Bir neçə gün əvvəl Amerika Kubokunda yenilik olacağı haqda xəbər yayılıb.

Hakimlərin futbol tarixində ilk dəfə çəhrayı vərəqədən istifadə edəcəyi bildirilib. Lakin...
Xəbərdə referilərin bu vərəqədən yalnız başından zərbə alan futbolçuların əvəzlənməsi üçün yararlanacağı qeyd edilib. Yeni qaydaya əsasən komandaların baş məşqçiləri bu faktı dərhal hakimə bildirməlidilər. Lakin çox keçmədən bəzi mənbələrin bu iddiasına rəsmən aydınlıq gətirilib. Məsələ komandalar üçün nəzərdə tutulan əvəzlənəcək oyunçularla bağlı hazırlanan blanklarla bağlıdı. Belə blanklar adətən ehtiyat hakimə təqdim olunur.

Hakimin işinin daha əlverişli olması üçün blankların çəhrayı rəngdə də hazırlanması qərara alınıb. Belə blanklarda kəllə-beyin zədəsi alan oyunçunun adı və soyadı yazılacaq. Belə zədə növü komandalara bir oyun üçün nəzərdə tutulandan əlavə əvəzləmədən istifadə etmək hüququ verəcək. Yeri gəlmişkən, Rusiya çempionatında artıq bu yenilikdən istifadə edilib: mayın 11-də keçirilən “Zenit” – ÇSKA matçında (0:1) qonaqların qapıçısı Vladislav Torop ciddi zədə aldığı üçün baş məşqçi Vladimir Fedotov əlavə əvəzləmə qaydasından yararlanmalı olub.
Amerika Kubokunda hakimlərin sarı və qırmızıdan başqa çəhrayı vərəqədən də istifadə edəcəkləri haqda yanlış xəbəri ilk dəfə hansı mənbənin yaydığı məlum deyil.

Maraqlısı odu ki, bu məlumat qısa zamanda dünyaya yayılmışdı. Lakin əsl həqiqət KONMEBOL-un rəsmi saytında (conmebol.com) aydın şəkildə əksini tapıb. Cənubi Amerika Futbol Konfederasiyası Amerika Kubokunun reqlamentində edilən dəyişikliklərlə bağlı rəsmi məlumatı mayın 21-də yayıb. Həmin məlumatda kəllə-beyin zədəsi alan oyunçunun əvəzlənməsi üçün hazırlanan blankın çəhrayı rəngdə olacağı yazılıb. Yeri gəlmişkən, artıq bu qayda ABŞ çempionatının yüksək liqasında – MLS-də tətbiq edilir.

Xatırladaq ki, Amerika Kuboku iyunun 20-də start götürəcək və iyulun 14-də sona çatacaq.