Təbii ki, “Neftçi”nin bu oyunda qələbə qazanacağını düşünməyə əsas verən heç bir əlamət yox idi.

Bakılılar “Qarabağ”a cari mövsümdəki oyunların hamısında uduzmuşdu, azarkeş dəstəyindən məhrum idi. Sadəcə, kuboku qazanmaq, mövsümü titulla bitirmək həvəsi önə çıxmalıydı. Rəqib yenicə növbəti çempionluğu bayram edən, Avropada ad-san qazanan “Qarabağ”dısa, deməli, vəziyyət çətinləşir. Bəlkə də ən yaxşı seçim cütün taleyini cavab görüşünə daşımaq olardı. Amma belə olmadı.

Hər halda, ilk təhlükəli vəziyyəti “Neftçi” yaratdı. Boqomolski Ozobiçin qapı önünə ötürməsini dəyərləndirsəydi, hesab erkən açılacaqdı. Lakin belaruslu hücumçu qeyri-dəqiq zərbə ilə yadda qaldı. Ardından Eddi hücuma keçmək istəyən Yankoviçi kobud qayda pozuntusuyla dayandırdı. Həmzəzadənin təyin etdiyi cərimə zərbəsini məhz Marko yerinə yetirdi. Topun “canlı sədd”in içində olan Yeqorun əlinə toxunması penalti qərarıyla nəticələndi. Rza Toralın zərbəsinin istiqamətini düzgün müəyyənləşdirib qola mane olmağa çalışdı. Amma gec idi. Meydan sahiblərinin növbəti hücumu özünü çox gözlətmədi. Burda Ozobiçin “çərçivə”yə göndərdiyi topa yiyələnmək Lunyov üçün çətin olmadı. “Ağ-qaralar”ın kəsərsiz hücum cəhdləri “Qarabağ”ı irəli atılmağa sövq edirdi. 29-cu dəqiqədə Toral dublunu rəsmiləşdirdi. O, Benzyanın qapıya paralel ötürməsini qolla tamamladı. Qeyd etmək vacibdi ki, “Neftçi”nin müdafiə xəttindəki başıpozuqluq gözdən qaçmırdı. Xüsusilə Koffi, Haqverdi və Azər etibarsız çıxışıyla seçilirdi. Birinci hissənin sonuncu kritik epizodu 37-ci dəqiqəyə təsadüf etdi. Belə ki, Elvin Bədavinin uzaqdan sol cinaha göndərdiyi topla xeyli irəliləyib Zubiri “gördü”. Toral fransalı yarımmüdafiəçinin qapı önünə ötürməsini dəyərləndirmək istədi ki, başla zərbəsi yaxşı alınmadı. Ardından Matias özünü meydanda qalan topa çatdırmaq uğrunda mübarizədə Yankoviçə uduzdu. Monteneqrolu Azəri çox asanlıqla keçərək “çərçivə”ni dəqiq nişan aldı. Əlbəttə, Toral Elvinin ötürməsiylə ələ keçən fürsətdən yararlansa, dördüncü qola da şahidlik edə bilərdik. Lakin birinci hissənin sonları Lunyovun Morenonun qol vurmaq istəyinə mane olması və Elvinin qapı tirindən qayıdan zərbəsiylə yadda qaldı.

Fasilədən sonra həm oyunun tempi aşağı düşdü, həm də “Neftçi” daha çox hücum etməyə çalışdı. Düzdü, “Qarabağ”ın hücumları daha təhlükəli alınırdı. Əvvəl Veşoviçin baş zərbəsi qapıdan xeyli aralı keçdi. Sonra Juninyo komandasının dördüncü qoluna imza atmaq şansını qaçırdı. Daha dəqiqi, Rza üzərinə gələn topu asanlıqla saxladı. “Neftçi”nin qapıçısı çox keçmədən Zubirin zərbəsini zərərsizləşdirdi. Meydan sahiblərinin iki ardıcıl hücum cəhdi isə uğursuzluğa düçar oldu. Emin Romao səddini keçə bilmədiyindən top meydanı tərk etdi. Lebona gəlincə, fransalı yarımmüdafiəçiyə Lunyovun cəldliyi imkan vermədi. Bu ərəfədə Juninyo yaxşı fürsəti qaçırdı. Braziliyalı bu dəfə də həlledici zərbəni istədiyi kimi vura bilmədi. “Qarabağ” 4-cü qolu vurmaq niyyətindən əl çəkmirdisə, “Neftçi” təsəlli qolu üçün tər tökürdü. Bu anda Rəhman Lebonun yaxşı ötürməsini boşa verdi. Növbəti cəhd “köhlən atlar”dan gəldi. Lakin Leandro Elvinin ötürməsindən faydala bilmədi, top qapıdan aralı keçdi. Nəhayət, 86-cı dəqiqədə 4-cü qoli vuruldu. Leandronun cərimə meydançasına göndərdiyi topu Nəriman tora qovuşdurdu. Onun qarşısını almaq istəyən Azər Rzaya da mane oldu. Nəticədə ikisi də yerdə qaldı. Topa son toxunuş isə Axundzadədən idi. Sonuncu dəqiqədə Rza Keytanın zərbəsini dəf etdi.

Hakimin start fiti “Neftçi”nin biabırçı məğlubiyyətini və “Qarabağ”ın cütün taleyinə böyük ölçüdə aydınlıq gətirməsini rəsmiləşdirdi. Bu cütdə cavab görüşünü keçirməmək də olar!

KƏNAN BAHADIR

Gözdən qaçmadı
* Komandalar meydana autizm sindromlu uşaqlarla çıxdı. Şüar “Autizmin fərqindəyik, onların yanındayıq” idi.
* “Neftçi”nin ən böyük fanklubu “Forza Neftçi” yenə tribunalarda yox idi. “Qarabağ”ı “İmarət”, “1951”, “Ultras 2009”, “Fanatics”, “Qarabağ Hooligans” fanklubları dəstəkləyirdi.
* 66-ci dəqiqədə Benzya ilə İsrafilov arasında qalmaqal yaşansa da, komanda yoldaşları futbolçuları sakitləşdirdi. Düzdü, sonradan əlcəzairli meydanı tərk edərkən Eddi ilə görüşdü, münasibətləri yoluna qoydu.
* Matç bitəndən sonra meydana kənar şəxslər çıxdı. Tərəfdarlara soyuq münasibət göstərən Elvin Cəfərquliyevdən fərqli Bəhlul Mustafazadə onlardan birinə formasını bağışladı, şəkil çəkdirdi.

RÖYANƏ OĞUZ