“İdman direktoru dəyişə bilər” – liqanı tərk etmək üzrə olan komandanın baş məşqçisi
1-ci liqada millinin oyunlarıyla bağlı yaranan fasilə başa çatmaq üzrədi.
Martın 28-də başlayacaq 19-cu turun oyunlarıyla cari mövsüm qaldığı yerdən davam edəcək. Növbəti 9 turdan sonra çempionla yanaşı, 1-ci liqanı tərk edəcək komandanın da adına aydınlıq gələcək. Hələ ki sonuncu pillədə "Araz Saatlı" qərarlaşıb. Bölgə təmsilçisi 4 xalla sonuncu yerdədi və özündən əvvəlki "Difai Ağsu"dan 8 xal geri qalır.
Görəsən, komanda çətin durumdan xilas olmaq üçün hansı addımları atacaq? Ümumiyyətlə, 1-ci liqa yerini qorumağa inamı varmı?
"Araz Satlı"nın baş məşqçiqi Rüfət Quliyevin "Football-plus.az"a söylədikləri:
"18-ci tur matçından sonra komandaya istirahət vermişdik. Martın 22-də bir araya gəldik və məşqlərə başladıq. Təəssüf ki, mövsüm ərzində qələbəsizlikdən əziyyət çəkirik. Üstün oynadığımız oyunlarda belə 3 xal qazana bilmirik. Turnir cədvəli baxımından üzərimizdə ciddi təzyiq var. Son 9 tura köklənmişik. Fasilədən sonra ilk görüşdə qalib gəlib komandaya qələbə ruhu aşılamaq istəyirik. İnşallah, tezliklə "qara zolaq" geridə qalacaq. Gələcək haqda nə deyə bilərəm? Hələ ki heç nə. Bu haqda danışmaq çox çətindi. İşimizi layiqincə görməliyik ki, 1-ci liqanı tərk etməyək".
Rüfət bəy fasilə zamanı yoxlama oyunları keçirmək niyyətində olsalar da, alınmadığını bildirdi:
"Şamaxı"dan bu yöndə müraciət daxil olmuşdu. Lakin futbolçular istirahətdə olduğundan razılığa gələ bilmədik. Daha sonra "İmişli" ilə anlaşdıq. Bu dəfə də onlar son anda imtina etdi. Ümumiyyətlə, heyətdə zədəli və cəzalı futbolçular da var. Çətinliklərə baxmayaraq, ən yaxşı oyunumuzu göstərib hədəfə çatmaq istəyirik. Bununla belə, dəqiq məlumat olmasa da, idman direktorumuz dəyişə bilər. Tezliklə bu məsələyə də aydınlıq gələcək".
Qeyd edək ki, "Araz Saatlı" martın 28-i Saatlı Olimpiya İdman Kompleksinin stadionunda "Mingəçevir"i qəbul edəcək.
KƏNAN BAHADIR
Digər xəbərlər
