Fridelin Türkiyə macərası erkən başa çata bilər
“Beşiktaş” Sloveniya toplanışından sonra baş məşqçi Covanni van Bronkhorstun başçılığı altında hazırlığı öz bazasında davam etdirir.

“Football-plus.az” xəbər verir ki, son yoxlama oyununda “Bandırmaspor”la qolsuz bərabərə qalan “Qartal” bu gün 1-ci liqanın daha bir təmsilçisi “Gənclərbirliyi” ilə qarşılaşacaq. Avqustun 3-də Türkiyə superkuboku uğrunda görüşdə isə “Beşiktaş” “Qalatasaray”la üz-üzə gələcək.

“Ağ-qaralar”ın “Fatih Karagümrük”dən Can Keleşi heyətə qatdığını bildirək. 22 yaşlı sağ vinger ilə dördillik müqavilə imzalanıb. Bu transfer komandaya 2,5 milyon avroya başa gəlib. Vyana “Austriya”sının yetirməsi olan və Türkiyəyə ötən yay gələn Keleş 2023/24-ü 39 oyun, 5 qol, 4 məhsuldar ötürmə göstəriciləri ilə tamamlayıb. Bu arada Van Bronkhorstun planlarına daxil olmayan futbolçuların böyük əksəriyyəti rəhbərliyə problem yaratmaqda davam edir. “Beşiktaş” hazırda heyətində ən çox legioner yer alan Türkiyə klubudu.

Van Bronkhorst 9 futbolçunun - Montero, Rebiç, Oksleyd-Çemberleyn, Tayfur Bingöl, Onur Bulut, Hasiç, Abubakar, Amarti və Onananın komandadan ayrılmasını istəyir. Bu futbolçulara Masuaku, Zaynutdinov, Muleka və Kolli də qoşula bilər. Hər halda, son 4 oyunçuya sərfəli təklif gələcəyi təqdirdə rəhbərlik geri çevirməyəcək. Hazırda rəhbərlik “Çaykur Rizəspor”da top qovan Əmirhan Topçunun transferi üzərində çalışır. 23 yaşlı mərkəz müdafiəçisi ilə razılıq əldə olunsa da, klublar arasında anlaşma yoxdu. Rizə təmsilçisi Əmirhana görə 4-5 milyon avro tələb edir. Topçunun keçidi baş tutsa, Kolli ayrılacaq.

Yuxarıda qeyd etdiyimiz və Van Bronkhorsta lazım olmayan futbolçular isə rəhbərliyi çətin vəziyyətdə qoyub. Məsələn, Abubakara Səudiyyə Ərəbistanından illik 3 milyon avroluq maaş təklif olunsa da, o, təklifi geri çevirib. Eləcə də Amarti son anda qərarını dəyişərək Səudiyyə Ərəbistanına yollanmaqdan imtina edib. Rebiç, ümumiyyətlə, artıq əsas komanda ilə məşqlərə çıxmır. O, heyətdən kənarlaşdırılıb və fərdi məşq edir. Amma bu futbolçular ayrılmaq üçün “Beşiktaş”dan illik maaşının hamısını tələb edir. Onlar bilirlər ki, komandada legionerlərin sayı çoxdu və rəhbərlik çıxılmaz vəziyyətdədi. Şayiələrə inansaq, yalnız Tayfur Bingöl sakitcə, heç bir problem yaratmadan ayrılmağa hazırdı. Komandanın baş məsləhətçisi Bred Fridelin oyunçularla apardığı danışıqlar da hələ ki bəhrə vermir. Hətta bu üzdən rəhbərliklə Fridel arasında artıq soyuqluq yaranıb. Amerikalı futbol adamı məhz belə məsələləri yoluna qoymaq üçün kluba dəvət olunub. Amma o hələ ki oyunçuların heç birini ayrılmağa razı sala bilməyib. Bu üzdən hətta Fridelin istefa verə biləcəyi ilə bağlı şayiələr də yayılıb.

53 yaşlı Fridel iyunun 7-dən etibarən komandadadı. Bu gedişlə onun Türkiyə macərası 2 aydan da az çəkə bilər.