Avropa Çempionatı sanki müasir futbolun əsas ulduzlarından olan Kilian Mbappe üçün lənətlənmiş turnirdi.

“Football-plus.az” xəbər verir ki, fransalı superulduz bu turnirdə heç cür qol vura bilmir. Düzdü, ''xoruzlar'' Avstriyanı minimal hesabla məğlub edərək AÇ-2024-ə qələbə ilə start verdilər. Yeganə qolda Mbappe də iştirak etdi. Məhz onun ötürməsindən sonra Maksimilian Vöber avtoqol müəllifi oldu. Amma qalan anlarda oyun ''Real''ın yeni üzvü üçün uğursuz alındı. Mbappe AÇ-də keçirdiyi 5-ci oyunda da meydanı qolsuz tərk etdi. O, AÇ-2020-də də 4 oyunun hamısında meydanı qola həsrət qalmışdı. İkinci hissənin gedişində qapıçı ilə təkbətək çıxan və yüz faizlik fürsəti boşa verən Kilian oyunun sonuna yaxın daha bir şanssızlıqla üzləşdi. O, başla topa zərbə endirmək istəyərkən rəqiblə toqquşdu və qan içində yerə yıxıldı. Tibbi müayinə üçün kənara gəldikdən sonra Mbappe vaxtı uzatmaq üçün meydana girib yenə özünü yerə atdı və bütün bunlar azmış kimi sarı vərəqə də aldı. Daha sonra isə əvəzləndi və birbaşa və stadiondan birbaşa xəstəxanaya aparıldı. Baş məşqçi Didye Deşam oyunsonrası açıqlamasında əsas liderinin durumunun heç də yaxşı olmadığını bildirdi. Bir neçə saat sonra isə Mbappenin zədəsinə aydınlıq gəldi. Fransa Futbol Federasiyasından verilən məlumatda Mbappenin burnunun sındığı məlum oldu. Düzdü, cərrahi müdaxiləyə ehtiyac yoxdu. Amma 25 yaşlı futbolçu turnirin sonuna qədər xüsusi maskada oynayacaq!

ƏLİ