Azərbaycanın daha bir rayonu futbol ailəsinə qoşulub.

Bu, yeni mövsümdən Region Liqasında “Şimal” komandası ilə təmsil olunacaq Xaçmazdı. Komandanı “Simurq”, “Xəzər Lənkəran”, “Şahdağ”, “Kəpəz” və bir sıra başqa klubların, həmçinin millinin heyətində çıxış etmiş Tural Cəlilov çalışdıracaq. Dünən onunla əlaqə saxlayıb klubun yaranması və hədəfləri barədə söhbətləşdik.

- “Şimal”ı nə vaxt yaratmısız?
- Klubun yaradılması barədə söhbətlər bir neçə ay əvvəldən gedirdi. Ümumiyyətlə, Xaçmazı böyük futbola gətirmək üçün plan qururduq və sonda belə bir kollektiv yaratdıq. Region Liqasından başlanğıc kimi istifadə edəcəyik. İnşallah, sonrakı hədəflərimiz də böyükdü.

- Bəs bu ideyanın müəllifi kimdi?
- Mən və məşqçim Zöhrab müəllim. Zöhrab müəllim Xaçmazın uşaq futbolu üçün böyük işlər görüb. Hazırda bizim rayon uşaq yetişdirməkdə başqa bölgələrdən irəlidədi. “Səbail”ə, “Sabah”a, “Vətən”ə 40-a yaxın uşaq göndərmişik. Maşallah, bizdə uşaq futbolu inkişaf edir. Lakin stadion baxımından problemlərimiz var. Şərait o qədər də ideal deyil.

- Baş məşqçi kimi ilk sınağınız olacaq?
- Bəli. Həmçinin uşaq futbolunda da məşqçilik edirəm. Niyyətim Azərbaycan futbolunun gələcəyi üçün Xaçmazdn uşaqları yetişdirməkdi.

- Bildiyimə görə, ev oyunlarını SOCAR-ın Sosial İnkişaf İdarəsinin balansındakı Siyəzən şəhər stadionunda və Xaçmaz Olimpiya İdman Kompleksinin meydançasında keçirməyiniz nəzərdə tutulur. Hazırda bu arenalarfa vəziyyəti necədi?
- Xaçmaz Olimpiya İdman Kompleksinin futbol meydançası bərbad gündədi. Rayonumuzda futbol oynamaq üçün yeganə arena budu, lakin vəziyyəti ürəkaçan deyil. Yağış, qar olanda məşqləri dayandırmağa məcburuq. Siyəzəndəki stadion isə əladı. “Qusar”la neçə illərdi oyunlarımızı bu arenada keçirirdik.

- Region Liqasındakı hədəfləriniz nədi?
- Çempion olmaq məqsədimiz yoxdu. Əsas hədəf bu il Region Liqasında iştirak etməkdi. Lakin mənim də öz prinsiplərim var. Məsələn, uduzmamaq. Hədəflərimiz yaxşı kollektiv qurmaq və rayonumuzu uğurla təmsil etməkdi.

- Sizə sponsorluq edən, kənd təsərrüfatı məhsullarını ixracı və idxalı ilə məşğul olan “BestProdMMC” lazımı dəstəyi verəcəkmi?
- Bəli, bütün maliyyə dəstəyini qeyd etdiyiniz şirkət qarşılayacaq. Hər bir şərait də yaradır, yaradacaq da. Allahın köməyi ilə hər şey yaxşı olacaq.

- Ötən mövsüm “Qusar”ın heyətində Region Liqasının qalibi olan bəzi oyunçuları da heyətinizə qatmısız. Bunlar kimlərdi?
- “Qusar”la ötən mövsüm çempion olan oyunçulardan beşi xaçmazlı idi. Bizə rəhbərlik tərəfindən klubda qalmaq üçün çoxlu təklif oldu, lakin doğma rayonumuzun futboluna kömək etmək üçün ordan ayrıldıq. “Qusar”a öyrəşmişdik, həm də orda böyük əziyyətimiz olub. Ancaq bölgəmizin futbolu üçün bunu etdik.

- Heyəti tam komplekləşdirmisiz?
- Bəli, heyətimiz, demək olar ki, hazırdı. Kollektivin 95-97 faizi Xaçmaz uşaqları olacaq. Birinci liqada və uşaq futbolunda oynamış futbolçular da bizimlədi. Məqsəd rayonumuzun uşaqlarının inkişafıdı. İnşallah, hədəf gələcəkdə Xaçmazı premyer-liqaya çıxarmaqdı.

CAVİD ƏLİYEV