Terimin Yunanıstan macərası fiaskoyla yekunlaşdı!
Türkiyə futbolunun gəlmiş-getmiş ən güclü məşqçisi hesab olunan Fatih Terimin Yunanıstan macərası uzun çəkmədi.
“İmperator” ötən il dekabrın 26-da “Panatinaikos”un baş məşqçisi təyin olunmuşdu. Dünən isə bu iş birliyinə rəsmən yekun vuruldu.
“Mövsüm bitəndən sonra deyiləsi çox sözüm olacaq”
Dünən səhər saatlarında ünlü mütəxəssis “instaqram” səhifəsində bu sözləri paylaşdı:
“Dekabrdan bu yana köməkçilərimlə birlikdə var gücümüzlə çalışdığımız “Panatinaikos”da hədəfimiz mövsümü çempion kimi tamamlamaq və fanatlara 13 mövsümdü həsrətində olduqları sevinci yaşatmaq idi. Dünən (srağagün – red.) axşam başqan Yannis Alafuzosla bir araya gələrək durumu dəyərləndirdik. 2024/25 mövsümü üçün planlarımızın üst-üstə düşmədiyini gördük. Bunun nəticəsi kimi peşəkar münasibətləri bititirməyə qərar verdik. Afinada keçirdiyimiz 6 ay boyunca bizi bağrına basan fanatlara, prezidentə, eləcə də bizə hər fürsətdəcə sevgisini, hörmətini göstərən Yunanıstan futbol ictimaiyyətinə təşəkkür edirəm. “Panatinaikos”a bundan sonrakı dönəmdə ürəkdən uğurlar arzulayıram”.
Ötən həftəsonu Yunanıstan çempionatında çempionluq qrupunun 9-cu turunun oyunları keçirildi. Tura 71 xalla 3-cü pillədə daxil olan “Panatinaikos” 74 xalla 2-ci pillədə qərarlaşan PAOK-un qonağı oldu. Aktivində 75 xal olan lider AEK isə 70 xallı “Olimpiakos”un qonağı oldu. Yəni “Pana” onsuz da cüzi olan çempionluq şansını davam etdirmək üçün PAOK-u yenməli və AEK-in uduzmasına ümid bəsləməli idi. Əslində ikinci variant reallaşdı. AEK səfərdə “Olimpiakos”a 2 cavabsız qolla boyun əydi.
Amma “Panatinaikos” üçün “Tumba” stadionundakı oyun tam bir fiasko ilə nəticələndi. Razvan Luçeskunun komandasının 4 qoluna Terimin komandası yalnız 1 qolla cavab verə bildi. Bununla da “Panatinaikos” həm 4-cü pilləyə yuvarlandı, həm də çempionluq şansını rəsmən itirdi. Çempionluq həsrəti 14 ilə yüksəldi. Halbuki komanda qalib gələcəyi təqdirdə son tura liderdən yalnız 1 xal geridə daxil olacaqdı. Hər məğlubiyyətdən sonra diqqətçəkən açıqlamalar verən Terim bu dəfə də ənənəsinə sadiq qaldı:
“Olaya sırf nəticə prizmasından baxmamalıyıq. Sadəcə, uduzduq və hədəfə çata bilmədik. Olaya bu şəkildə yanaşmaq lazımdı. PAOK-u təbrik edirəm. Hələ ki “Olimpiakos”la oyun və kubokun finalı barədə düşünməliyik. Amma mövsüm bitəndən sonra deyiləsi çox sözüm olacaq. Qolu çox gec vurduq. İrəlidə istədiyimiz kimi oynaya bilmədik. Bəzi şeyləri doğru etsək də, fərdi səhvlər yenə bizə baha başa gəldi. İlk qolu buraxdıqdan və hesabda geri düşdükdən sonra çox çətinlik çəkməyə başlayırıq. Mövsümün sonunda “Panatinaikos” fanatlarına bəzi şeyləri açıqlayacam”.
“Kiçik komandalarla oyunlara lazımi qədər diqqət ayırmadı”
Əslində Terimlə “Panatinaikos” arasındakı iplər hələ aprelin sonlarında qopmuşdu. 8-ci turda Afina nəhəngi sürpriz şəkildə öz meydanında “Aris”ə minimal hesabla boyun əymişdi. Biz də həmin vaxt “Terim 23 il əvvəlki aqibətlə üzləşə bilər” sərlövhəli yazı dərc etmişdik. Zaman göstərdi ki, tanınmış məşqçi həqiqətən də bu cür aqibətlə üzləşdi. “İmperator” 2001-də “Fiorentina”nı İtaliya kubokunun finalına yüksəltsə də, çempionatdakı pis nəticələr üzündən həlledici oyuna çıxmadan qovulmuşdu. İndi də belə oldu. Terim komandasını kubokun finalına yüksəltdi. Həlledici görüş mayın 25-də “Aris”ə qarşı olmalı idi. Amma əfsanəvi türkiyəli məşqçi o matçda komandanın başında olmayacaq. “Aris”ə çempionat çərçivəsində evdəki şok məğlubiyyətin ardından “Pana” fanatları ilk dəfə Terimi fitə basmışdı. O qarşılaşmadan dərhal sonra prezident Yannis Alafuzosun Terimdən kəskin şəkildə narazı olduğu və onu mövsüm başa çatmamış istefaya göndərəcəyi barədə çoxsaylı şayiələr yayılmışdı. Sadəcə Alafuzos həmin vaxt bu yükün altına girə biləcək bir məşqçi tapmamışdı. Psixoloji cəhətdən çökmüş komandanı çempionatda iki prinsipial rəqibə – PAOK və “Olimpiakos”a qarşı görüşlər, üstəlik kubokun finalı gözləyirdi. Heç bir məşqçi bu cür həlledici məqamda bu vəzifəyə gəlmək istəmədi. Bu üzdən Alafuzos məcburiyyətdən Terimlə yola davam edərək PAOK-la oyunda ona sonuncu dəfə şans vermək istədi.
Amma hər şey daha da bərbad oldu. Yunanıstanlı jurnalist İoannis Sapuntzakis Terimin dönəmini “Fanatik” nəşrinə dəyərləndirərək bunları deyib: “Terim Yunanıstana bir hədəf – yalnız çempionluq üçün gətirilmişdi. Amma buna nail olmadı. Xüsusilə son 3 oyunda komanda sadəcə fəlakət bir performans sərgilədi. Hiss olunurdu ki, heç bir plan yoxdu. Terim əvvəlki məşqçinin dönəmində mühüm rol oynayan futbolçuları ortadan qaldırdı. Əslində Terim bir çox şeyi sınaqdan keçirdi. Onun əsas səhvi kiçik komandalarla oyunlara lazımi qədər diqqət ayırmaması oldu. “Lamia”, “Kifisia”, OFİ ilə görüşlərdə itirilən xallar buna sübutdu. Komandada qruplaşmalar yaranmışdı. Oynamayan futbolçular ondan narazı idi. Terim komandanı kifayət qədər yaxşı durumda qəbul etmişdi. Əvvəlki məşqçini fanatlar çox sevirdi. O, 2,5 il ərzində çox mühüm işlər görmüşdü. Terimdən sadəcə komandanı bir addım irəliyə daşımaq tələb olunurdu. Ancaq bu aylar ərzində bunu bacarmadı. Komanda əksinə daim geriyə getdi”.
Beləliklə, “Panatinaikos” Terimlə 26 rəsmi oyundan 13 qələbə, 6 heç-heçə, 7 məğlubiyyətlə ayrılmış oldu. Yunanıstan mətbuatının yazdığına inansaq, Afina nəhəngini son turda “Olimpiakos”a, eləcə də kubokun finalında “Aris”ə qarşı oyunlara Xristos Kontis çıxaracaq. 49 yaşlı mütəxəssis Terimdən öncə “Pana”da işləmiş İvan Yovanoviçin köməkçisi idi.
Digər xəbərlər
