İyulun 16-da Avstriyada daha iki yoxlama oyunu keçirən “Qarabağ” 18-də təlim-məşq toplanışını başa vuraraq vətənə qayıtdı.

Ölkə çempionu günün ilk matçında Xorvatiyanın “Slaven” komandasını məğlub etdi – 1:0. Maraq üçün qeyd edək ki, sınaqçı-rəqib elita klubudu və son mövsümü 9-cu yerdə bitirib.

“Qarabağ”ın start heyəti: 12. Sadiq Məmmədzadə, 55. Bədavi Hüseynov, 2. Mateus Silva, 44. Elvin Cəfərquliyev, 30. Abbas Hüseynov, 24. Aleksey İsayev, 66. Patrik Andrade, 90. Nəriman Axundzadə, 17. Hamidu Keyta, 19. Redon Cica, 9. Musa Qurbanlı.

Ehtiyat oyunçular skamyasında isə iki futbolçu əyləşib: 25. İbrahim Ramazanov, 20. Riçard Almeyda.

Qarşılıqlı hücumlar şəraitində keçən oyunda yeganə qol 72-ci dəqiqədə vurulub. Musa Abbasın qapı önünə ötürməsinə çataraq topu “çərçivə”yə göndərib. Beləliklə, o, 66-cı dəqiqədə yüzfaizlik qol imkanını qaçırmasının əvəzini çıxıb.
“Qarabağ” Tirol bölgəsindəki hazırlığı Birləşmiş Ərəb Əmirliklərinin “Şabab Əl-Əhli” klubuna qarşı matçla yekunlaşdırıb. Oyunda 7 qol qeydə alınıb ki, “köhlən atlar” 5:2 hesabıyla qalib gəlib. Bu rəqib də elita təmsilçisidi, ötən mövsümü 2-ci yerdə başa vurub.

Qurban Qurbanov toplanışın sonuncu oyununun start heyətinə bu futbolçuları daxil edib:

97. Fabian Buntiç, 13. Bəhlul Mustafazadə, 81. Kevin Medina, 29. Marko Veşoviç, 27. Toral Bayramov, 6. Julio Romao, 8. Marko Yankoviç, 7. Yassin Benzya, 15. Leandro Andrade, 10. Abdulla Zubir, 18. Olavio Juninyo.

Ehtiyat oyunçular skamyasında əyləşənlər:

Sadiq Məmmədzadə, Bədavi Hüseynov, İbrahim Ramazanov, Mateus Silva, Elvin Cəfərquliyev, Abbas Hüseynov, Aleksey İsayev, Patrik Andrade, Riçard Almeyda, Nəriman Axundzadə, Hamidu Keyta, Redon Cica, Musa Qurbanlı.

Hesabı 31-ci dəqiqədə cərimə zərbəsindən Benzya açıb. Ərəblər də cavab qolunu standart vəziyyətdən vurub. Daha dəqiqi, 39-cu dəqiqədə Romaonun rəqibə kobud müdaxiləsi penaltiyə səbəb olub. “Qarabağ”ın ikinci qolunu Toralın ötürməsini layiqincə dəyərləndirən Leandro Andrade vurub. 51-ci dəqiqədə Zubir fərqi artırıb. Növbəti qol 53-cü dəqiqədə qeydə alınıb. Fransalı cərimə meydançasındakı qarışıqlıqdan yararlanıb. 55-ci dəqiqədə Romaonun Benzya ilə yaxşı anlaşması yenə Zubirin işinə yarayıb. Belədə o, başla zərbə ilə hesabı 5:1 edib. 90+2-ci dəqiqədə ərəblər daha bir penalti sayəsində hesab arasındakı fərqi azaldıb – 5:2.

KƏNAN BAHADIR