UEFA AFFA-nın hansı müraciətini üç dəfə qəbul etmədi?
Milli komandamıza dəstək olacaq yeni fanklubun - “Göyqurd”un yaradıldığını yazmışdıq.
Azarkeş qrupunun rəhbəri Elnur Şərifli "Football-plus.az"a planlar və qaydalar haqda danışmışdı. Bununla yanaşı, ilk iştirak edəcəkləri matçın AÇ-2024-ün seçmə mərhələsi çərçivəsində keçiriləcək Azərbaycan – İsveç oyunu olacağını demişdi. Bilindiyi kimi, həmin oyun bu gün axşam 21.00-da Tofiq Bəhramov adına Respublika stadionunda start götürəcək.
Maraq üçün xatırladaq ki, yığmamız bu arenada sonuncu dəfə düz bir ay əvvəl – oktyabrın 16-da Avstriya ilə qarşılaşıb və 0:1 hesabıyla uduzub. Həmin oyunu cəmi 4446 azarkeşin izləməsi isə millimizin növbəti fiaskosu kimi qiymətləndirilib. Əlbəttə, acı mənzərə heç kimin gözündən yayına bilməzdi və belə də oldu. Məhz “Göyqurdlar” da bunun şahidi kimi ortaya çıxdı və azarkeşlərin əvvəllər yaratdığı maraqlı ab-havanı tribunalara qaytarmaq niyyətində olduğunu açıqladı. Bəs azarkeş qrupu yığmamızın İsveç sınağına necə hazırlaşıb? Fanklub millimizə necə dəstək olmağı planlaşdırır? Bu qrupun geridönüşü azalmış marağı bərpa edə biləcəkmi? Bu suallarla dünən yenidən Elnur bəylə əlaqə saxladıq. O, matç üçün çox ciddi hazırlıq gördüklərini, həmçinin AFFA və UEFA arasında bu yöndə bir neçə dəfə anlaşmazlıq yaşandığını dedi. Sizi fanklub rəhbərinin fikirləriylə ətraflı tanış edirik:
“Hər birimiz tam məsuliyyətlə oyuna hazırlaşırıq. Əvvəlki günlərdəki kimi, tribunaları canlandırmağa çalışacağıq. 11-ci sektoru tam dolduracağıq. Bütün yerlər bizimdi. Bu gün üçün ən çətin işimiz xoreoqrafiya yaratmaqdı. İndiyə qədər buna 3 dəfə cəhd etsək də, UEFA AFFA-nın bu yöndə müraciətlərini qəbul etmədi. Nəhayət, 4-cü dəfə dəyişiklik edəndən sonra qurumdan razılıq ala bildik. Halbuki xoreoqrafiyada siyasi motivlərin olmamasına xüsusi diqqət yetirmişdik. Onlar sözün əsl mənasında tərəfkeşlik edib layihəmizi rədd edirdi. Guya səbəb kimi millətçiliyin olduğunu deyildi. Yığmamızın oyununda başqa nə olmalıydı ki?! Bu üzdən hazırlıq prosesinə çox gecikdik. Məncə, nələr edəcəyimizi açıqlamaq düzgün olmaz. Yaxşı olar ki, daha maraqlı olması üçün hər şeyi ilk dəfə məhz tribunada göstərək. Söz düşmüşkən, “Neftçi” rəhbərliyinə təşəkkür etmək istəyirik. Çünki xoreoqrafiyanı hazırlaya bilmək üçün “Neftçi Arena”nın dayanacağında bizə yer verdilər. İndi ora yollanırıq ki, işləri görək”.
Elnur bəy azarkeşlərlə bağlı məsələlərə də toxundu:
“Futbolsevərlərin millinin oyunlarına marağının az olduğunu bilirik. Biz də elə bu məqsədlə geri döndük ki, nəyisə dəyişək. Daha əvvəl də dediyim kimi, ciddi qayda və tələblərimiz var. Məsələr, heç bir tərəfdar oyunboyu otura bilməz. Sona qədər ayaqüstə qalmalı və nəticədən asılı olmayaraq, tam dəstəyini ifadə etməlidi. Bizə millini sevən insanlar lazımdı ki, sıralarımıza qoşulsun və futbolçular meydanda azarkeş sevgisi hiss etsin. Çox güman, bu halda onların performansında müəyyən dəyişikliklər olacaq. İnşallah, biz tərəfdən xeyli adam tribunalarda yerini tutacaq. Sağ olsunlar, köhnə dost-tanış da bir nəfər kimi bizə qoşulub. Hamısı görüləcək işlərə bələddi. “Sektor 11” adını eşidənlər əlaqə saxlayır və yanımızda olacaqlarını deyirlər. Hər birinə təşəkkür edirəm. Gün ərzində tribunalara daha çox adamın cəlb edilməsi üçün çalışacağıq. Biz millimizi əzizləmək, sahib çıxmaq istəyirik”.
Fanklub rəhbəri komandamızın İsveçlə oyunundan gözləntilərini belə ifadə etdi:
“Əlbəttə, millimizə qələbə yaraşır. Belə olacağını hiss edirəm. Ola bilsin ki, rəqib oyuna ciddi yanaşmadı, ümumiyyətlə, meydana əsas heyətlə çıxmadı. Bu halda qələbəmiz daha da asanlaşa bilər. Həm də İsveçin hansısa iddiası olduğunu zənn etmirəm. İstəməzlər ki, belə oyunda güclü futbolçuları zədələnsin. Yığmaya inanırıq və həmişə son saniyəyə qədər dəstək verəcəyik”.
Əşrəfli yığmanın məğlubiyyəti halında Canni de Byazinin istefasını tələb edib-etməyəcəkləri haqda sualı da cavabladı:
“Yığmamızın son ev oyunu olduğu üçün belə şey planlaşdırmamışıq. Stadiona qayıdış günümüzün müsbət təəssüratlarla yadda qalmasının tərəfdarıyıq. Düzdü, De Byazidən razı deyilik və buna heç kimin haqqı yoxu. İndiyə qədər qazanılan nəticələr, uğursuzluqlar haqda yaxşı danışmaq mümkün deyil. Ümid edirəm ki, AFFA bu yöndə lazımi addımları atacaq. Hər şey göz qabağındadı və hamı öz işini yaxşı bilir”.
Göründüyü kimi, “Göyqurdlar” azarkeş qrupu kimi öhdəsinə düşən vəzifələri icra etməyə çalışacaq. Bunun nə dərəcədə alınacağını isə bu gün görəcəyik. Hər halda, dünən səhər saatlarında AFFA-nın mətbuat xidmətinin rəhbəri Elnur Məmmədlidən aldığımız məlumata görə, 4 minə yaxın bilet satılmışdı. Statistikaya əsasən, millimizin oyununda anşlaq olacağı gözlənilmir. Çox güman, kollektiv yenə, demək olar ki, boş tribunalar qarşısında çıxış edəcək. Təbii ki, gün ərzində fantastik sayda bilet satılmasa...
Hər ehtimala qarşı matçı izləmək istəyən, lakin hələ də bilet almayan şəxslər üçün daha bir məlumatı təqdim edək. Biletlərin qiyməti 3-cü kateqoriya üçün 5, 2-ci kateqoriya üçün 10, 1-ci kateqoriya üçün 15 manat təşkil edir. VİP biletlər isə 30, 50 və 200 manatdı. Azarkeşlər Gənclik Mall, 28 Mall, Heydər Əliyev Sarayının kassası, Köşk No1 (Sahil m. M.Ə.Rəsulzadə 3), Köşk No2 (Bülbül prospekti, Nizami küç.), 1 Saylı ASAN xidmət mərkəzi, 2 Saylı ASAN xidmət mərkəzi, 3 Saylı ASAN xidmət mərkəzi, 4 Saylı ASAN xidmət mərkəzi və 1 Saylı Sumqayıt Regional ASAN xidmət mərkəzindən bilet ala bilər.
KƏNAN BAHADIR
Digər xəbərlər
