Lunyov “Bayer-04”ün paltardəyişmə otağına yolandı, Alonso avtoqraf verdi

Ötən cümə axşamı Bakıda Azərbaycan futbolu tarixində ilk dəfə Avropa Liqasının 1/8 final matçı keçirildi.

“Qarabağ” Almaniya nəhəngi, mövsümü məğlubiyyət görmədən davam etdirən “Bayer-04”i qəbul etdi. Təbii ki, hər kəs bu oyunu tribunadan izləmək, tarixin bir parçası olmaq istəyirdi. Lakin son vaxtların ən böyük problemlərindən biri yenə özünü göstərdi. Onlayn bilet almaq faktiki mümkünsüz hala çevrilmişdi. Oyun biletlərinin əksər hissəsi satışı çıxdığı gün tükəndi. Fanatların əksəriyyəti bilet ala bilməməsindən şikayətlənir, alverçilər isə meydan sulayırdı.

Stadionun qarşısına çatdığım anda tribunaların dolu olacağını anladım. Arenaya həmişəkindən fərqli bu dəfə “Xankəndi” qapısından yox, əsas girişdən daxil oldum. Məqsədim ümumi ab-havanı nəzərdən keçirmək, azarleşlərə qaynaylb-qarışmaq idi. “Qarabağ” hər kəsi stadiona cəlb etməyi bacarmışdı. Azyaşlılar, qadınlar, ahıllar... Hətta əcnəbilər belə ağdamlıların matçını izləməyə gəlmişdi. Fərqli millətlərdən bir xeyli tamaşaçı diqqətimi çəkdi. Onlardan üçü ilə ayaqüstü söhbət edərkən, ikisinin ispan, birinin isə ukraynalı olduğunu anladım. Əcnəbilər “Qarabağ”ın uğurlarından danışır, rəqibin möhtəşəm seriyasını qırmağa qadir olduğunu söyləyirdilər.

Saat 20.45-i göstərərkən asta addımlarla media sektora yaxınlaşdım. Avrokubok oyunlarında əcnəbi jurnalistləri görməyə alışmışıq. Lakin bu dəfə onların sayı daha çox idi. Tablonun sol tərəfinin üst hissəsi tam almanlarla dolmuşdu. Media sektorunda yerimi aldıqdan sonra Fərid Qayıbov diqqətimi çəkdi. Gənclər və idman naziri meydanda Qurban Qurbanov və köməkçiləri ilə görüşdü. O, təxminən 25-30 dəqiqə klub rəsmiləri ilə söhbətləşdi, dəstək verdi. Çox keçmədən “Qarabağ”ın prezidenti Tahir Gözəl də onların arasına qoşuldu. Nəzərəçarpan daha bir məqam o oldu ki, media sektorunun aşağısında yerləşən tribunalarda yer problemi yaşandı. Azarkeşlər oturmağa yer tapmırdı. Belədə onlar matçı ayaqüstə izlədi. Maraqlıdı, bilet alıblarsa, niyə ayaqüstə qalırlar?

Qonaq sektorunda “Bayer-04” fanatları yerini almışdı. Onlar debütdə komandalarına dəstək nümayiş etdirsələr də, “Qarabağ” azarkeşlərinin fit səsləri ilə üzləşdi. Fanklublar oyunboyu səslənən bəstələrlə sıravi azarkeşləri də dəstəyə qoşmağa çalışırdı. Lakin ən arzuolunmaz cəhətlərdən biri budu ki, azarkeşlərin fəallığı epizodik xarakter daşıyırdı, onlar 15-20 dəqiqə səssiz qalırdı.

Oyundan sonra Andrey Lunyovun hərəkəti diqqətimi çəkdi. Rusiyalı qolkiper oyundan sonra sabiq komandasının paltardəyişmə otağına yollandı, hardasa 20-25 dəqiqə orda qaldı. Xabi Alonso yerli azarkeşlərə avtoqraf verdi, forma imzaladı.

İSMAYIL XEYRULLAYEV