Qazaxlar yenə yolumuzu kəsdi - AÇIQLAMA
Minifutbol yığmamız Bosniya və Hersоqovinanın paytaxtı Sarayevoda keçirilən Avropa çempionatında mübarizəni dayandırdı.
Srağagün 1/4 finalda Qazaxıstanla qarşılaşan millimiz məğlub olmaqla həm turnir, həm də Avropa çempionu titulu ilə vidalaşıb. Xatırladaq ki, iki il əvvəl finalda Rumıniyanı məğlub etməklə bu titulu qazanmışdıq.
Qazaxıstanla oyun qolsuz bitdiyindən oyunsonrası penaltilərə ehtiyac duyulub. Qazaxlar zərbələri daha dəqiq (7:6) yerinə yetirməklə yarımfinala adalyıb. Yeri gəlmişkən, ötən il dünya çempionatının yarımfinalında da onlara uduzmuşduq. Oyundan sonra yığmanın baş məşqçisi Elşad Quliyevin fikirlərini öyrəndik:
"Matça yaxşı başlamışdıq və axıra qədər də üstün idik. Yaxşı oyun göstərdiyimizi düşünürəm. Sadəcə, rəqib müdafiəyə qapandığına görə qol çatmırdı. Oyunun penaltilərə getmə ehtimalını həmişə düşünürük. Hazırlaşmışdıq, lakin təəssüf ki, alınmadı. 6 penaltini dəqiq yerinə yetirsək də, yeddincini vura bilmədik. Rəqibimin bizdən yeganə üstün cəhəti müdafiədə yaxşı oynaması idi. Baxmayaraq ki, sonuncu dünya çempionatında 2-ci yerə çıxıblar, lakin biz onlardan daha yaxşı oyun göstərdik. Penaltilər lotereya kimi bir şeydi. Nə qədər hazırlaşsan belə, həmin an kimin səhv edəcəyi bəlli olmur".
Qeyd edək ki, yığma qrup mərhələsində keçirdiyi bütün matçlarda qələbə qazanıb - Belçika 3:0, İtaliya 2:1, Fransa 3:1. 1/8 finalda isə Bolqarıstana qalib gəlmişdik - 3:1.
GÜNAY SÜLEYMANOVA
Digər xəbərlər
