Boks və döyüş həvəskarlarının səbirsizliklə gözlədiyi qarşılaşma mayın 18-dən 19-na keçən gecə Səudiyyə Ərəbistanının paytaxtı Ər-Riyadda baş tutdu.

WBA, IBF və WBO versiyaları üzrə superağır çəkinin çempionu Aleksandr Usik WBC versiyası üzrə çempion Tayson Fürini hakimlərin qərarı əsasında məğlub etdi. 37 yaşlı ukraynalı Lennoks Lüisin dönəmindən bəri (2000) superağır çəlidə ilk mütləq dünya çempionu, dörd kəmərinin hamısının ilk sahibi oldu. 35 yaşlı Füri karyerasında ilk dəfə məğlubiyyətlə barışdı. Britaniyalı buna qədər oktaqonda keçirdiyi 34 döyüşün hamısında qələbə qazanmış, onun qatıldığı bir döyüş heç-heçə bitmişdi. Usik isə 22 döyüşün hamısında qələbə qazanıb.

Yeri gəlmişkən, artıq bu iki idmançı arasında əvəzçıxma döyüşünün təşkili ilə bağlı da söhbətlər başlayıb. Daha doğrusu, onların ilk döyüşlə bağlı müqaviləsinin şərtlərində ikinci görüş də nəzərdə tutulub. Həmin əvəzçıxma döyüşü birincidən 5 ay sonra – oktyabrın 12-də keçirilməlidi. Bu haqda xəbəri insayder Maykl Benson X sosial şəbəkə hesabında yayıb.