Superliqada liderliyi davam etdirən və tarixinin 24-cü çempionluğuna doğru gedən “Qalatasaray”da dünən mühüm olay yaşandı.

“Football-plus.az” xəbər verir ki, buna imza şousu demək daha düzgün olar. Çünki mövcud heyətdə yer alan 5 futbolçu ilə yeni müqavilələr imzalandı. Söhbət Fernando Muslera, Lukas Torreyra, Əbdülkərim Bardakcı, Barış Alpər Yılmaz və Kaan Ayhandan gedir. “Rams Park” stadionunda keçirilən imza mərasimində başqan Dursun Özbək və başqan vəkili Ərdən Timur da iştirak etdi. Özbəyin Əbdülkərim Bardakcı haqda danışarkən “Fənərbaxça” prezidenti Əi Koça söz atması diqqətdən qaçmadı. Özbək “sən bir çoxlarını susdurdun. Performansınla bəzilərini peşman etdin. Biz sənə bir an da şübhə etmədik. Önündə hələ uzun və uğurlu illər var. Sənə təşəkkür edirik” ifadələrini işlətdi. Bardakcı da öz növbəsində başqana minnətdarlıq edərək bu klubun bir parçası olmağı ilə qürur duyduğunu dedi. O, gəldiyi gündən bəri əfsanələr sırasına düşmək niyyətində olduğunu və bu hədəfə doğru əmin addımlarla irəlilədiyini vurğuladı. Qeyd edək ki, 29 yaşlı mərkəz müdafiəçisi 2022-nin yayında “Konyaspor”dan ayrılandan sonra “Fənərbaxça”ya keçməyin biraddımlığında idi. Hətta tərəflər arasında ilkin razılıq da əldə olunmuşdu. Amma danışıqların son mərhələsində Əli Koçla bu futbolçunun münasibətləri pozuldu. Koçun “illik nə qədər istəyirsən” sualına Bardakcı “20 milyon lirə” cavabını verdi. Bu da həmin dönəmdəki pulla 1 milyon avroya bərabər idi. “Fənərbaxça” başqanının “səncə, bu pula layiqsənmi” sualından sonra Bardakcı danışıqlar masasından ayrılmış və bir neçə gün sonra “Qalatasaray”a transfer olunmuşdu. Hələ ki bu futbolçulardan yalnız Musleranın müqaviləsinin detalları məlumdu. Klubda 13-cü mövsümünü keçirən qapıçı ilə birillik yeni müqavilə imzalanıb. Başqa müqavilələrin detalları daha sonra rəsmən mətbuata açıqlanacaq.