Mövsüm sona yaxınlaşdıqca avrokuboklar uğrunda mübarizə kəskinləşir.

Ölkəmizi qitəmiqyaslı turnirlərdə təmsil etmək şansını qoruyan komandalardan ikisi “Neftçi Arena”da üz-üzə gəldi. Tarixi Azərbaycan derbisi maraqlı və gərgin alındı. Təbii ki, buna azarkeş amili da öz töhfəsini verdi. “Forza Neftçi” klubun çağırışını qəbul edərək martın 8-dən sonra ilk dəfə tribunalarda yerini almışdısa, “bozqurdlar”ın “Turan Ultras”ı da vacib matçda komandanı tək qoymamışdı.

Oyun meydan sahiblərinin üstünlüyü ilə başladı. “Ağ-qaralar” artıq 15-ci dəqiqədə hesabı açdı. Lebon Ozobiçi zərbə mövqeyinə çıxardı. Təcrübəli futbolçu ilə bu fürsəti boşa vermədi – 1:0. Çox keçmədən “Neftçi” penalti vurmaq hüququ qazandı. Matias başla zərbə endirməyə hazırlaşarkən Qonçalveş onun qarşısını kobudluqla kəsdi. Baş hakim tərəddüd etmədən “nöqtə”ni göstərdi. Topun arxasına zərərçəkən özü keçdi və zərbəni dəqiq yerinə yetirdi. Bayramov topun istiqamətini düzgün müəyyənləşdirsə də, qola mane ola bilmədi. Tovuzluların ilk zərbəsi isə 35-ci dəqiqədə gəldi. Komandanın kapitanı Nəcəfov uzaq məsafədən qapını yoxladı. Lakin Cəfərov sayıqlığı itirmədi. Hissənin sonlarında hücumlarının sayını artıran qonaqlar daha bir dəfə qola yaxın oldu. Hakmanın başla zərbəsinin qarşısını Matias gövdəsi ilə kəsdi.

İkinci hissənin startında “bozqurdlar” daha fəal təsir bağışladı. Hücumların birində Pusinin cinah reydindən sonra ötürdüyü topu Souza qapıdan yan vurdu. 60-cı dəqiqədə isə “Turan Tovuz” azlıqda qaldı. Qonçalveş “Neftçi”nin cərimə meydançası daxilində Haqverdiyə baş zərbəsi endirdi. Həmzəzadə əvvəlcə ona ikinci sarı vərəqəni göstərsə də, VAR-ın müdaxiləsindən sonra vərəqəni ləğv etdi və müdafiəçiyə birbaşa qırmızı vərəqə göstərdi. Rəqibin azlıqda qalmasından istifadə edən “ağ-qaralar” hücumlarının sayını artırdı. 66-cı dəqiqədə Hacıyevin ötürməsini Şinyaşiki zərbə ilə tamamlasa da, Bayramov zərbəni dəf etdi. Lakin epizodun davamında referi VAR-ın müdaxiləsindən sonra epizoda yenidən baxdı və tovuzluların qapısına daha bir penalti təyin etdi. Bu dəfə topun arxasına Rəhman Hacıyev keçdi. Qolkiper yenə topun istiqamətini müəyyənləşdirsə də, bu dəfə də zərbənin qarşısını kəsə bilmədi. 74-cü dəqiqədə meydan sahibləri fərqi 4 topa çatdırmağa yaxın oldu. Salyanskiyin zərbəsi qapıdan aralı keçdi. Son dəqiqələrdə qonaqlar Zülfüqarlı ilə təsəlli qoluna yaxın oldu. Lakin onun zərbəsi dəqiq olmadı.

Beləliklə, inamlı qələbə qazanan “Neftçi” xal sayını 50-yə çatdırdı və yenidən ilk “3-lüy”ə qayıtdı.

Gözdən qaçmadı
* “Forza Neftçi” tribunalara qayıtsa da, vurulan qolların heç birinə sevinmədi.
* Matçın gedişində “Turan Tovuz” azarkeşləri ilə polis əməkdaşları arasında mübahisə yarandı. Fanatlardan biri polis tərəfindən saxlanıldı.
* “Forza Neftçi” “ağ-qaralar”ın şəninə “hər kəsə nəsib olmaz o böyük forma, dəyərini bilərək oyna” şüarını səsləndirirdi.
* “Turan Ultras” etiraz əlaməti kimi pankartını yığışdırdı. Fanatların bir çoxu tribunaları tərk etdi.
* Tovuz azarkeşləri oyunboyu Rəvan Həmzəzadənin qərarlarına etiraz edir, onun ünvanına təhqir səsləndirirdilər.
* Komandasının 3:0 öndə olmasına baxmayaraq, Bojoviç final fitinə qədər sakitləşmədi.

İSMAYIL XEYRULLAYEV