Cümə ertəsi günü ölkə futbolu adına növbəti tarixi günə şahidlik etdik.

Tarixində ilk dəfə 1/8 finala vəsiqə qazanan “Qarabağ” “Bayer-04”lə üz-üzə gəldi. Bəli, bu ad heç də yad deyil. Çünki, “aspirinlər”lə bu mövsüm qrup mərhələsində 2 dəfə qarşılaşmış və hər ikisində məğlub olmuşduq. Budəfəki matçın da aşkar favoriti bəlli idi. Fəqət pley-offda da “Braqa” aşkar favorit sayılırdı. Ağdam təmsilçisi isə bütün gözlənilənlərin əksinə, Portuqaliya təmsilçisinə tarixi şok yaşatdı və mərhələni adlamağı bacardı. Lakin bu dəfə “köhlən atlar”ın qarşısında dayanan “Braqa” yox, 34 oyunluq məğlubiyyətsizlik seriyaya malik olan “Bayer-04” idi.

...Havanın yağıntılı olmasına baxmayaraq, tribunalarda tamaşaçı dəstəyi yetərincə yüksək idi. Futbolçular da ilk dəqiqələrdən etibarən hücuma çıxmağa cəhd göstərirdi. Ədalət naminə Xabi Alonsonun meydana eksperimental heyət buraxdığını da vurğulayaq. Frimponq, Caka, Virts, Şok ehtiyatda qalmışdı. Artıq 2-ci dəqiqədə Benzya rəqibi daha diqqətli oynamağa məcbur etdi. Bir qədər sonra Yankoviç uzaq məsafədən qapını yoxladı, lakin zəbəsi qüvvətli alınmadı və qapıçı heç bir çətinlik çəkmədən topu tutdu. Növbəti dəfə meydanda ən fəallardan olan Juninyo səhnəyə çıxdı. Braziliyalı 24-cü dəqiqədə Benzyanın ötürməsindən sonra rəqib müdafiəçidən sıyrılıb, qapıya zərbə endirə bildi. Amma qolkiper topu kornerə göndərdi. Elə hücumun davamında Yankoviçin zərbəsindən sonra top dirəyə tuş gəldi. Davamında isə Zubir fürsətdən yararlana bilmədi. Bu dəqiqələr “Bayer-04” üçün faciəyə çevrilmişdi. Rəqib “Qarabağ”ın pressinqindən qurtula bilmird. 26-cı dəqiqədə Juninyo fərdi ustalıq sayəsində topu götürərək əks-hücuma çıxdı. Braziliyalı forvard sol cinahla irəliləyərkən cərimə meydançasında Benzyanın nəzarətsiz qaldığını görüb topu ona ötürdü. Benzya qüvvətli zərbəylə hesabı açdı – 1:0. Mübarizə getdikcə gərginləşirdi. “Asprinlilər” məğlub olmaq istəmirdi. 28-ci dəqiqədə Qrimaldonun qapı qarşısına hava ötürməsində Hlojek başla qeyri-dəqiq oynadı. Bir qədər sonra “köhlən atlar” növbəti dəfə əks-hücuma çıxdı. Yenə Juninyo sol cinahla sürətlə irəliləyib, qapı qarşısına asma etdi. Lakin Leandronun baş zərbəsi qapının üstündən keçdi. 40-cı dəqiqədə Bəhlulla Lunyovun anlaşa bilməməsi qapı qarşısında təhlükə yaratdı. İlk hissəyə artırılan sonuncu dəqiqədə Juninyo fərqi artırdı. Patrikin gözəl ötürməsindən sonra braziliyalı möhtəşəm reyd edərək tribunaları coşdurdu.

Oyunun axarından narazı qalan Xabi Alonsonun fasilədən dərhal sonra dəyişikliyə əl atacağı gözlənilən idi. Əvvəlcə Frimponq meydana çıxdı, 58-ci dəqiqədə isə Caka ilə Virts də mübarizəyə qoşuldu. Rəqib təzyiqi artırsa da, yenə də real qol vəziyyəti yaratmaqda çətinlik çəkirdi. Və heç gözlənilmədən “Qarabağ”ın ən usta oyunçularından olan Zubir kobud səhvə yol verdi. Onun arxaya – Lunyova ötürməsini ələ keçirən Virts effektli aşırma zərbə ilə fərqi azaltdı. Rəqibin 80-ci dəqiqədəki əvəzetmələri təzyiqi maksimum həddə çatdırmağa hesablanmışdı. Və bu gediş də özünü doğrultdu. 2-ci uzatma dəqiqəsində Andrixin qapı önünə ötürməsini Şik dəqiq baş zərbəsi ilə tamamladı – 2:2. Əslində bu qol belə işə yaramaya bilərdi. 83-cü dəqiqədə təkbətək çıxan Juninyo topu qapıçıya vurmaq əvəzinə onun başı üzərindən tora göndərsəydi. Həmin epizodda əzələsi dartılan futbolçu yerdə qaldı və mübarizəni davam etdirə bilmədiyi üçün əvəzləndi...

Beləliklə, “Qarabağ” bu cütün taleyinin Bakıda həll olunmasına imkan vermədi. Bəlkə də Leverkuzendə növbəti sensasiyaya şahid ola bilərik. Martın 14-də keçiriləcək cavab görüşünü səbirsizliklə gözləyirik.

KAMAL SƏFƏR