Poqba ağır cəza ilə barışmayacaq
Nəhayət, Pol Poqbanın aqibəti məlum olub.
O, gözlənildiyi kimi, ağır cəzadan qaça bilməyib. “Yuventus”un yarımmüdafiəçisi dopinqdən istifadə etdiyi üçün 4 il müddətinə diskvalifikasiya olunub. İtaliya antidopinq prokurorluğu ötən ilin dekabrında onun üçün məhz belə cəza tələb etmişdi. Buna səbəb kimi fransalı futbolçunun orqanizmində testosteronun həddən artıq olması göstərilmişdi.
Amma Pol haqqında çıxarılan qərarla qətiyyən barışmadığını və İdman Arbitraj Məhkəməsinə şikayət edəcəyini bildirib. Martın 15-də 31 yaşını tamamlayacaq futbolçu “instaqram” hesabına bu cümlələri yazıb:
“Milli Antidopinq Tribunalının qərarının doğru olmadığını hesab edirəm. Peşəkar karyeram ərzində qazandığım hər şeyin məndən alındığına görə çox məyusam, şoka düşmüşəm və özümü məhv edilmiş sayıram. Hər şeyə hüquqi məhdudiyyətlərdən qurtulandan sonra aydınlıq gələcək. Bir daha deyirəm, heç vaxt antidopinq qaydalarını pozan maddədən bilərəkdən istifadə etməmişəm. Peşəkar idmançı kimi göstəricilərimi qadağan edilmiş maddələrin hesabına yaxşılaşdırmaq üçün heç bir hərəkət etməmişəm. İndiyədək çıxış etdiyim və rəqib kimi mübarizə apardığım komandalara qarşı hörmətsizliyə, ya da hiyləyə əl atmamışam. Buna görə də İdman Arbitraj Məhkəməsinə şikayət edəcəyəm”.
Xatırladaq ki, “Yuventus”un yarımmüdafiəçisi ötən il avqustun 20-də A seriyasında keçirilən “Udineze” ilə səfər oyunundan (3:0) sonra “ilişmişdi”. Pol həmin matçda iştirak etməsə də, dopinq nəzarətindən keçməli olmuşdu. İlkin testin nəticəsi onun orqanizmində əzələ və sümük kütləsinə təsir edən hormonun - testosteronun həddən artıq olduğunu müəyyən etmişdi. Bu mövsüm çempionatda iki dəfə - “Bolonya” (1:1) və “Empoli” (2:0) ilə matçlarda meydana sonradan çıxan dünya çempionu sentyabrda dopinq testinin müsbət nəticələnməsi ilə bağlı rəsmi məlumat yayılandan sonra bir daha yaşıl meydanlarda görünməyib: Milli Antidopinq Tribunalı onun rəsmi matçlardakı iştirakını qeyri-müəyyən müddətə qədər qadağan etmişdi. Səbəbkar A Seriyasının reqlamentinin 2.1 və 2.2 maddələrini pozmaqda ittiham edilir. Həmin maddələr “yasaqlanmış maddədən istifadə” və “yasaqlanmış maddədən istifadəyə cəhd”i nəzərdə tutur. Qeyd edək ki, İtaliyada dopinqdən yararlanma cinayət hərəkəti hesab olunur.
Poqba bir neçə ay əvvəl testin nəticəsinin təkrar yoxlanılması tələbi ilə çıxış etmişdi. Amma oktyabrın 6-da təkrar testin də müsbət nəticələndiyi açıqlanmışdı. Analiz “Yuventus”un hüquqşünaslarının seçdiyi ekspertlərin müşayiəti ilə Romadakı laboratoriyada aparılmışdı.
Pol 2 illik cəzaya da məruz qala bilərdi. Lakin prokurorlar onun dopinqdən bilərəkdən istifadə etməsini sübuta yetirdikləri üçün müddət iki dəfə artıq olub. Onun göstəricisi yalnız dopinq sayəsində arta bilərdi, bu isə əzələ və sümük kütləsinə birbaşa müdaxilə sayılır. Dopinq həmçinin piy hüceyrələrinin bölünməsinə də şərait yaradır. Bunun qəbulu əzələ toxumasının sürətli inkişafını da təmin edir: bir ay ərzində əzələ kütləsini əhəmiyyətli dərəcədə artırmaq və orqanizmin dözümlülüyünü yaxşılaşdırmaq mümkündü.
Meneceri Polun dopinqdən bilərəkdən yararlanması ilə bağlı versiyanı rədd edir:
“Onun qaydaları bilərəkdən pozmadığına heç bir şübhəm yoxdu”.
Jurnalist Fabiana della Valle isə səbəbin həkimlərlə anlaşılmazlıqla bağlı ola biləcəyi versiyasını irəli sürür. Onun dediyinə görə, ABŞ-dən olan tanış həkim futbolçuya tərkibində testosteron olan dərmanları məsləhət görüb. Poqba dopinq testinin müsbət nəticə verməsi açıqlanandan sonra “Yuventus”un həkimlərinə klubdan xəbərsiz halda preparat qəbul etdiyini bildirib.
Yeri gəlmişkən, onun klubda müddəti 2026-cı ilin yayına qədər nəzərdə tutulan müqaviləyə əsasən illik məvacibi 8 milyon avrodu. “Yuventus” artıq sözləşməni birtərəfli qaydada pozmaq hüququna malikdi. Yerli mənbələr klubun bu halda təxminən 30 milyon avroya qənaət edəcəyini vurğulayır. Pol isə cəzasının azalmasına nail ola bilməsə, karyerasını başa vurmağa məcbur olacaq…
