Makron Mbappe ilə nədən danışıb?
Bir neçə gün əvvəl Kilian Mbappe Yelisey Sarayında olub. PSJ-nin hücumçusu Fransanın prezidenti Emmanuel Makron ilə görüşüb.
Çərşənbə axşamı baş tutan görüşdə Paris klubunun prezidenti Nasser Əl-Xelayfi də iştirak edib. Xəbər verdiyimiz kimi, klub rəhbərliyi artıq futbolçuya münasibətini dəyişib. Yerli mənbələr Mbappenin PSJ ilə müqaviləsini yeniləməmək qərarına gəldiyi haqda bir neçə həftə əvvəl məlumat yaymışdı. Klubun onu hər vəchlə dilə tutmağa çalışacağı gözlənilirdi. Ancaq sonradan rəhbərliyin bundan sonra dünya çempionunu fikrindən daşındırmaq üçün heç bir ciddi cəhdə əl atmayacağı idia edildi. Başqa sözlə, hücumçu mövsümün sonunda komandanı azad agent kimi tərk edəcək. Kilianın rəhbərliyin daha cəlbedici şərtlərini geri çevirdiyi də məlumdu.
Yelisey Sarayında Qətər əmirinin şərəfinə Mbappe ilə Əl-Xelayfi üçün axşam yeməyi təşkil edilib. Prezident Makron azad agent kimi “Real”a keçəcəyi deyilən Kilian ilə onun gələcəyi haqda məsələni müzakirə etmədiyini bildirib. Dövlət başçısı “bu tədbir Mbappeni Parisdə qalması üçün dilə tutmaq fürsəti olmayıb” sualına belə cavab verib:
“Yox, qətiyyən. Görüşdə bu məsələ müzakirə olunmayıb. Bunu klub rəhbərliyinin öhdəsinə buraxıram. Mbappenin tədbirdə olması normaldı. O, sonuncu dünya çempionatının finalında Fransa yığmasının oyununu canlandıran əsl çempiondu. Bütün fransalıların bu möhtəşəm futbolçunun oyunu ilə fəxr etdiklərini düşünürəm. Amma görüş zamanı onun gələcəyi müzakirə olunmayıb”.
Digər xəbərlər
