“Daha yaxşı təkliflər olsaydı, bəlkə də gedərdi” - Zubir “Qarabağ”ın yeni təklifinə “hə” dedi
Son günlərdə futbol gündəmini zəbt edən önəmli xəbərlərdən biri də Abdulla Zubirin “Qarabağ”dakı taleyi idi.
Belə ki, Ağdam təmsilçisiylə müqavilə müddəti bu ayın sonunda bitən Mərakeş əsilli fransalı vingerin klubla yeni müqavilə bağlayıb-bağlamayacağı böyük maraq doğururdu. “Qarabağ” iyunun 18-də toplanışa başlasa da, Abdulla düşərgədə görünməmiş, bu üzdən onun klubdan ayrılacağı ilə bağlı şübhələr artmışdı. Nəhayət, srağagün axşam saatlarında tərəflər münasibətləri davam etdirməyə qərar verdi. Müqavilənin maliyyə şərtləri əvvəlki kimi qalır, Zubir “2+1 il” şərti ilə sənədi yeniləyəcək. 2018-ci ildən “köhlən atlar”ın heyətində top qovan futbolçu yola davam etməyə qərar verdi. Klubun mətbuat xidmətinin rəhbəri Anar Hacıyev də “Futbol+”ə verdiyi açıqlamada Zubirin Bakıda olduğunu, müqavilənin detalları yekunlaşan kimi ictimaiyyətə məlumat veriləcəyini dedi. Bəs “Qarabağ” azarkeşləri 32 yaşlı vingerlə müqavilənin yenilənməsini necə qarşıladı? Zubir azarkeşlərin yaddaşında necə qalıb? O, yaxşı, yoxsa ən sadiq legioner oyunçudu? “İmarət tayfa” azarkeş qrupunun rəhbərlərindən Elnur Quliyevin fikiləri:
“Bəli, Zubir uzun illərdi “Qarabağ”da çıxış edir. Klub tarixinin ən yaxşı legioneri olduğunu deməzdim. Bunu fanklub yox, şəxsim adından deyirəm. Fikrimcə, ondan daha yaxşı və daha səviyyəli əcnəbi futbolçularımız olub. Sadiqlik deyəndə ki... Daha yaxşı təkliflər olsaydı, bəlkə də gedərdi. Amma Qurban Qurbanov onu saxlamağı məsləhət bilirsə, deməli, komandaya lazım olan adamdı. Təbii ki, müəyyən reallıqları da nəzərə almaq lazımdı. Elə bunlardan başlıcası da odu ki, hər əcnəbi oyunçu Azərbaycan çempionatına gəlmir. Bilindiyi kimi, həm azarkeş sayı çox azdı, həm də çempionatımızın səviyyəsi o deyil. Həqiqətən istər “Qarabağ”, istərsə də digər klublarımız üçün keyfiyyətli legioner cəlb etmək çox çətindi. İnşallah, xeyirlisi nədisə, elə də olsun. Doğrusu, Zubir sevdiyim futbolçulardan biri deyil. Səbəbini bilmirəm. Başqa legionerləri daha çox istəyirəm. Fəqət Qurban müəllim onun komandada qalmasını istəyirsə, deməli, yaxşı futbolçudu”.
KAMAL SƏFƏR
Digər xəbərlər
