Ölkə futbolunun mühüm strukturlarında baş verən bir çox dəyişiklikdən xəbərdarsız. AFFA prezidenti postuna və İcraiyyə Komitəsinə yeni adamlar gəldi. Yenilik olacağı gözlənilən yerlərdən biri də Hakimlər Komitəsidi.

"Football-plus.az"a daxil olan məlumata görə, bu ilin iyulunda ikiillik müqaviləsinin müddəti bitən Barış Şimşək yola salınır. Buna səbəb türkiyəli funksionerin ümidləri doğrultmamasıdı. Çünki onun fəaliyyəti dövründə ciddi inkişafın hiss olunmadığı hakim idarəçiliyindən böyük narazılıqlar var. Xüsusilə cari mövsüm ərzində bir çox baş məşqçinin, azarkeşlərin, ümumiyyətlə, futbol ictimaiyyətinin səbrini sınayan mütəxəssisin "qələmi qırılır". Bəs onu kim əvəzləyəcək? Saytımıza verilən bilgiyə görə, bu vəzifə üçün ən uyğun namizəd Tahir Süleymanovdu. Hazırda veteran hakimin bu posta gətirilməsi yönündə mütəxəssislə müəyyən müzakirələr aparılır.

Maraqlıdı ki, o özü bu təyinatın baş tutmasında maraqlı tərəf deyil. Yəni hələ ki AFFA-ya müsbət cavab verməyib. Bizdə olan informasiyaya görə, Süleymanov Barış Şimşəyin yola salınmasını yaxşı hal hesab edirsə, bu postda yerli mütəxəssisin gətirilməsinin tərəfdarıdı. Özü isə hələ ki yekun qərarını açıqlamayıb.

KƏNAN BAHADIR