Artıq Çempionlar Liqasında (ÇL) 1/8 final arxada qalıb.

"Football-plus.az" xəbər verir ki, bu mərhələnin qəhrəmanları sırasında David Raya da var. O, “Arsenal” – “Portu” cavab oyununun ən yaxşı oyunçusu seçilib. Davidin UEFA-nın versiyasına əsasən hamını arxada qoyması heç də təsadüfi deyil. Londonluların qapıçısı əsas və əlavə vaxtı 1:0 hesabıyla nəticələnən matçdan sonra zərurətə çevrilən penalti seriyasında rəqibin iki zərbəsinin qarşısını alıb. İndi 28 yaşlı Rayanın İspaniyadan İngiltərəyə və ən əsası “Arsenal”a qədərki yoluna nəzər salacağıq.

Maraqlı paralellər
2023-cü ilin martıdı, Avropa Liqasının (AL) 1/8 finalının cavab oyununda “Arsenal” evdə “Sportinq”i qapısına sıxıb. Amma londonlular nə qədər çalışsalar da, əsas vaxtda qaliblə bağlı suala cavab tapa bilmədilər: mübarizə penalti seriyasına qədər uzandı. Əvvəlcə hər şey ev sahibləri üçün yaxşı gedirdi, amma portuqalların qapıçısı Adan Martinellinin o qədər də güclü olmayan zərbəsini dəf etdi. Nunu Santuş isə “Sportinq”in seriyada 5:3 hesablı qələbəsini rəsmiləşdirdi. Ramsdeyl 5 zərbənin heç birini dəf edə bilmədi və bununla da “topçular” üçün avrokubok mövsümü sona çatdı.
Halbuki “Arsenal” ötən mövsümün 3-cü turundan başlayaraq premyer-liqada inamla liderlik edirdi. Sanki AL-dəki uğursuzluq Mikel Artetanın komandasına daxili yarışda mənfi təsir etdi. Londonlular tədricən lider mövqeyindəki qüdrətini itirməyə başladılar. İngiltərə çempionatının son 11 oyununda yalnız 5 qələbə qazanan “Arsenal” əvvəlcə liderliyi, sonra isə çempionluq şansını əldən verdi.

2024-cü ilin martıdı, ÇL-in 1/8 finalının cavab oyununda “Arsenal” evdə yenə Portuqaliya klubu ilə qarşılaşır. Bu dəfə rəqib daha təcrübəlidi, qitənin aparıcı liqalarından olan zəngin klublara tez-tez badalaq vuran “Portu”du. İşə bax ki, londonlular nə qədər çalışsalar da, yenə əsas vaxtda qaliblə bağlı suala cavab tapa bilmədilər: mübarizə bir il əvvəl olduğu kimi penalti seriyasına qədər uzandı. Qeyd edək ki, “Arsenal” ötən bir il ərzində yalnız mental cəhətdən bərkiməmiş, həm də heyətdəki bir qədər zəif olan boşluqları doldura bilmişdi. “Portu” üzərində qələbədə məhz komandaya “Brentford”dan transfer olunan Raya daha böyük rol oynadı. İspaniyalı qapıçı Vendell ilə Qalenonun zərbələrini dəf etməklə penalti seriyasının və matçın qəhrəmanı oldu. İngiltərə klubu onun qapıçılıq bacarıqları sayəsində ÇL-də 14 ildən sonra ilk dəfə 1/4 finalda oynamaq hüququ qazandı!

Futzalda başlayan iddialı karyera
Yəqin ki, Davidin “Arsenal”a hansı səbəbdən gətirildiyi bəzilərinə məlumdu. Artetanın Ederson kimi hücumu başlamaq və cərimə meydançasından kənara çıxmaq cəsarətinə malik qapıçıya ehtiyacı vardı. Remsdeyl mövsümü ümumilikdə çox yaxşı keçirsə də, baş məşqçini bu planlarda məyus etmişdi. Sonda londonluları qabaqlamaqla yenə çempion olan “Mançester Siti”nin çalışdırıcısı Xosep Qvardiolaya bu baxımdan qibtə etməyə dəyərdi: Pep üçün Edersonun qeyd etdiyimiz bacarıqları hətta braziliyalının qapı xətti üzərindəki oyunundan daha vacibdi.

David bu parametrlərə uyğun gəlirdi. Hə, o, həm də Arteta kimi ispaniyalı idi (ümumiyyətlə, ispaniyalı qapıçılar topla əla rəftar etməsi ilə də tanınırlar, amma bu fikir De Xeaya aid deyil...). “Arsenal”ın gənc çalışdırıcısı, yəqin ki, Rayanın hazırkı səviyyəyə yalnız milli koduna yox, böyük zəhməti hesabına çatdığını da nəzərə almamış deyildi. Qəhrəmanımız futbolun sirlərini “Kornelya” akademiyasında öyrənməyə başlayıb. Maraqlıdı ki, paralel olaraq futzalda özünü sahə oyunçusu kimi də sınayıb. Özünün dediyinə görə, qapıya böyük qardaşının məsləhəti ilə keçib. Amma David həmişə futbolu əlləri yox, ayaqları ilə oynamağı xoşlayıb. Hə, o, böyük bədən ölçüləri ilə də seçilməyib: boyu 183 santimetrə qədər uzanıb ki, bu da qapıçı üçün çox da böyük göstərici sayılmır. Amma ambisiyalı oğlanın əlcəklərə meyli getdikcə artırdı: Kasilyasın “Real”da sərgilədiyi möhtəşəm oyunundan xüsusi ləzzət aldığını etiraf edirdi. Hərçənd Barselonadan 20 mil aralıda yaşayırdı...

Rayanı 2012-ci ildə “Blekbern”ə dəvət etdilər: “Kornelya”nın məşqçisi ingilislərə stedadlı qapıçıdan danışmışdı. Nəticədə David 4 günlük baxışa çağırıldı. Və həmin andan İngiltərədə qərar tutdu. Etiraf edir ki, “Blekbern”ə gərək olmasaydı, futbolu menecmentliyə dəyişəcəkdi.

2014-cü ildə peşəkar səviyyədə debüt etdi. Amma buna icarə əsasında oynadığı “Sautport”da nail oldu. Tədricən kiçik addımlarla “Blekbern”in əsas heyətinə də yaxınlaşdı. Bu kluba 5 il müddətində məxsus oldu. Nəhayət, “Brentford”a satıldı. Yeni komandaya faydalı olan futbolçu ilk mövsümdəcə “London Football Awards” təşkilatının “İlin qapıçısı”, çempionşipdəki uğurlu çıxışı ilə həm də “Qızıl əlcək” mükafatına layiq görüldü. Bir ildən sonra artıq premyer-liqada idi: “Brentford” tarixində ilk dəfə bu liqada oynamaq hüququ qazandı!

Tomas Frankın çalışdırdığı komanda ən yüksək liqadakı ilk mövsümdə bir sıra böyük nəticələrə nail oldu. İlk matçdaca “Arsenal”la derbidə qalib gəldi, bir aydan sonra “Liverpul” ilə başgicəlləndirici oyunda superməhsuldar heç-heçəyə (3:3) nail oldu. Mersisaydlıları çalışdıran Yürgen Klopp topu qapısından üç dəfə çıxarmasına baxmayaraq, Rayanın oyunu haqda bunları qeyd etməyi lazım bilmişdi:

Ağır zədə və daha güclü dönüş
“Brentford” Avropada 2021/22 mövsümünün əsas kəşflərindən biri oldu. Rayanın adı isə ən yaxşı qapıçıların sırasında çəkilirdi. Amma 2021-ci ilin oktyabrında aldığı zədə işləri korladı: David “Lester”ə qarşı oyunda özünü heç nədən çəkinmədən Ayose Peresin ayaqlarının qarşısına atdı. İspaniyalı əvvəlcə bir neçə həftədən sonra sıraya dönəcəyinə ümid edirdi, lakin sonradan ona dizindəki zədəyə görə təxminən 4 ay səbir etməli olacağı bildirildi. Gənc futbolçu həmin dövrü belə xatırlayır:



David 2022-ci ilin fevralında meydana daha güclü qapıçı kimi döndü. Və bu, yalnız frazeologizm deyil:

o, real şəkildə daha özünəəmin və zəhimlə oynamağa başladı. Və martda İspaniya yığmasında debüt etdi. Bundan sonra ölkəsinin əsas komandasının daimi üzvü sayılmağa başladı. Zarafat deyil, Qətərdə keçirilən DÇ-2022-yə yollandı və Millətlər Liqasının qalibi oldu. Bu yerdə ən əyləncəli məqamı da yada salaq. O, sıraya dönəndən sonrakı ilk məşqə tirannozavr kostymunda gəldi. Əlbəttə, belə görkəmi ilə komanda yoldaşlarını əməlli-başlı əyləndirdi. Maraqlıdı ki, “Arsenal”ın maskotu da tirannozavrdı! Bəlkə də, qapıçı Artetaya hansısa xüsusiyyətini məhz bu şəkildə nümayiş etdirməyi lazım bilmişdi...

Bəli, ispaniyalı mütəxəssis onun səhv etmək qorxusundan uzaq olmasını da bəyənmişdi. Davidin bu fəlsəfi fikri ilə tanış olmağa dəyər:



“Brentford” MS-yə qarşı oynayarkən qapıçı səhvən ötürməni Sterlinqə verdi. Rahimin zərbəsini dəf etsə də, De Bruyne topu tora göndərdi. Məşqçilərin bəlkə də 99 faizi belə səhvinə görə əlcək sahibini satqın yerinə qoyub ehtiyata atardı, amma Frank heç də belə etmədi.

Əsas odu ki, Raya uşaqlıq hədəfi (arzusu deyil, məhz hədəfi) olan premyer-liqada oynamağı reallaşdırmışdı. Amma hədəflər getdikcə dəyişir. Yəqin ki, indi premyer-liqada çempionluğa can atır. Yeri gəlmişkən, son turda “Liverpul” – MS matçının heç-heçə (1:1) nəticələnməsi “Arsenal”ın topların daha yaxşı fərqinə əsasən 1-ci yerə yüksəlməsinə şərait yaradıb. Bir il əvvəl londonluların penalti seriyasında “Sportinq” üzərində qələbə üçün Davidə ehtiyac duyduqlarına işarə vurmuşduq. Ola bilsin ki, premyer-liqada qızıl medallar ayağı ilə də əla oynayan qapıçının yoxluğuna görə əldən verilmişdi...

Səbəbkardan sitat