“Bu şərt baş məşqçinin müqaviləsində qeyd edilməlidi”
Hələ də baş məşqçisiz qalan yığmamız dünən yoldaşlıq oyunu keçirdi.
Macarıstanın Sombathey şəhərində Albaniya ilə üz-üzə gələn milli iyunun 11-də eyni məkanda Qazaxıstanla qarşılaşacaq. Azərbaycanda fanat hərəkatının gələcəyi, yığmanın perspektivləri haqda millinin ən böyük azarkeş qrupu “Göyqurdlar”ın rəhbəri Elnur Şəriflinin fikirlərini öyrəndik:
"Fikrimcə, federasiya məşqçi seçimində çox gecikir. Çox güman, bu dəfə menecerlər tərəfindən də təklif olunan məşqçilərə münasibətdə çox həssas davranılır. Budəfəki seçimin çox araşdırıldığı və tez seçilməməsi müsbət haldı. Buna bir bucaqdan baxsaq, gözəl amildi, ancaq başqa bucaqdan baxanda məşqçi seçimində gecikdiyimiz aşkardı. Yeni məşqçi seçilməmişdisə, Macarıstana toplanışa getmək düzgün deyil. Onun yerinə matçları Bakıda keçirib ən azı azarkeşləri sevindirmək olardı. Azarkeşlər olaraq, seçimimiz açıqdı. Hamımız Qurban Qurbanovun məşqçi təyin edilməsini istəyirik. Ancaq indiyə qədər təyinat yubanıbsa, aydındı ki, məşqçimiz əcnəbi olacaq. Bizim əcnəbi məşqçidən tək istəyimiz fəaliyyəti dövründə Bakıda yaşamasıdı. Bu şərt baş məşqçinin müqaviləsində qeyd edilməlidi.
Millinin perspektivi, fanat hərəkatının gələcəyi haqda deyərdim ki, hazırda azarkeşlərin milliyə itən inamını bərpa etməyə çalışırıq. Milli komandanın azarkeş ordusu bizim, yəni "Sektor 11"in tribunadan çəkilməsindən sonra illərlə davam edən uğursuz nəticələrlə birlikdə əriyib yox oldu. Ancaq bir ildi qrupumuzu "rebrendinq" edərək "Göyqurdlar" altında yenidən ayağa qaldırmağa nail olmuşuq. Milli komanda üçün azarkeş toplamaq həddən artıq çətindi. Lakin birillik qayıdışımız nəticəsində müsbət mənada irəliləyiş nail olmuşuq. Qeydiyyatından keçən 1262 üzvümüz var və bunu daha da artırmaq üçün dayanmadan əlimizdən gələni edirik. Bildiyiniz kimi, biz federasiyadan və ya heç bir qurumdan maliyyə yardımı almırıq, hər şeyi öz hesabımıza edirik. Bizdə heç vaxt pul ilə iştirak edən muzdlu azarkeş olmayıb və olmayacaq da. Nəticədən asılı olmayaraq, bütün üzvlərimizə üçrəngli bayrağımız üçün stadiona gəlməyi, milli komandamıza dəstək olmağı aşılayırıq. Yüksək nəticə göstərməyən milli komandaya azarkeşlik edən bir qrup üçün bunun həm öz çətinliyi, həm də öz gözəlliyi var. Bolqarıstan matçda komandamızın hesabda 0:1 geri düşməsinə baxmayaraq, bütün tribunamız futbolçuları daha güclü şəkildə sona kimi dəstəkləməyə davam etdi və nəticədə qol da vuruldu. Nəticəyə fikir vermədən sonra kimi bu cür dəstəyə yalnız bayrağını və ölkəsini sevən azarkeşlərlə nail olmaq olar.
Çempionatda tribunaların boş olmasına gəlincə, bunda klublar daxil hər kəsin günahı var. Fikrimcə, bu mövzuda liqadakı klubların azarkeş qrupunun rəhbərləri fikir bildirsə, daha düzgün olar. Biz hazırda bütün fikrimizi yığma komandalarımıza yönəltmişik".
GÜNAY SÜLEYMANOVA
Digər xəbərlər
