Turun açılış matçı “Qarabağ” üçün nəticə baxımından prinsipial xarakter daşımırdı.

Lakin qonaqlar 6-cı pillədəki yerini möhkəmləndirmək məqsədilə xal əldə etməyə gəlmişdi. "Turan Tovuz" həm də tarixində ilk dəfə "Qarabağ" səfərində qələbə qazanmaq istəyirdi. "Bozqurd" matçın ilk dəqiqələrində xüsusi fəallıqla seçildi. Amin hələ əlcəklərini yeni taxmışdı ki, Serranonun yumşaq zərbəsini dəf etməli oldu. "Turan Tovuz"un növbəti hücumu özünü çox gözlətmədi. Bu dəfə də əsas yük Serranonun çiyinləri üzərinə düşdü. İkinci dəfə bəxtini sınayan ispanıyalı Marandiçinin ötürməsini başla "çərçivə"yə yönəltdi. Lakin Amin  yenə qonaqların sevinməsinə imkan vermədi. 6-cı dəqiqədə Benzya Zubirin ötürməsi sayəsində hesabı erkən aça bilərdi. Onun qapı istiqamətində zərbəsi həm yavaş, həm də qeyri-dəqiq oldu. "Qarabağ" rəqibinə göz açmağa imkan vermədən təhlükə yarada bildi. Benzyanın cərimə meydançasına ötürməsinə Nəriman özünü çatdırdı. Topa başla zərbə endirən gənc hücumçu "çərçivə"ni düz nişan almadığından komandasını üzdü. "Köhlən atlar"ın qaçırdığı fürsətlər 15-ci dəqiqədə az qala onlara baha başa gələcəkdi. Çünki Serranonun uzaqdan ötürməsindən sonra hücumun sivri ucunda gözləyən Souza sürətlə irəli atıldı. Qarşıda Amindən başqa maneə görməyən braziliyalı özünü sonuncu toxunuş üçün hazırlayırdı ki, Medina onu cərimə meydançası daxilində kobud müdaxiləylə yerə yıxdı. Burda "bozqurd" aşkar qol imkanından məhrum edilsə də, hakim qayda pozuntusunu topa müdaxilə kimi dəyərləndirdi. "Qarabağ"ın 19-cu dəqiqədə qazandığı şansı dəyərləndirməsi isə hesabın açılmasıyla nəticələndi. Rəqibi əks-hücumda yaxalayan "köhlən atlar" dərhal irəli atıldı. Cərimə meydançası daxilində yaranan qarışıqlıqdan məharətlə istifadə edən Zubir topu Juninyoya ötürdü ki, o da "çərçivə"ni dəqiq nişan aldı. Burda topun Romaonun əlinə toxunması ehtimalı var idi ki, qol VAR-da təsdiqlənəndən sonra məsələyə aydınlıq gəldi. Qısası, "Turan Tovuz" futbolçularının etirazı haqsız idi... Ardından Souza və Manardiçi bəxtini sınasa da, hesab bərabərləşmədi. Birinci həlledici anda ayağı sürüşüb yerdə qaldığından, ikinci qeyri-dəqiqlik üzündən fürsəti əldən verdi. Birinci hissənin qalan dəqiqələri "Qarabağ"ın üstünlüyü şəraitində keçdi. Meydan sahibləri rəqibi ciddi təzyiq altında saxlayır, amma fərqi artırmaqda israrlı görünmürdü. Hadisələrin daha çox meydanın mərkəzində cərəyan etməsi canımızı sıxmağa başlayırdı ki, Bruno topu tora qovuşdurdu. O, Xəyalın cərimə zərbəsindən ötürməsini "çərçivə"dən keçirsə də, qol qeydə alınmadı. Bunun səbəbi məhz "10 nömrəli"nin oyundankənar vəziyyətdə olmasıydı. Xəyal ilk yarıda istəyinə çatmasa da, 48-ci dəqiqədə məhsuldar ötürməylə yadda qaldı. Onun əziyyətini Hakman boşa verdi - 1:1. Hesabın bərabərləşməsi hər iki komandanın daha istəkli çıxış etməsiylə müşayiət olundu. Bu ərəfədə "Turan Tovuz" önə keçməyi bacardı. Paçu 53-cü dəqiqədə Pusinin qapıya zərbəsindən sonra geri qayıdan topu "çərçivə"yə göndərdi. Gərgin mübarizə şəraitində keçən matçda növbəti qol "Qarabağ"dan gəldi. Andrade 69-cu dəqiqədə cərimə meydançasındakı qarışıqlığa baxmayaraq, Juninyonun ötürdüyü topu tora qovuşdura bildi. Hesabın yenidən bərabərləşməsi tərəflərin, xüsusilə meydan sahiblərinin fəallığını artırdı. "Köhlən atlar" bu dəfə Zubirin ötürməsi, Silvanın qolu sayəsində önə keçdi. Futbolçuların yorğunluğunu nəzərə alsaq, bununla matçın taleyinin həll edildiyini düşünmək olardı. Lakin "Turan Tovuz" 85-ci dəqiqədə bird aha hesabı bərabərləşdirə bildi. Ayxanın künc zərbəsindən cərimə meydançasına göndərdiyi topu Pusi "çərçivə"dən keçirmək istədi. Amin əllə "kürə"ni geri qaytardı ki, Hakman irəli atılıb hesabı bərabərləşdirdi. Matçda son nöqtə 90-cı dəqiqədə qoyuldu. Ara ötürmələriylə rəqibin başını gicəlləndirərək qapısı önündə sıxışdıran ağdamlılar Cicanın topu cərimə meydançası daxilinə göndərməsi, Zubirin saxlayaraq Andradeyə ötürməsi, sonuncunun "çərçivə"ni dəqiq nişan alması sayəsində qələbəni təmin etdi.  Beləliklə, "Qarabağ" mövsümdə 26-cı qələbə ilə qol sayını 95-ə çatdırdı, "Turan Tovuz" isə bu gedişlə 6-cı pilləni əldən verə bilər.

Gözdən qaçmadı
* Ayxan Abbasov matç ərzində dəfələrlə hakimə etiraz etdi.
* "İmarət Tayfa", "Qarabağ Hooligans" və "Ultras Tovuz"la yanaşı, "Qarabağ Ordu"nun bəzi nümayəndələrini də tribunalarda gördük.

KƏNAN BAHADIR