“Hələ ki bu mövzuda susqunluq görürük. Ümid edirəm ki, AFFA-nın yeni rəhbərliyi əvvəlkindən fərqli bu sahəyə diqqəti artırar. Yəqin ki, əcnəbi namizəd gündəmdə olmaz. Fritx Stuxlik və Barış Şimşək kimi əcnəbilərdən sonra vəziyyət göz qabağındadı. Hakimlər Komitəsinin idarəçiliyini çempionatın sonundakı nəticələrdən hiss etdik. Hətta eşitdiyimə görə, komandaların sayının artırılmamasının səbəblərindən biri də hakimlərin azlığı ilə bağlıdı. Əcnəbi hakimlər biri iki, o biri dörd il işlədi. Qazandılar, yedilər, getdilər. Amma onların heç birindən hesabat alınmadı ki, işlədiyiniz müddətdə Azərbaycan hakimlik məktəbinə nə töhfə verdiz, kimləri yetişdiz? Açığı, 10 ilə yaxındı hakimlik fəaliyyətimi bitirmişəm. Amma hələ də mənimlə çiyin-çiyinə hakim işləyən həmkarları görürəm. İstər baş hakim, istər köməkçi olsun, əksəri köhnələrdi. Halbuki vaxt gedir, komandalar ildən-ilə inkişafdadı. Hakimlər Komitəsində isə son dönəmlər susqunluqdu. Ümid edirəm ki, rəhbərlik bu isdə daha diqqətli, səriştəli, qəti qərarlar verər. Bacarığına, savadına gorə Azərbaycan hakimliyinə fayda verə biləcək bir şəxs tapar, bu vəzifəni ona həvalə edər. Yeni rəhbərlik də onun qarşısına tələblər qoyar. Bu elə bir sahədi ki, rəhbər vəzifədə hər kəsin qəbul və hörmət etdiyi sima olmalıdı. Boşuna kimisə gətirmək olmaz. Əcnəbilər işlədi, heç nə də vermədi. Azərbaycanlı, bacarıqlı, bu sahəni yaxşı bilən yerli namizəd seçmək olar. Mütləq onlara güvənmək lazımdı. Hər hansı qərara verərkən tələsməsələr, yaxşı olar. Çox istərdim ki, ölkəmizdə bu sahədə nöqsanlar aradan qalxsın. Fəqət bizdə futbolun inkişafı, komandaların strukturu yaxşılaşdırması yönündə addımlar atılsa da, Hakimlər Komitəsi geri qalır. Avropa çempionatına da baxanda görürük ki, hakimlər komandaların səviyyəsinə uyğun idarəçilik edirlər. Hansısa hakim təlimatdan kənar çıxan kimi çempionatdan kənarlaşdırılır. Bir də özümüzə baxaq: Azərbaycana Hakimlər Komitəsinin sədri kimi gətiriləsən, 4 il işləyəsən, heç bir nəticə vermədən də çıxıb gedəsən. Heç kim də səndən hesabat istəməsin. Belə şeylər olmasın deyə gətirilən mütəxəssis məsuliyyət hiss etməlidi ki, hansı ölkəyə gedir, harda işləyəcək? Başda Tofiq Bəhramov olmaqla ondan sonra hakimlik məktəbimiz postsovet məkanında sayılıb-seçilib. İstərdim ki, inkişaf olsun, yeni simalar üzə çıxaraq. Regionlarda gənc və perspektivli hakimlər var ki, onları tapmaq, üzə çıxarmaq lazımdı. Yerli mütəxəssis seçilsə, mən də sevinərəm, əlimdən gələn köməyi də əsirgəmərəm. Bu sahədə uzun illər can qoyduğum üçün mən də istərdim bir köməyim dəysin”.