“Zenit” 4 qollu qələbələri, “Krasnodar” heç-heçələri sıralayır - İCMAL
Tur “Rostov”un səfərdə “Krılya Sovetov” üzərində inamlı qələbəsi ilə start götürdü.
"Football-plus.az" xəbər verir ki, samaralıların premyer-liqada qələbəsiz seriyası 7 oyuna çatdı.
Njni Novqorodda fanatlarını baxımlı oyun və inamlı zəfərlə sevindirən ÇSKA Marko Nikoliçin başçılığı altında ilk qələbəsini qazandı. “Zenit” isə deyəsən, bu mövsüm bütün oyunlarda 4 qol vurmağa söz verib. Superkubokda “Krasnodar”ı 4:2 və ilk turda səfərə “Krılya Sovetov”u 4:0 məğlub etən Sankt-Peterburq nəhəngi bu seriyanı Kazanda da davam etdirdi. Rusiya çempionatı tarixində bir komandanın iki turdan sonra 8 qol vurmasına daha öncə yalnız bir dəfə rast gəlinmişdi. Maraqlıdı ki, həmin komanda elə “Zenit” özüdü. Piterlilərin 2014/15-də 2-ci turdan sonra top fərqi 8:1 idi. Yeni transfer Qluşenkov yenə meydanı qolsuz tərk etmədi. O, Sərdar Azmun (2019) və Fatih Təkkədən (2006) sonra XXI əsrdə “Zenit”in heyətində ilk iki çempionat oyununda qol vuran 3-cü futbolçuya çevrildi. Turun mərkəzi oyununda “Dinamo” fanatları önündə “Lokomotiv”in müqaviməyini qırmağı bacardı. Ötən mövsümü də nəzərə alsaq, “Dinamo”nun evdə qələbə seriyası 5 oyuna çatdı. Bundan başqa, komanda 1993-dən bəri ilk dəfə evdə ardıcıl 4-cü çempionat oyununda ən azı 3 qol vurdu. Tarixində ilk dəfə elitada çıxış edən “Akron” ilk qələbəsini Voronejdə qazandı.
İlk turda gözlənilmədən Orenburqda çox zəif təsir bağışlayaraq məğlub olan “Spartak” Deyan Stankoviçin dönəmində ilk qələbəsini “Ximki” ilə oyunda qazandı. Yeni transfer Barko cərimə zərbəsindən vurduğu mükəmməl qolla qələbənin əsasını qoydu. Halbuki “Spartak”ın heyətində 2021-dən bu yana heç kim cərimə zərbəsindən qol vura bilməmişdi. Maraq üçün bildirək ki, premyer-liqada debüt matçında cərimə zərbəsindən fərqlənən son futbolçu 2022-də ÇSKA-nın heyətində Yusuf Yazıcı olmuşdu. Hələ ötən mövsümün qış fasiləsində transfer olunan Uqalde “Spartak”ın heyətində 14-cü premyer-liqa oyununda nəhayət, qol hesabını açdı. Murad Musayevin “Krasnodar”ı isə mövsümün əvvəlində heç-heçələri sıralayır. İlk turda “Axmat”la səfər oyununda 1 xalla kifayətlənən ötən mövsümün gümüş mükafatçısı bu dəfə evdə debütant Mahaçqala “Dinamo”sunun müqavimətini qıra bilmədi. Rusiya çempionatı tarixinin ən yaxşı 6-cı bombardiri olan Smolov ardıcıl 19-cu premyer-liqa oyununda meydanı qolsuz tərk etdi. Halbuki bu müddət ərzində o, qapılara 25 zərbə vurub.
2-ci tur
Rubin – Zenit 0:4
Qluşenkov, 36. Kassyerra, 44-p. Pedro, 55. İzidor, 90+2.
Zenit: Latışonok, Karavayev (Volkov, 88), Yerakoviç, Nino, Santos, Barrios, Vendel, Klaudinyo (Artur, 64), Qluşenkov (Qorşkov, 75), Pedro (Mostovoy, 63), Kassyerra (İzidor, 75).
Dinamo M – Lokomotiv 3:1
Qaqnidze, 12. Maystoroviç, 59. Nqamaleu, 85 – Vorobyov, 39.
Lokomotiv: Lantratov, Nenaxov (Süleymanov, 62), Nyamsi, Fasson, Silyanov, Barinov, Batrakov, Samoşnikov, Pinyaev (Saltıkov, 77), Sarveli (Tiknizyan, 62), Vorobyov.
Nijni Novqorod – ÇSKA 0:3
Musayev, 15. Diveyev, 50. Oblyakov, 78.
ÇSKA: Akinfeyev, Kellven (Davila, 65), Diveyev, Roşa, Moyzes, Kruqovoy, Oblyakov, Bistroviç (Kislyak, 89), Koyta (Zdelar, 46), Jemaletdinov (Qayiç, 65), Musayev (Çalov, 80).
Ximki – Spartak 1:3
Maqomedov, 90 – Barko, 49. Uqalde, 55. Babiç, 72.
Spartak: Maksimenko, Xluseviç (Denisov, 67), Çernov, Babiç, Ryabçuk, Zobnin, Umyarov, İqnatov (Zinkovski, 46), Barko (Prutsev, 77), Bonqonda (Medina, 67), Uqalde (Joze, 77).
Krasnodar – Dinamo Mah. 0:0
Krasnodar: Aqkatsev, Kosta, Tormena, Kayo (Olusequn, 67), Olasa (Petrov, 57), Çernikov (Pina, 67), Krivtsov (Kozlov, 57), Kobnan (Batçi, 32), Spertsyan, Sa, Smolov.
Krılya Sovetov – Rostov 1:3
Orosko, 65 – Soldatenkov, 44. Qolenkov, 62. Lanqoviç, 73.
Fakel – Akron 0:2
Timoşenko, 64. Bakayev, 76.
Orenburq – Axmat 0:0
1. Zenit 2 2 0 0 8-0 6
2. Dinamo M 2 2 0 0 6-2 6
3. ÇSKA 2 1 1 0 3-0 4
4. Rostov 2 1 1 0 3-1 4
5. Orenburq 2 1 1 0 2-0 4
6. Lokomotiv 2 1 0 1 4-5 3
7. Akron 2 1 0 1 4-3 3
8. Spartak 2 1 0 1 3-3 3
9. Rubin 2 1 0 1 4-6 3
10. Krasnodar 2 0 2 0 1-1 2
11. Dinamo Mah. 2 0 2 0 1-1 2
12. Axmat 2 0 2 0 1-1 2
13. Ximki 2 0 1 1 2-4 1
14. Fakel 2 0 0 2 1-5 0
15. Nijni Novqorod 2 0 0 2 2-7 0
16. Krılya Sovetov 2 0 0 2 1-7 0
Bombardir: Qluşenkov (Zenit) – 3.
Növbəti turun oyunları avqustun 3-5-i aralığında keçiriləcək: Akron – Dinamo Mos., Zenit – Rostov, Rubin – Ximki, ÇSKA – Orenburq, Fakel – Krasnodar, Dinamo Mah. – Nijni Novqorod, Axmat – Lokomotiv, Spartak – Krılya Sovetov.
Oyundan sonra
Sergey Semak, “Zenit”in baş məşqçisi:
“Matçın əvvəllərində komandalardan heç biri baxımlı oynamırdı. Ancaq mübarizə izləyirdik. Bunun da nəticəsi kimi qol vəziyyətləri yaranmırdı. Amma sonra tempi artırmağa başladıq. Cəld oynamağa başlayan kimi qol epizodlarımız da yarandı. Matçın qırılma anı 3-cü vurduğumuz qol oldu. Həmin qoldan sonra faktiki intriqa öldü və işimiz asanlaşdı. Rəqib müdafiəsindəki boşluqlardan əla yararlandıq. Nəzərə alsaq ki, Kazanda hər zaman oynamaq çətindi, bu qələbəmizdən çox razıyam. Çox qol vuraraq qalib gəlmək həmişə ikiqat sevindiricidi. Amma əlbəttə, hələ bütün mübarizə irəlidədi”.
Marçel Liçka, “Dinamo”nun baş məşqçisi:
“Heyətimizin, demək olar, çox hissəsi gənclərdən ibarət idi. Lepski, Bessmertnı kimi gənclər üçün səviyyəli hücumçulara qarşı oynamaq asan olmadı. Düzdü, bəzən səhvlərə yol versələr də, üzərlərinə düşəni etməyi bacardılar. “Lokomotiv” ikinci hissənin əvvəllərində iki yüzfaizlik fürsəti boşa verdi. Həmin epizodlar qolla nəticələnsəydi, nəinki qələbəyə, hətta xala da həsrət qala bilərdik. Onlardan fərqli biz əlimizə düşən şansları dəyərləndirdik. Oyun səviyyəmizdən razı qaldığımı deyə bilmərəm. Amma bu gün üçün əlimizdən gələni etdik. Hər halda, çətin rəqibə qarşı derbi matçı keçirdiyimizi nəzərə alsaq, nəticə məni qane edir. Ancaq görüləsi işlərimiz hələ çoxdu. Sabahdan etibarən qələbəni unudub növbəti oyuna hazırlaşmalıyıq”.
Digər xəbərlər
