Ötən tur məğlubiyyətlə barışan komandaların hər biri bu dəfə meydana qələbə üçün çıxmışdı.

Üstəlik “Sabah”ın məşqçi korpusu, xüsusən də İqor Ponomaryov özünəməxsus təzyiq altındaydı. Axı oyundan bir gün əvvəl “Sabah” rəhbərliyinin Krunoslav Renduliçlə anlaşdığı, xorvatiyalı mütəxəssisin hətta tribunada olacağı xəbəri yayılmışdı.

Bu yöndə fikirlərin ağuşundaykən ilk təhlükəli vəziyyətin şahidi olduq. Marqarita Da Silvanın uzun ötürməsindən sonra əldə etiyi topu sürəti hesabına “cilovlayıb” Volkova ötürdü. Gürcüstanlı hücumçunun qapıya zərbə cəhdinə Turan mane oldu. “Qırmızı-ağlar”ın üzvü qapıçıdan sıyrılıb “çərçivə”yə gedən topu meydandan çıxardı. Qonaqlar rəqibin güc nümayişinə cavab vermək üçün çox gözləmədi. Növbəti hücum cəhdinin baş rol ifaçısı Muxtar Respublika təmsiçisi oldu. Orxan Kuzmanoviçin ötürməsini başla tora qovuşdursa, oyunun axarı dəyişəcəkdi. Lakin top tirin üzərindən keçdi. Ardından küncdən zərbəni yerinə yetirən Sekidika Volkovun fərqlənməsinə səbəb ola bilərdi. Amma Avramın müdaxiləsi buna imkan vermədi. Bir neçə dəqiqə sonra Cesse bəxtini uzaqdan zərbə ilə sınasa da, qeyri-dəqiqlik üzündən istəyinə çatmadı. Az sonra Apeh Volkovun ötürməsindən faydalana bilmədi. Halbuki o, komandasını hesabda önə çıxara bilərdi.

İkinci hissə də “Sabah”ın təzyiqiylə başladı. Rodrigesin topu itirməsi üzündən az qala Apeh hesabı açacaqdı ki, qonaqları yenə qeyri-dəqiq zərbə xilas etdi. “Bayquşlar”ın növbəti hücum cəhdi 54-cü dəqiqədə sol cinahdakı boşluqlar üzündən baş verdi. Letiç Sekidikanın ötürməsini qəbul edib Marqaritaya göndərdi. Niderlandlı yarımmüdafiəçi isə rəqibin cərimə meydançasını nişan aldı. Avram birincidə Volkovun zərbəsinə qarşılıq versə də, geri dönən topu “çərçivə”dən keçirən Apehə mane ola bilmədi. Çox keçmədən Orxan hesabı bərabərləşdirmək şansından yararlanmadı. Çempionatın yeganə yerli bombardiri Yusifi aldatsa da, top tirin üzərindən keçdi. Qonaqların əlinə bir neçə dəqiqə sonra yenə belə fürsət düşdü. Bu dəfə Turanın yerinə yetirdiyi cərimə zərbəsi meydan sahiblərini ciddi təhlükəylə üz-üzə qoydu. Kadiri topu qapıçının müdaxilə edə bilmədiyi küncə göndərsə də, Amin təhlükəni sovuşdurdu. Bu ərəfədə qonaqların daha fəal olduğunu demək mümkündü. Naxçıvanlılar rəqibi sıxışdırır, qol axtarışını davam etdirirdi. Qarşılıqlı hücumlar fonunda davam edən oyunun taleyinə uzatma dəqiqələrində aydınlıq gəldi. Ribeyro Parrisin qarşısını ancaq kobud müdaxiləylə ala bildi. Umudlu dərhal “nöqtə”ni göstərdi, Parris fərqi artırdı. Beləliklə, “Sabah” da avrokuboklar uğrunda mübarizə aparan komandalar sırasına yaxınlaşdı. “Araz-Naxçıvan”ı isə artıq bu hədəfdən uzaq saymaq olar.

Gözdən qaçmadı
* Matçdan əvvəl azarkeşlər üçün təşkil edilən əyləncəli oyunda dava düşdü. Könüllülərin xəbərdarlığıyla davanın qarşısı alındı.
* “Sektor 85” tribunada çoxluq təşkil edirdi.

KƏNAN BAHADIR