Alexandro Qomes başına iş açıb. Özünün dediyinə görə, bilmədən dopinq tərkibli preparat qəbul edən futbolçu ağır cəzadan qaça bilməyib.

"Football-plus.az* xəbər verir ki, Argentina millisinin oyunçusu iki il müddətinə futboldan uzaqlaşdırılıb. “Relevo” nəşrinin xəbərinə görə, buna “Montsa”nın yarımmüdafiəçisinin antidopinq qaydalarını pozması səbəb olub.

Ötən ilin noyabrında “Sevilya”da çıxış edərkən Qomesin dopinq testi müsbət nəticələnmişdi. Orqanizmində qadağan olunmuş maddə aşkar edilən 35 yaşlı futbolçu iddia edir ki, dopinqi bilmədən qəbul edib. Təxminən bir il əvvəl özünü pis hiss edən Alexandro həkimlərlə məsləhətləşmədən övladı üçün nəzərdə tutulan öskürək siropu içib. Onun tərkibində isə idmançılar üçün yasaqlanan maddə olub.

Qeyd edək ki, Qomes Argentina yığması ilə DÇ-2022-nin qalibi olub. O, bu mövsüm “Montsa”nın heyətində A seriyasında 2 oyun keçirib. “Mundo Deportivo” qəzetinin yazdığına görə futbolçunun ağır cəzalanmasının milli komandasının mundialdakı uğuruna təsir etməyəcək. Ona kəsilən cəza yalnız FİFA-dan şəxsən rəsmi bildiriş alacağı gündən hesablanacaq.