Turun ilk matçında oyun üslubu bir-birinə zidd olan komandalar qarşılaşdı.

Gözləntiləri yanıldan bir şey olmadı. İqor Ponomaryov dönəmində yüksəlişdə olan “Sabah” sanki elitadan düşməyəcəkmiş kimi arxayınlaşan “Kəpəz”i məğlub etdi. Masazır təmsilçisi bu qələbə sayəsində avrokuboklara vəsiqəyə iddialılara bir qədər də yaxınlaşdı. Hazırda 5-7-ci pillələri bölüşən “Sabah”ı 2-ci yerdəki “Sumqayıt”dan cəmi 5 xal ayırır.

“Neftçi” üzərindəki qələbədən sonra tilsimi qıran “Araz-Naxçıvan” Bayılda baxımlı oyun nümayiş etdirdi. Eyni zamanda Şahin Diniyevin çalışdırdığı “Səbail” də gözəl oyunla yadda qaldı. “Dənizçilər”, sadəcə, müdafiə olunmağı yox, hücumda bacarıqlı olduğunu da göstərdi. Bu da “Diniyev müasir futbol oynada bilmir” düşüncəsinə son qoydu. 90 dəqiqə ərzində meydanda əsl mübarizə getdi. Xüsusən də son dəqiqələr hücumlarla yadda qaldı. Bağırovun əsas qol silahı olan Orxan Əliyevin yüksəlişi diqqətdən qaçmadı. Ümumilikdə oyunu iki hissəyə ayıra bilərik. Birinci hissədə söz sahibi qonaq komandaydısa, ikincidə meydan sahibləri dominantlığı ələ almağı bacardı.

Yeni stadionun açılış matçında “Neftçi” üzərindəki qələbədən sonra keçirdiyi 2 oyunda yalnız 2 xal toplayan “Sumqayıt”da problemlər özünü göstərməyə başlayır. Klubun fasilədə heç bir futbolçu transfer edə bilməməsi və Samir Abasovun gələcəkdə olacaq bütün uğursuzluqları buna bağlayacağını söyləməsi indidən özünü göstərdi. Abasov gah azarkeş kasadlığını, gah da transfer məsələsini ortaya qoyaraq oyunçularını müdafiə etdi. Bir tərəfdən haqlıdı. Çünki Sumqayıt kimi böyük şəhər üçün 1480 azarkeş azdı. Fəqət çempionatdakı başqa komandaların oyunlarına baxsaq, rəqəm daha aşağıdı. Əlbəttə, tovuzlu azərkeşlər bu mənada istisnadı. Tovuzdan söz düşmüşkən, elə Ayxan Abbasov da 0:0-dam narazılıq etmədi. Görünür, qolsuz bərabərlik hər iki çalışdırıcının ürəyincə olub.

Turun mərkəzi görüşündə “Neftçi” sevindi. Hansı komandanın dominantlıq etdiyi demək çətindi. Amma Bojoviçin də dediyi kimi, bəxt “Neftçi”dən yana idi. Rəşad Sadıqov yenə hakimdən narazı qaldı. Bəlkə də ona haqq vermək olar. Çünki komandasının 2 qolu sayılmadı. Lakin buna VAR-a məsləhətləşmədən sonra qərar verildi. Başqa bir önəmli məqam çalışdırıcının hücumçularından, hücum xəttindən narazılığıdı. Maraqlıdı, görəsən, o hücumçuları kim transfer edib? Adətən, baş məşqçi təklif edir, skaut xidməti bunu işi dəyərləndirir. Mövsümün ilk dövrəsində liderlik edən komanda artıq orta sıralarda qərarlaşıb. “Qartallar” son 10 çempionat oyununda qələbəyə həsrət qalıb. Eyni zamanda bu mövsüm 3-cü dəfə flaqmana qalib gələ bilmədilər. Sadıqovun bu tilsimi nə vaxt qıracağı maraqla gözlənilir. Lakin bu gedişlə ümidverici nəsə demək mümkün deyil...

Misli premyer-liqası
3-cü dövrə, 23-cü tur
17 fevral
Sabah – Kəpəz 3:2
Səbail – Araz-Naxçıvan 2:2
18 fevral
Sumqayıt – Turan Tovuz 0:0
Neftçi – Zirə 1:0
“Qəbələ” – “Qarabağ” oyunu fevralın 28-də keçiriləcək.
1. Qarabağ 22 16 3 3 55-20 51
2. Sumqayıt 23 9 9 5 23-25 36
3. Neftçi 23 10 5 8 26-21 35
4. Zirə 23 8 8 7 14-13 32
5. Səbail 23 8 7 8 34-35 31
6.Araz-Naxçıvan 23 8 7 8 26-28 31
7. Sabah 23 8 7 8 33-28 31
8. Turan Tovuz 23 8 6 9 36-33 30
9. Kəpəz 23 5 5 13 20-40 20
10. Qəbələ 22 4 3 15 15-39 15
Bombardirlər: Olavio Juninyo (Qarabağ) – 15, Aleksandr Ramalinqom (Səbail) – 10, Orxan Əliyev (Araz-Naxçıvan) – 9.
Növbəti turun proqramı
23 fevral, 17.00. Kəpəz – Qəbələ
24 fevral, 15.00. Turan Tovuz – Neftçi
24 feval, 17.30. Səbail – Sabah
25 fevral, 16.30. Araz-Naxçıvan – Zirə
25 fevral, 19.00. Qarabağ – Sumqayıt

KAMAL SƏFƏR