrad təmsilçisi elitada olduğu ilk mövsümdə nəinki çempion olub, ölkə kubokuna da yiyələnib. Uğurlar isə hələ irəlidəydi. “Ludoqorets” 2011/12 mövsümündən bəri daimi çempiondu. 2011/12, 2013/14, 2022/23 “futbol illəri”ndə Bolqarıstan kubokuna yiyələnən komanda 2012, 2014, 2018, 2019, 2021, 2022 və 2023-cü illərdə superkuboku muzeyinə aparıb. “Ludoqorets” hər üç Avropa turnirinin qrupuna düşən yeganə Bolqarıstan komandasıdı. 2 dəfə Çempionlar Liqasının (2014/15, 2016/17), 7 dəfə Avropa Liqasının (2013/14, 2017/18, 2018/19, 2019/20, 2020/21, 2021/22, 2022/23), 1 dəfə isə Konfrans Liqasının (2023/24) qrupuna vəsiqə qazanıb.

“Ludoqorets” ev oyunlarını Razqraddakı 10423 yerlik “Huvepharma Arena”da keçirir. Komandanın baş məşqçisi Georgi Dermenciyevdi. 69 yaşlı mütəxəssis Plovdivdə dünyaya göz açıb. Maraqlıdı ki, o, 2011-14-cü illərdə bu komandada köməkçi-məşqçi, 2014-17-ci illərdə isə baş məşqçi kimi çalışıb. Sonradan “Ordabası”nı və “Levski”ni çalışdıran mütəxəssis 2019-20-ci illərdə Bolqarıstan yığmasının da “sükanı arxasında” olub. Burdan ayrılandan sonra “Ludoqorets”ə qayıdan Georgi o vaxtdan bu vəzifəni icra edir.

“Transfermarkt”a görə, klubun dəyəri 53 milyon avrodu. Heyətdə 30 futbolçu var, 11-i milli üzvüdü. Ümumiyyətlə, komandanın əsas dayaqları Bernard Tekpetey, Yakub Piotrovski, Edvin Kurtuluş, Anton Nedyalkov və İvaylo Çoçev kimi futbolçulardı. Onların ciddi avrokubok təcrübəsinə sahib olduğunu vurğulamalıyıq.

Avqustun 6-sı, saat 20.00-da Tofiq Bəhramov adına Respublika stadionunda başlayacaq oyunu FİFA referisi Urs Şnayder idarə edəcək. Biletlər satışa çıxarılıb. Qiymət uyğun olaraq, 5, 10, 20, 30, 75 və 100 manat təşkil edir. VVIP C və VVIP D sektorlarda əyləşib VIP Lounge üstünlüklərindən yararlanmaq istəyən azarkeşlər üçün biletin qiyməti isə 200 manatdı. Satış məntəqələri: iTicket.az-ın satış məntəqələri (iTicket.az-da onlayn satış), “Qarabağ”ın “Park Bulvar”dakı fanşopu, “Bəhramov”un kassaları.

KƏNAN BAHADIR