“Qarabağ” iki yoxlama görüşünə çıxdı. Günorta “Kayzerslautern”ə uduzan (1:3) ağdamlılar axşam “Viktoriya”ya qalib gəldi – 2:1.

Bəs oyunlar “köhlən atlar”ın indiki durumu haqda hansı təəssüratı verdi? Detallara keçid alaq.

İlk oyunun hər iki hissəsi rəqibin üstünlüyü şəraitində keçdi. Burda “Qarabağ”ın bütün qolları standart vəziyyətdən buraxması diqqəti çəkdi. Birincidə künc zərbəsindən fərqlənən “Kayzerslautern” ikincidə cərimə zərbəsindən, sonuncuda isə penalti nöqtəsindən fərqi artırdı. Dəfələrlə belə epizodlar əldə edən “köhlən atlar” isə heç nə edə bilmədi. Maraqlıdı ki, Amin Ramazanov oyun ərzində cəmi bir ciddi seyvlə yadda qaldı. Qapıçının nəinki gözlənilməz, qapıya zərbənin olacağı bariz görünən anlarda belə diqqətsizliyi gözdən qaçmadı. Rəqibin üçüncü - penaltidən vurduğu qola, ümumiyyətlə, reaksiya vermədi. Daha dəqiqi, topa müdaxilə etməkdən çəkindi.

Çatışmazlıqlar sırasına Aleksey İsayevin 44-cü dəqiqədə penaltini boşa verməsini də əlavə edə bilərik. Nəriman Axundzadə, Hamidu Keyta, Musa Qurbanlı və Patrik Andradenin isə hələ formada olmadıqları göründü. Düzdü, 70-ci dəqiqədə Redon Cicanın ötürməsini qolla tamamlayan Elvin Cəfərquliyev sürətini itirməyib. Lakin bu, azarkeşlərin matçdan sonra “Qarabağ”ın sosial şəbəkə hesablarına hücum çəkərək tənqidləri sıralaması mane olmadı. Əlbəttə, tərəfdarlar baş məşqçi Qurban Qurbanova və ya meydanda olmayan futbolçulara yox, məhz ilk oyunun start heyətinə qəzəbli idi.

Yaxşı ki, axşam keçirilən matç onları sakitləşdirdi. “Qarabağ” əsas futbolçuları sayəsində “Viktoriya”nı məğlub etdi və baxımlı oyunla zövqləri oxşadı. Fabian Buntiçin debütünə də şahidlik etdik. Onu ilk qolu erkən buraxdığına görə qınamayaq. 49-cu dəqiqədə həddən artıq irəli çıxmaqla rəqibə şərait yaratsa da... Görünür, almaniyalı “Qarabağ”ın əsas qapıçısı olacaq. Belədə yeni qolkiperə vaxt lazım olduğunu nəzərə alıb mərhəmət göstərməliyik. Avropa meydanlarından yaxşı tandığımız başqa “Qarabağ”lılar isə, demək olar, dəyişməyib...

...Beləcə axşam saatlarında həmin azarkeşlərin bu dəfə xoş sözlərlə “köhlən atlar”ı təqdir etdiyini və ağdamlıların ikinci heyətinin xeyli zəif olduğunu gördük.

KƏNAN BAHADIR