Cümə axşamı ölkə futbol ailəsinin ürəyi Lokbatanda döyünürdü.

Bu da səbəbsiz deyil. Elitaya vəsiqə qazanmağa iddialı komandalar üz-üzə gəlirdi. Tribunalara toplaşmış 1600 azarkeş, oyunu izləməyə gələn jurnalist ordusu, aşağı dəstədə VAR-ın tətbiqi, Azər Həşimovun vaxtilə rəhbərliyi altında oynadığı Ramiz Məmmədova varlığını sübut etmək həvəsi – bir sözlə, bu oyun ətrafında maraqlı məqamlar çox idi. “Qaradağ Lökbatan”ın “şirlər”dən 1 xal öndə olması da öz yerində.

“Şamaxı” mövsümə yaxşı başlamasa da, Məmmədovun noyabrda “sükan arxasına” keçməsi ilə həvəsləndi, dirçəldi. “Qaradağ Lökbatan” isə mövsümün əvvəlindən zirvədə və ya onun həndəvərində dolaşır.

Oyuna qonaqlar daha fəal başladı. Artıq 6-cı dəqiqədə Bəhruz Teymurovun zərbəsi yetərincə təhlükəli alındı. Amma meydan sahibləri ilk ciddi hücumda penalti qazandı. Zahid Mərdanov Xəlil Bəşirova qarşı elə ehtiyatsız oynadı ki, Əliyar Ağayev dərhal “nöqtə”ni göstərdi. Topun arxasına keçən Seyxan dəqiq zərbəylə komandasını önə keçirdi – 1:0. 31-ci dəqiqədə referu növbəti dəfə penalti qərarı verdi, amma bu dəfə “şirlər”in xeyrinə. Lökbatanlıların qolkiperi Əmrah Zülfüqarlı çıxışda Bəhruza qarşı kobud davrandı. Bölgə təmsilçisinin kapitanı Emin Zamanov hesabı bərabərləşdirdi – 1:1. Amma qonaqların sevinci uzun sürmədi. 41-cı dəqiqədə Rəşad Həsənovun qapı önünə göndərdiyi ötürməni Xəlil başla tamamladı – 2:1. İkinci yarı başlar-başlamaz Ramiz Məmmədovun yetirmələri hesabı bərabərləşdirdi. Yenə Emin Zamanov səhnəyə çıxdı. Azər Həşimovun yetirmələri qolun təsirindən ayılmamış yenə mərkəzə dəvət olundu. 52-ci dəqiqədə Abbas Ağazadənin ötürməsindən sonra Emin cərimə meydançasının kənarından vurduğu yumşaq zərbəylə topu tora qovuşdurdu – 3:2. Bununla da kapitan het-trikini rəsmiləşdirdi. Çempionluğun əldən gedəcəyini anlayan lökbatanlılar bütün qüvvəsiylə irəli atıldı. 69-cu dəqiqədə Akyamın, ardından Quiberonun zərbəsi təhlükəli alındı. 78-ci dəqiqədə meydan sahibləri hesabı bərabərləşdirmək üçün ən real qol imkanı qazandı. Lakin Xəlilin zərbəsini Qurban Səfərov boş qapıdan çıxardı.
Beləliklə, “Şamaxı” sona bir tur qalmış liderliyə yüksələrək çempionluq yolunda önəmli addım atdı. Qonaqların futbolçu-məşqçi heyəti, azarkeşləri bu qələbəni elitaya dönüş rəsmiləşibmiş kimi qeyd etdi. Əslində buna haqları çatır. “Şamaxı”nın son turda evdə aşkar autsayder “Araz Saatlı”ya uduzması dünyanın 8-ci möcüzəsi olardı. “Qaradağ Lökbatan” düşərgəsi isə çox məyus görünürdü. Bəzi futbolçuların qazon üzərindən qalxmağa belə halı qalmamışdı...

KAMAL SƏFƏR