İyulun 6-da Naxçıvan Futbol Federasiyasının inzibati binasında qurumun prezidenti vəsifəsinə seçkiylə bağlı iclas keçirilib.

İclasda Naxçıvan Muxtar Respublikası Gənclər və İdman Nazirliyi Aparatının əməkdaşları, gənclər və idman idarələrinin rəisləri, federasiya nümayəndələri və aidiyyəti şəxslər iştirak ediblər. Gənclər və idman naziri səlahiyyətlərinin müvəqqəti icraçısı, nazir müavini Məcid Seyidov gündəlikdə duran əsas məsələylə bağlı fikirlərini bölüşüb, federasiyadakı prezident seçkisinin Naxçıvan futbolunda əsaslı dönüşün yaranmasına səbəb olacağına inamını ifadə edib, təmsil etdiyi qurumun öz səlahiyyətləri çərçivəsində idmanın inkişafına xidmət edən istənilən əməkdaşlığa, dəstəyə daim hazır olduğunu vurğulayıb.

Məcid Seyidov federasiya prezidenti vəzifəsinə Zaur Axundovun namizədliyini irəli sürüb. Açıq səsvermənin nəticələrinə uyğun olaraq Zaur Axundov yekdilliklə federasiyanın prezidenti seçilib.Yeni seçilmiş rəhbər etimada görə minnətdarlığını bildirib, ilk növbədə Muxtar Respublikada uşaq futbolunun inkişafıyla bağlı işlər aparacağını diqqətə çatdırıb. Naxçıvandakı futbolsevərlərin “Araz-Naxçıvan” intizarına son qoymaq, eyni zamanda yerli futbolçuların inkişafına nail olmaq üçün yaxın zamanlarda Muxtar Respublika stadionunun təmir olunaraq beynəlxalq tələblər səviyyəsinə gətirilməsiylə bağlı işlər aparıldığını deyən federasiya prezidenti, bununla paralel bölgələrdə yeni futbol qruplarının yaradılması, yarışların keçirilməsi, məşqçilərin təhsili və digər planlar barədə danışıb, Naxçıvanda futbolun dirçəlişi üçün maksimum çalışacaqlarını diqqətə çatdırıb. Qeyd edək ki, o, bu vəzifədə Qəzənfər Abdullayevi əvəzləyib.

Bilindiyi kimi, Zaur Axundov həm də 2008-ci ildən Azərbaycan Futzal Federasiyasının prezidentidi. Yeni prezident paralel şəkildə başqa işlərini də həyata keçirəcək. Yəni Futzal Federasiyasından da ayrılmayacaq. Bəs ümumi durum nə yerdədi? Belədə bəzi detallara varmaqda fayda var.
Maraqlıdı ki, Zaur bəy həm də “Araz-Naxçıvan”ın qeyri-rəsmi rəhbəridi. Baxmayaraq ki, klubun “de-yure” sahibi qardaşı Ramin Axundovdu. Düzü, Muxtar Respublika təmsilçisi premyer-liqanın 2023/24 mövsümünün ilk yarısında yaxşı mənada ün qazanmışdı. Həmin dövrdə komanda baxımlı oyunla diqqət mərkəzində idi ki, daha çox sevilirdi. Zaur Axundov da kollektivlə birgə bölgələrdəki səfər matçlarına yollanır, oyun bitəndən sonra, hətta məğlub olduqları halda belə biz jurnalistlərin önünə çıxır, suallarımızı cavablamaqdan çəkinmirdi. Lakin “qırmızı-ağlar”ın nəticələri pisləşdikcə media nümayəndələrindən aralı gəzməyə başladı. Onu görmək üçün “sky-box”lara boylanmalı olduq. Zaur bəyin idarəsi altında olan futzalda da ürəkaçan mənzərə yoxdu.

Artıq bu idman növünün şəriksiz lideri “Araz-Naxçıvan”ın hər mövsüm rəqiblərini sillələməsinə, maddi üstünlüyü sayəsində komandalara aman verməməsinə alışmışıq. Lap yaxşı edirlər, amma belədə Muxtar Respublika təmsilçisindən beynəlxalq arenalarda uğur gözləyirik ki, gözümüz yolda qalır. Bu dəfə uğurlu olacaqlarmı? Bilmirik. Amma futzalımızın ümumi durumu bəllidi. Bir sözlə ifadə etsək, fiasko! Növbəti mövsüm fərqli olacaqmı? Bilmirik. Hər şeyə rəğmən, ümidli olmaq istəyirik. Ona görə ki, stadionu olmadan premyer-liqada çıxış edən “Araz-Naxçıvan” məxsus olduğu yerə qayıtmalı, doğma publika önündə meydana çıxmalıdı. Ona görə ki, futzaldakı “Araz-Naxçıvan”a tən komandalar olmalıdı. Çempion olmasınlar demirik ki, ciddi rəqabət şəraiti arzulayırıq. Odu ki, Zaur Axundovun bundan sonra hər iki vəzifəsinin öhdəsindən gələ biləcəyinə inanmaq istəyirik. Hər halda, növbəti mövsüm yaxınlaşır. Belədə Zaur bəyin prezident seçilərkən işlətdiyi ifadələri qalxan edib Naxçıvan futbolunun inkişafına, futzalda islahatların aparılacağına və premyer-liqa iştirakçısı “Araz-Naxçıvan”ın ən azı evinə dönməsinə ümid edə bilərik.

KƏNAN BAHADIR