Həftəsonu Türkiyə futbol ictimaiyyətinin diqqəti Şanlıurfaya yönəlmişdi.

“Football-plus.az” xəbər verir ki, ötənilki zəlzələdən zərər görmüş şəhərlərdən olan Şanlıurfada Türkiyə superkubokunun qalibi müəyyənləşməliydi. Amma futbol ictimaiyyəti iki əzəli rəqibin meydandakı mübarizəsini yox, tam fərqli şeylər izləmək məcburiyyətində qaldı...

“Fənərbaxça” dediyini etdi və meydandan çəkildi
Bilindiyi kimi, “Fənərbaxça” bu oyuna U-19 komandası ilə çıxacağını əvvəlcədən açıqlamışdı və İstanbul nəhəngi sözünün üstündə durdu. Aprelin 7-də, yəni oyun günü “Fənər”in U-19 komandasının öz oyunu var idi. Türkiyə Futbol Federasiyası həmin matçı təxirə salmadığından oyun baş tutdu. “Sarı-lacivərdlilər” “Girəsunspor”lu həmyaşıdlarını 4:1 məğlub etdilər. 19 yaşa qədər futbolçular bu oyunun ardından bəlkə də həyatlarının sonuna qədər unutmayacaqları bir olayın iştirakçısına çevrildilər. Bu komandanın 15 üzvü, başqan Əli Koç və digər yönəticilərlə birlikdə təyyarə ilə Şanlıurfaya yollandı. Maraqlıdı ki, superkuboku izləməyə Türkiyə Futbol Federasiyasının prezidenti Mehmet Büyükekşi ilə yanaşı, gənclər və idman naziri Osman Aşkın Bak da gəlmişdi. Görəsən, onlar “oyundan” zövq aldımı?!

Daha öncə “Fənərbaxça”nın U-19 komandasının meydana 9 futbolçu ilə çıxacağı iddia edilmişdi. Amma belə olmadı. Hər iki komanda meydana 11 futbolçu ilə çıxdı. Bu məqamda sizi heyətlərlə də tanış edək. “Qalatasaray”ın “11-liy”ində bu futbolçular yer aldı: Muslera, Kaan Ayhan, Nelsson, Əbdülkərim Bardakcı, Kön, Torreyra, Berkan Kutlu, Barış Alpər Yılmaz, Mertens, Kərəm Aktürkoğlu, İkardi. “Fənərbaxça”nın gənclərinə də diqqət yetirək (kim bilir, bəlkə də gələcəkdə onlardan biri dünya ulduzuna çevriləcək): Furkan Onur Akyüz, Mustafa Akyıldız, Yusuf Akçiçək, Ümitcan Okan, Muhammet İmre, Efecan Karayazı, Əmirhan Arkutcu, Muhammet Zəki Dursun, Çağrı Fedai, Kərəm Kayaarası, İbrahim Dəmirəl.

Hakim Volkan Bayarslanın start fiti ilə “Qalatasaray” oyuna mərkəzdən başladı. “Cim-Bom” 50 saniyə topu özündə saxladı. 16 ötürmənin verildiyi bu müddət ərzində yalnız iki futbolçu – Kərəm Aktürkoğlu ilə Muslera topa toxunmadı. 1 dəqiqə tamam olmamış Bardakcı topu irəli vurdu. Barış Alpər Yılmazın başla ötürməsindən sonra İkardi çətin vəziyyətdə olmasına baxmayaraq, topu tora göndərdi. Maraqlıdı ki, komanda yoldaşları İkardinin başına toplaşaraq onu bu qola görə təbrik etdilər. Qoldan sonra “Fənər”li gənclər oyuna mərkəzdən başlamadılar. Onlar ehtiyat zonada dayanmış idarə heyətinin üzvü Ahmet Ketencinin göstərişi ilə meydanı tərk edərək paltardəyişmə otağına yollandılar. Bu sırada İkardi başda olmaqla bəzi “Qalatasaray”lı futbolçuların onları alqışlaması diqqəti çəkdi. Bundan sonra “Qalatasaray”lı futbolçular böyük coşqu və sevinc yaşayaraq, bu “zəfəri” normal qazanılan bir qələbə kimi qeyd etməyə başladılar. Bu sırada “Fənərbaxça” başqanı Əli Koç VİP-lojadan qalxaraq tribunadakı “Fənərbaxça” fanatlarının yanına getdi. Maraqlıdı ki, “Qalatasaray”lılar daha sonra meydanda ikitərəfli oyun keçirdilər. Fanatlar da təzahüratlarla onlara dəstək verdilər. TFF-nin uzağı bir həftə ərzində bu oyunla bağlı qərarını açıqlayacağı gözlənilir. Əslində isə hər şey bəllidi: “Fənərbaxça”ya texniki məğlubiyyət, “Qalatasaray”a superkubok veriləcək. Beləcə Türkiyə cümhuriyyətinin 100-cü ildönümünə həsr edilən bu başıbəlalı superkubok ölkənin futbol tarixinə qara ləkə kimi düşdü. Qısaca xatırladaq ki, superkubok hələ dekabrın sonlarında Səudiyyə Ərəbistanında oynanılmalı idi. Amma o vaxt ərəblərin Atatürkə hörmətsizlik etməsi üzündən “Fənərbaxça” ilə “Qalatasaray” meydana çıxmaqdan imtina etmişdi. Federasiya daha sonra uzun müddət oyunun yeni tarixini müəyyənləşdirməklə bağlı çətinlik yaşadı. 7 aprel tarixi “Fənərbaxça”nı qane etmədi. Çünki aprelin 11-də “sarı-lacivərdlilər”i Konfrans Liqasında “Olimpiakos”la oyun gözləyir. “Fənər”in superkubokun tarixinin dəyişdirilməsi ilə bağlı tələbi TFF tərəfindən rədd olundu. Belədə həm də Trabzonda yaşanan son olaylar üzündən acıqlı olan “Fənərbaxça” superkubokdan imtina etdi.

İkardi derbinin tarixinə düşdü
U-19 komandasının meydandan çəkilməsinin ardından “Fənərbaxça”dan bu cür bir bəyanat gəldi:

“Fənərbaxça”lı idman yazarı Gürcan Bilgiçin iddiasına görə, komanda Şanlıurfada meydan çıxmasaydı, 11 milyon avro təzminat ödəmək məcburiyyətində qalacaqdı! Bura reklam anlaşmaları, bilet pulları, stadionun xərci, yayın anlaşmalarından əldən çıxan pullar daxil olacaqdı. Məhz buna görə “Fənər” oyuna U-19 ilə çıxmalı oldu. Şayiələrə inansaq, superkubokun yayın haqqını alan və bunun qarşılığında TFF-yə pul ödəyən bir çox ölkənin kanalı pulunu geri tələb edib.
Superkubokdakı biabırçılıq Almaniya, Fransa, Rusiya, İsveçrə, Bolqarıstan, Niderland, Polşa, Monteneqro, Xorvatiya, Avstriya, Şimali Makedoniya, Serbiya, Sloveniya kimi Avropa ölkələrindən başqa bir sıra Yaxın Şərq və Afrika ölkələrində də yayınlandı. Avropanın aparıcı idman nəşrləri də bu olaya biganə qalmadılar.
Yeri gəlmişkən, budəfəki derbi cəmi 1-2 dəqiqə davam etsə də, tarixə düşməyi bacardı. Məsələn, İkardi 50-ci saniyədə qol vurmaqla 115 illik bu rəqabətdəki ən erkən qolun müəllifi oldu! Buna qədər bu derbinin tarixində ən erkən qolu Mirzə Seydiç vurmuşdu. Bosniyalı futbolçu 1984-cü il aprelin 8-də “Əli Sami Yen”də keçirilən çempionat derbisinin 55-ci saniyəsində fərqlənməklə “Qalatasaray”ı hesabda önə keçirmişdi. Həmin görüş 1:1 hesabı ilə başa çatmışdı. Bundan başqa, iki əzəli rəqibin oyunu 90 illik fasilədən sonra ilk dəfə yarımçıq dayandırıldı! Bu hal sonuncu dəfə 1934-cü il fevralın 23-də İstanbul Liqası çərçivəsindəki oyunda baş vermişdi. O vaxt “Taksim Stadionu”ndakı derbinin 60-cı dəqiqəsində iki klubun futbolçuları əlbəyaxa olmuşdu. Fanatların meydana axışması ilə olaylar böyümüş və oyun yarımçıq dayandırılmışdı. Həmin vaxt “Fənər”in 9, “Qalatasaray”ın 8 futbolçusuna uzunmüddətli cəza verilmişdi. Bu arada “Fənərbaxça”nın idarə heyətinin sədri Uğur Dündarın paylaşımı diqqəti çəkib. O, “instaqram”da “Qalatasaray”ın əfsanəsi Mətin Oktayın uzun illər öncə derbidə çəkilmiş bir şəklini paylaşaraq bunları yazıb: “Bütün futbolsevərlərin könlündə taxt qurmuş “tacsız kral” ləqəbli Mətin Oktay yaşasaydı və dünənki oyunda kapitan olsaydı, ilk dəqiqədə ayağına gələn o topu qapıya vurmaq əvəzinə auta göndərərdi! Bundan başqa, komanda yoldaşlarının sanki çətin oyundan sonra kubok qazanıblarmış kimi sevinmələrinə mane olardı. Çünki “Fənərbaxça”lılar bu addımı tək özlərinə görə atmadılar. Bu, federasiyanın ədalətsizliyinə qarşı bütün klubların mənafeyini qorumaq üçün atılmış bir addım idi. Hər halda, insan durduğu yerdə “tacsız kral” adını qazanmır. Məkanı cənnət olsun”.