Dünən futbol üzrə ölkə çempionatının 1-ci liqasında mövsümə yekun vuruldu.

Son turun bütün matçları eyni gündə keçirildi. Lider “Şamaxı” autsayder “Araz Saatlı”nı qəbul etdi. Yerli publika oyuna böyük maraq göstərdi. Tribunalarda 2000-dən artıq azarkeş, fərqli məzmunda plakatlar var idi.

Gözlənildiyi kimi, “Şamaxı” oyuna üstün başladı. Bunun da məntiqi nəticəsi kimi hesab erkən açıldı. 8-ci dəqiqədə Davud Mahmudov avtoqol müəllifi oldu. Qoldan sonra da hücumları dayandırmayan meydan sahibləri fərqi artırmağa çalışırdı. Elşad Tağıyevin ilk zərbəsini qolkiper dəf etdi, ikinci cəhdində isə top qapının üstündən keçdi. Buna baxmayaraq, “şirlər” 57-ci dəqiqədə qol istəyinə çatdı. Bəhruz Teymurov künc zərbəsindən gələn ötürməni başla dəqiq tamamladı – 2:0.

Hesabda geri düşən qonaqlar oyunda dönüş yaratmağa çalışdı. 61-ci dəqiqədə dünya futbolunda nadir hallarda rast gəlinən avtoqol gördük. “Şamaxı”nın müdafiəsində baş verən kobud səhvdən sonra qapıçı Abdulla Seydəhmədov topu öz qapısına göndərdi – 1:2. Çox keçmədən qonaqlar xoşagəlməz halla üzləşdi. Lamin Çam ikinci sarı vərəqəni alaraq, meydandan qovuldu. Bundan sonra oyunun axarına “Şamaxı” tam nəzarət etdi. Matçın son dəqiqələrində bu komanda 3-cü qolu da vurdu. Emin Zamanov penalti dəqiq yerinə yetirdi – 3:1.

Bununla da “şirlər” çempionluğu rəsmiləşdirdi, premyer-liqaya vəsiqə qazandı. “Araz Saatlı” isə sonuncu yerin sahibi kimi 2-ci liqaya yollandı.

İSMAYIL