Növbəti Amerika Kubokunun təşkilatçısı müəyyənləşib. 2024-cü ilə təyin olunan turnir ABŞ-da təşkil ediləcək.

Cənubi Amerika Futbol Konfederasiyası (KONMEBOL) ilə Şimali və Mərkəzi Amerika Futbol Konfederasiyası (KONKAKAF) arasında uzun sürən danışıqlar müsbət nəticələnib. Təşkilatlar strateji əməkdaşlıq haqqında saziş bağlayıblar. Müqavilənin şərtlərindən birinə əsasən, növbəti Amerika Kubokuna ABŞ evsahibliyi edəcək. Turnir 2024-cü ilin iyun-iyul aylarına təyin olunub. Qitə çempionatında ənənəvi olaraq KONMEBOL-a daxil olan 10 ölkənin yığması və KONKAKAF-ın üzvü olan ölkələrin komandaları arasında ən yaxşı 6-sı iştirak edəcək. Şimali Amerikadan olan yığmalar KONKAKAF Millətlər Liqasının 2023/24 mövsümünün yekunlarına əsasən Amerika Kubokunda iştirak hüququ qazanacaqlar.

Yeri gəlmişkən, Amerika Kubokunun son qalibi Argentina yığmasıdı. Lionel Skaloninin çalışdırdığı komanda 2021-ci ildə Braziliyada keçirilən turnirin finalında ev sahibini Anxel Di Mariyanın vurduğu yeganə qolla məğlub edib.