“Lisenziyalaşdırma şərtlərinə uyğun olaraq, premyer -liqa və 1-ci Liqa klublarının mətbuat xidmətləri üçün bu seminar təşkil olundu. Seminarda PFL-in texniki-idman direktoru Elgiz Abbasov, AFFA oyun Əməliyyatları Departamentinin rəhbəri Emin Cəfərov , AFFA-nın Lisenziyalaşdırma qrupunun rəhbəri Elçin Məmmədov, “CBC Sport”un proqram direktoru Rüstəm Əfsərli və mən müxtəlif mövzular ətrafında çıxış etdik. Elgiz Abbasov stadionlarda media infrastrukturu, media yanaşma, miks-zona, teleyayınilə bağlı problemlər barədə məlumat verdi. Emin Cəfərov AFFA nümayəndəsinin media ilə bağlı işlər zamanı apardığı qeydləri sadaladı, ölkədaxili yarışlar zamanı ən çox rast gəlinən narahatlıqları nəzərə çatdırdı. Elçin Məmmədov stadionlarda hazırlıq və media nümayəndələrinin davranış planlaması ilə bağlı Avropa təcrübəsi, eləcə də lisenziyalaşdırma zamanı media tələbləri haqqında fikirlərini bölüşdü. Rüstəm Əfsərli yayın prosesi zamanı ortaya çıxan çətinliklərdən bəhs etdi və klub nümayəndələrinin yayınçı şirkətlə əlaqələri ilə bağlı qeydlərini bildirdi. Mən isə klubların mətbuat xidməti ilə AFFA-nın Mətbuat Departamenti arasında əlaqələrin qurulmasından, bunun vacibliyindən danışdım. Yetərincə maraqlı, produktiv bir tədbir oldu. Mənə elə gəlir ki, klubların mətbuat katibləri də bu seminardan çox şey götürdü. Hər biri də tədbir başa çatandan sonra bununla bağlı razılığını vurğuladı. Sonda tədbirdə iştirak edənlərə sertifikatlar təqdim olundu”.

“Bilindiyi kimi, AFFA və PFL-in təşkilatçılığı ilə həm premyer-liqa, həm də 1-ci liqa klublarının mətbuat xidmətləri üçün seminar təşkil olundu. Həmin şəxslər uzun illərdi bu sahənin içindədi və öz işinin bilicisidi. Həm mövsümün son oyunları, həm də növbəti mövsümün tələbləri nəzərə alınaraq, lisenziya şərtlərinə uyğun olaraq, onlar üçün belə bir seminar keçirildi. Onsuz da biz onlarla həm oyunlar zamanı, həm də mövsüm ərzində daimi əlaqədəyik. Belə rəsmi görüşdə bir araya gəlməyimiz xoş oldu. Həm PFL, həm AFFA, həm də yarışların və ölkə kubokunun eksklüziv yayım hüququna malik olan “CBC Sport” kanalının əməkdaşı Rüstəm Əfsərli müəyyən təqdimatlar üzərindən çıxış etdi. Həm təqdimatlar, həm də diskussiyalar maraqlı keçdi. Ümid edirəm ki, hər kəs üçün xüsusi bir görüş oldu. Biz təcrübələrimizi bölüşmək platforması qazandıq. Düşünürük ki, bu, futbolumuzun xeyrinə olan bir seminar idi”.