Uzun müddət davam edən danışıqlardan sonra, nəhayət, Abdulla Zubir “Qarabağ”la anlaşdı. Hətta tərəflər “2+1” il şərti ilə yox, birbaşa 3 illik müqavilə imzalandı. Belədə fransalı vinger 2027-ci ilə qədər Ağdam təmsilçisinin heyətində çıxış edəcək.

Bəs 32 yaşlı futbolçunun uzunmüddətli çabalardan sonra komandada qalması “köhlən atlar”a nə verəcək?

Zubir texnikalı oyunu, topla incə davranışıyla seçilir ki, bu da əsasən böyük futbola futzaldan gəlməsi ilə bağlıdı. Lakin sürət baxımından geridə qalması komandanın əks-hücumlarında özünü aşkar şəkildə büruzə verir. Nəzərə alaq ki, getdikcə hədəflərini və məqsədlərini artıran “Qarabağ”a daha sürətli cinah vingerləri lazımdı. Doğrudu, Zubirin texnikalı olması və topu rahatlıqla özündə saxlayaraq rəqiblərdən sıyrılması üstünlükdü. Lakin getdikcə artan yaş, həmçinin hücumlar zamanı kifayət qədər cəld davranmasına imkan verməyən sürəti onun bundan sonrakı performansına aşkar təsir göstərəcək.

Yeri gəlmişkən, “Qarabağ”ın Bayer-04”lə 1/8 final mərhələsində mübarizəni dayandırmağın səbəbini əksəriyyət Elvin Cəfərquliyevin qırımızı vərəqəylə komandanı azlıqda qoymasında gördü. Amma Bakıda keçirilən matçda Zubirin Florian Virtsə səhv ötürməsini o qədər dilə gətirən olmadı. Halbuki o səhv olmasaydı, bəlkə də burda qazanılan qələbəylə “aspirinlər”i psixoloji basqı altında saxlayıb mərhələ adlamaq olardı. Əlbəttə, Zubirin 2018-ci ildən bəri komandada göstərdiyi performans və statistikası qənaətbəxşdi. Ancaq 32 yaşlı bir futbolçunun bundan sonra “Qarabağ” üçün gözlənilən qədər uğurlu olacağını düşünmürəm. Məşhur “transfermarkt” portalının məlumatına görə, vingerlə yaxından maraqlanan klublardan biri də “Neftçi” olub. Bəlkə də “ağ-qaralar” Avropada mübarizə aparmayacağından Zubirin təcrübəsindən yararlana biləcəyini düşünürdü. Bəli, bu mövzuda haqsız da sayılmazlar. Amma “Qarabağ” kimi ölkədəki rəqiblərindən bir baş üstün komanda üçün 32 yaş mühüm göstəricidi.

Ümid edirəm ki, daha böyük uğurları hədəfləyən Ağdam təmsilçisi sol cinah vingeri mövqeyinə alternativ oyunçu da cəlb edəcək.

Xatırladım ki, Zubir indiyə qədər “Qarabağ”ın heyətində müxtəlif turnirlər çərçivəsində keçirdiyi 242 oyunda 57 qol vurub.

KAMAL SƏFƏR