Bu gün “Qarabağ” daha bir taleyüklü və tarixi matça çıxıb. Avropa Liqasının pley-offunda rəqib “Braqa” olub.

"Football-plus.az" xəbər verir ki, “köhlən atlar” qələbə qazanaraq 1/8 finala yüksəlib.

Avropa Liqası
pley-off, cavab görüşü
Qarabağ – Braqa (Portuqaliya) 2:3
Mateus Silva, 102, Nəriman Axundzadə, 120+2 - Rocer Fernandes, 70, Alvaro Calo, 83, Simon Banza, 113-p.
Qırmızı vərəqə: Elvin Cəfərquliyev, 56
Hakimlər: GEORGİ KABAKOV, Martin Marqaritov, Diyan Valkov, Nikola Popov (hamısı Bolqarıstan).
VAR hakimi: İvaylo Stoyanov (Bolqarıstan).
VAR hakiminin köməkçisi: Draqomir Draqanov (Bolqarıstan).
Hakim-inspektor: Petteri Kari (Finlandiya).
UEFA nümayəndəsi: Fredi Furst (Polşa).
22 fevral. Bakı. Tofiq Bəhramov adına Respublika stadionu. Saat 21.45.
İlk oyun - 4:2.

Bu gün bütün futbol ictimaiyyətinin gözü “Tofiq Bəhramov”da olacaq. Çünki “Qarabağ” ölkə tarixində növbəti ilkə imza atmağa çox yaxındı. Portuqaliyadan möhtəşəm qələbə ilə dönən “köhlən atlar” meydana həm ciddi azarkeş dəstəyi altında, həm də hesab baxımdan üstün çıxacaq. Səfərdəki matçı cəza üzündən buraxan Marko Veşoviç də komandasına kömək edə bilər. Düzdü, onun start heyətində görünmək şansı azdı. Yeganə zədəli Kevin Medinadı. Belədə Qurban Qurbanovun start heyətində bu futbolçulara şans verəcəyini düşünmək olar: Andrey Lunyov, Elvin Cəfərquliyev, Bəhlul Mustafazadə, Bədavi Hüseynov, Mateus Silva, Yassin Benzya, Julio Romao, Marko Yankoviç, Abdulla Zubir, Leandro Andrade, Juninyo Olavio.
“Braqa”nın baş məşqçisi Artur Jorjenin Bakıya gətirdiyi heyətlə də tanış olaq: Mateus, Tyaqo Sa, Lukaş Horniçek, Sərdar Saatçı, Siku Nyakate, Joze Fonte, Paulo Oliveyra, Co Mendes, Fransisko Çissumba, Vitor Qomes, Kristian Borxa, Şer Ndur, Rodriqo Salasar, Vitor Karvalyo, Luiş Pitsi, Joao Moutinyo, Cibril Sumare, Armindo Bruma, Abel Ruis, Alvaro Calo, Roni Lopeş, Rocer Fernandeş, Simon Banza.

Bəli, əsas kapitan Rikardo Orta zədəli olduğundan adı siyahıya salınmayıb. Halbuki Jorje onun cavab oyununa qədər hazır olacağını demişdi. Əlbəttə, cari mövsümdə avrokuboklarda 7 məhsuldar ötürmə ilə yadda qalan oyunçunun yoxluğu “Qarabağ”ın şanslarını artırır. Üstəlik müdafiəçi Adrian Marin də zədəlidi. Bəs çalışdırıcı onların əvəzində kimə güvənəcək? Onun planı bəllidi. Belə ki, Portuqaliya millisinin sabiq üzvü olan Bruma zədəsini sağaldaraq kollektivə qoşulub. 29 yaşlı yarımmüdafiəçi bu mövsüm avrokuboklarda 9 oyunda üçü Çempionlar Liqasında olmaqla 5 qol vurubsa, 2 məhsuldar ötürmə verib. Bruma bu göstəriciylə komandasının bombardiridi.

Ümumiyyətlə, “Braqa”nın “Qarabağ” səddini keçmək şansı azdı. Düzdü, Portuqaliya təmsilçisi çempionatının gücü, maliyyə dəyəri və ümumi beyəlxalq təcrübəsi sayəsində “köhlən atlar”ı üstələyir. Lakin məhz ilk matçda qeydə alınan hesab rəqibin işini xeyli çətinləşdirir. Belə ki, “Braqa” indiyə qədər cəmi bir dəfə avrokuboklarda 2 top fərqi ilə uduzduğu görüşdən sonra vəziyyəti xeyrinə dəyişib. Söhbət Avropa Liqasının 2021/22 mövsümündə “Şerif”lə (Moldova) pley-off matçlarından gedir. “Silah ustaları” səfərdə 0:2 hesabıyla uduzubsa, evdə rəqibini eyni hesabla üstələyib və penalti seriyasında daha dəqiq olaraq (3:2) 1/8 finala yüksəlib. Amma “Braqa” ilk oyunu evdə keçirildiyi və 2 top fərqiylə məğlub olduğu hallarda heç vaxt səfərdən sərfəli nəticə ilə qayıda bilməyib. Düzdü, qələbə qazanılıb. Lakin qol çatışmazlığı uğura mane olub. Buna 2011/12 mövsümündə “Beşiktaş”la duelləri misal çəkə bilərik. Komanda evdə 0:2 hesabıyla məğlub olub və səfərdən qələbəylə qayıdıb - 1:0. Göründüyü kimi, “Braqa” Avropa Liqasının 1/8 finalına yüksəlsə, həm tarixində ilkə imza atacaq, həm də həmin uğuru 6-cı dəfə təkrarlamış olacaq. “Qarabağ” isə tarixində ilk dəfə belə uğur qazanacaq.

Bəs hakim kimdi? Georgi Kabakovu tanıyırıq. Xatırladaq ki, onun haqda “Qarabağ”ın Avropa Liqasının pley-off mərhələsində ötən ilin avqustunda səfərdə “Olimpiya”ya qarşı (2:0) keçirdiyi matçdan öncə ətraflı məlumat vermişdik. Daha sonra Kabakovun ədaləti təmsil etdiyi qarşılaşmada Julio Romao sarı vərə almış, komandamız isə qrup mərhələsinə adlamışdı. 37 yaşlı hakim 2013-cü ildən FİFA referisidi. O, üçüncü dəfə “köhlən atlar”ın oyununu idarə edəcək. Yollarımızın kəsişdiyi ilk oyun 2015/16 mövsümünə təsadüf edir. Həmin görüşdə “Qarabağ” Çempionlar Liqasının 2-ci təsnifat mərhələsində “Rudar”a Monteneqroda 1:0 hesabıyla qalib gələrək, yoluna davam edib. Göründüyü kimi, hakim də düşərlidi. İndi “Braqa”nın 2 top fərqini aradan qaldırmasına imkan verməmək lazımdı.

Uğurlar, “Qarabağ!

KƏNAN BAHADIR