"Yerli məşqçi gələcəksə, o posta tək layiqli namizəd, fikrimcə, Qurban Qurbanov ola bilər. Yoxsa milli komanda postu test ediləcək yer deyil ki, hər kəs gəlib orda təcrübə yığsın. Bizə hazır məşqçi lazımdı ki, artıq komandamızı irəli daşısın. İllərdi biz azarkeşlər qələbələrə, uğurlara acıq. Bizə "mənə vaxt verin ki, nəticə göstərim" deyən məşqçi lazım deyil. Çünki hazırki milli komanda dövrünün ən güclüsüdü. Komandadakı bütün uşaqlar canavar kimidi, partlamaya hazır bomba kimi gözləyirlər. Yenə bu bombanın fitilinə çaxmaq vurub alışdıracaq məşqçi gətirilməsə, bu heyət heyif olacaq, bu güclü nəsil əlimizdə çürüyəcək. Yenə belə uğursuz seçim olarsa, artıq biz azarkeşlər "partlayacağıq". Sistemə uyğun məşqçi gətirilib qruplardan çıxmalıyıq. “Göyqurdlar” olaraq, komandamızın arxasındayıq, futbolçularımızın gücünə tam güvənirik. İstədikləri 90 dəqiqə dəstəyi biz onlara səsimiz batana kimi verəcəyik, ancaq onlar da artıq meydanda ayaq basmağa yer qoymayana kimi mübarizə aparmalıdırlar. Bizə Gürcüstanın və ya başqalarının uğurları maraqlı deyil. Öz yolumuza baxmalı və artıq qruplardan çıxmalıyıq. İsveçi Bakıda 3:0 məğlub edən heyət hər şeyə qadirdi. Uşaqlara sona qədər inanırıq və gerçəkdən də güclü olduqlarını bilirik. Ümid edirik, federasiya da artq məşqçi seçimlərində hər kəsi dinləməli və bombanı partlatmağa hazır olan dinamik məşqçi gətirməlidi. Təbii ki, Qurban Qurbanovu istəyirik, ancaq yenə əcnəbi məşqçiyə yönələcəklərsə, birmənalı şəkildə trk məşqçi istəyirik. Heç vaxt milli komandamızda türk məşqçi olmayıb. Bunu həm coğrafi məsafələrin yaxınlığını, həm də Türkiyə ilə digər yaxınlıqlarımızı nəzərə alaraq deyirik. Yeni məşqçi gününü Bakıda keçirməli, komandadakı oyunçuların matçlarını stadiondan izləməli, hər oyundan sonra onların halı-əhvalı ilə yaxından maraqlanmalıdı. Bir daha deyirəm ki, milli komandanın baş məşqçi postu test yeri deyil. Test mərhələsi artıq çoxdan qurtarıb, bombanın fitilinə çaxmaq vurmaq vaxtıdı".

"Düşünürəm ki, yerli məşqçi olsa, daha yaxşı olar. Qurban Qurbanovu millidə görmək bizi şad edər. Çünki Qurban müəllimin "Qarabağ"da etdikləri göz önündədi. O, bir çox şeyləri bacardı, bzə ilklər yaşatdı. Qurbanovla bərabər millimiz daha çox irəliləyə bilər".