Avropa Liqasında öz qrupunu 2-ci pillədə tamamlayan Çexiya çempionu İstanbula yaxşı formada – son 8 rəsmi matçın hamısında qələbə qazanaraq gəlmişdi. Ancaq İstanbul nəhəngi də oyundan öncə belə statistika ilə öyünə bilərdi. Yəni iki seriyadan biri qırılmalıydı...

“Football-plus.az” xəbər verir ki, gözlənildiyi kimi, Okan Buruk meydana ideal heyət buraxmışdı. Yalnız zədədən yeni qayıdan Əbdülkərim Bardakcı ehtiyatda qalmışdı. Mükəmməl azarkeş dəstəyinə malik olan və oyuna yaxşı başlayan “Qalatasaray” 20 dəqiqə tamamlanmamış hesabı açdı. İkardinin ötürməsindən sonra topu qəbul edərək cərimə meydançasına daxil olan Kərəm Dəmirbay qüvvətli zərbə ilə yaxın küncü dəqiq nişan aldı. Fasiləyə qədər olan müddətdə Mertens iki dəfə qol vurmağa yaxın oldusa, bir epizodda Muslera komandasını real qoldan xilas etdi. İkinci hissə meydan sahibləri üçün yaxşı başlamadı. Hücuma qoşulan sağ müdafiəçi Presiado baxımlı zərbə ilə topu yerlə uzaq künə göndərdi. Az sonra İkardinin zərbəsi dirəyə tuş gəldisə, Kaan Ayhan oyuna davam edə bilməyərək Əbdülkərimlə əvəzləndi. 61-ci dəqiqədə yerli fanatlar yenidən ayağa qalxdı. Adi epizodda topu rəqibə bağışlayan kapitan Kreyçi üstəlik Mertensin qüvvətli zərbəsindən sonra avtoqol müəllifi oldu. Amma cavab hücumundaca Nelsson Muslera ilə təkbətək çıxan Birmançeviçi yerə yıxınca birbaşa qırmızı vərəqə aldı! Bu azmış kimi, 2 dəqiqə sonra qonaqların əsas qol silahı Kuxta baş zərbəsi ilə bərabərlik topunu vurdu. 80-ci dəqiqədə “Sparta” da azlıqda qaldı. Top uğrunda mübarizə zamanı Barış Alpərin üzünə zərbə endirən Rineş 2-ci sarı vərəqəni alaraq meydanı tərk etdi. Əsas vaxta əlavə olunan 1-ci dəqiqədə isə “Qalatasaray”lıların sevimlisi İkardi səhnəyə çıxdı. Son vaxtlar məhsuldarlığı aşağı düşən argentinalı forvard 2 müdafiəçinin əhatəsində olmasına baxmayaraq, topu qapıçı üçün əlçatmaz olan yerə göndərdi. Türkiyə çempionu bu dramatik qarşılaşmada sevinsə də, bir həftə sonra komandanın işi heç də asan olmayacaq. Çünki “Sparta” bu mövsüm öz meydanında keçirdiyi 15 rəsmi oyunun heç birində uduzmayıb (13 qələbə, 2 heç-heçə)!

pley-off, ilk oyun
Qalatasaray – Sparta 3:2
Kərəm Dəmirbay, 19. Kreyçi, 61-öz qapısına. İkardi, 90+1 – Presiado, 47. Kuxta, 65.
Qalatasaray: Muslera, Kaan Ayhan (Əbdülkərim Bardakcı, 55), Nelsson, Sançes, Berkan Kutlu, Torreyra (Ndombele, 90+1), Kərəm Dəmirbay (Zaha, 84), Barış Alpər Yılmaz, Mertens (Vinisius, 90+1), Kərəm Aktürkoğlu (Tete, 84), İkardi.
Sparta (Çexiya): Vindal, Presiado (Vizner, 74), Vitik, Sorensen, Kreyçi, Rineş, Kayrinen, Laçi (Solbakken, 74), Karabeç (Haraslin, 65), Birmançeviç (Sadilek, 84), Kuxta (Olatunyi, 84).

Faktlar
* “Qalatasaray” avrokuboklarda keçirdiyi 315-ci oyunda 113-cü qələbəsini qazandı (84 heç-heçə, 118 məğlubiyyət, top fərqi – 426:468).
* “Qalatasaray”ın rəsmi matçlarda qələbə seriyası 9, məğlubiyyətsiz seriyası 13 oyuna çatdı (11 qələbə, 2 heç-heçə).
* “Qalatasaray”ın bu mövsüm evdə keçirdiyi 22 rəsmi oyunda yalnız bir məğlubiyyəti var (19 qələbə, 2 heç-heçə). Yeganə məğlubiyyət ÇL-in qrupunda “Bavariya” ilə oyunda qeydə alınıb.
* Bu mövsüm avrobukoklarda 13-cü oyunda 7-ci dəfə qalib gələn (3 heç-heçə, 3 məğlubiyyət) “Qalatasaray” tarixi ərzində yalnız 2 mövsümdə bundan daha çox qələbə qazanıb. İstanbul nəhəngi avrokuboklarda 2009/10-u 8, 1999/00-i isə 9 qələbə ilə tamamlayıb.
* AL-in indiki formatla keçirilməyə başlandığı 2009-cu ildən bəri Okan Buruk bu turnirdə ən yüksək qələbə faizinə (54,5) malik olan türkiyəli məşqçidi (11 oyun, 6 qələbə).
* AL-in indiki formatla keçirilməyə başlandığı 2009-cu ildən bəri “Qalatasaray” bu turnirin pley-offunda 9-cu oyununda ilk qələbəsini qazandı (4 heç-heçə, 4 məğlubiyyət).
* “Sparta” Türkiyədə keçirdiyi ardıcıl 7-ci oyunda qələbəyə həsrət qaldı və bu müddətdə 6-cı dəfə məğlub oldu. Praqa təmsilçisi Türkiyədə son qələbəsini 1989-cu ilin sentyabrında “Fənərbaxça”ya qarşı ÇK-nın cavab oyununda əldə edib (2:1).

Oyundan sonra
Okan Buruk, “Qalatasaray”ın baş məşqçisi: “Gözəl bir matç izlədik. Rəqibin hücum etməyi sevdiyini, amma müdafiədə də boşluqlar buraxdığını bilirdik. İlk yarıda hücumların həlledici məqamında düzgün qərarlar verə bilsəydik, daha çox qol vurardıq. 18 dəqiqə azlıqda oynasaq da, önəmli performans ortaya qoyduq. “Sparta” 80-ci dəqiqədə azlıqda qalandan sonra daha çox hücum etməyə çalışdıq. Yekunda önəmli rəqibə qarşı 3:2 hesablı qələbə qazandıq. Kiçik üstünlük əldə etdik. Amma başqa bir şey qazanmadıq. Bizdə Nelsson, rəqibdə isə 3 futbolçu cəzalı duruma düşdü. Cavab oyununa da ən yaxşı şəkildə hazırlaşacağıq. Ehtiyat qüvvəmiz geniş deyil. Xüsusilə də müdafiədə seçim imkanlarımız azdı. Orye sıralarımıza qoşulsa da, Afrika Millətlər Kubokundan zədəli qayıdıb və nə vaxt hazır olacağını bilmirik. Məcburiyyətdən bəzi oyunçuları fərqli mövqelərdə sınayırıq. Məcbur qaldıqca bu cür çıxış yolları axtaracağıq. Muslera yenə önəmli qurtarışlar etdi. Bizim üçün hər cəhətdən vacib simadı. Onunla yolumuza davam etmək istəyirik”.
Brayan Priske, “Sparta”nın baş məşqçisi: “Əla oynadıq. Bir çox fürsət yaxaladıq. İkidən artıq qol vura bilərdik. Oyunçularımın özünəinamının artması baxımından faydalı qarşılaşma oldu. İşin yeganə üzücü tərəfi belə performans sərgiləməyimizin qarşılığında meydanı məğlub tərk etməyimiz oldu. “Qalatasaray”a çətin anlar yaşatdıq. 3 qol buraxsaq da, komandamla qürur duyuram. Matçın bəzi qırılma anları oldu. Həmin anlarda fürsətləri dəyərləndirsəydik, sonluq başqa cür ola bilərdi. Amma yenə də pley-offdakı səfər oyunu üçün yaxşı təsir bağışladıq. Həm də hansı rəqibə qarşı oynadığımızı da unutmayaq. “Qalatasaray” fanatları komandalarını irəli səsləmək üçün hər şey etdilər. Stadionda gözəl atmosfer var idi. Ümid edirəm ki, izləyicilər də oyundan razı qaldı. Çünki hər iki komanda hücumameyilli futbol oynamağa çalışdı. Püşk atılandan sonra “Qalatasaray” bu cütün favoriti idi. Məncə, bu nəticədən sonra heç nə dəyişmədi. Rəqib hələ də favoritdi. Amma biz gücümüzü göstərdik. 1 top böyük fərq deyil və bunu öz meydanımızda aradan qaldıra bilərik”.