Fransa çempionatının 21-ci turu cəlbedici oldu.

“Football-plus.az” xəbər verir ki, əslində bu turun iki mərkəzi oyunu var idi. İddialılardan PSJ ilə “Lill”, “Nitsa” ilə “Monako” qarşılaşdı. “Şimallı itlər”lə ilk dövrədəki oyunda xal itirən (1:1) PSJ-nin baş məşqçisi Luis Enrike gözlənilməz rotasiyaya əl ataraq Donnarumma ilə Mbappeni ehtiyatda saxlamışdı. Amma parislilər onlarsız da güclü rəqibi məğlub edə bildi. Yusuf Yazıcı artıq 6-cı dəqiqədə qonaqları irəli çıxarsa da, sonrakı 10 dəqiqə onlar üçün faciəvi oldu. 10-cu dəqiqədə Ramuş hesabı bərabərləşdirdi, 17-ci dəqiqədə mərkəz müdafiəçisi Aleksandro topu uzaqlaşdırmaq istəyərkən “qapıların yerini səhv saldı”. 2-ci hissə də PSJ-nin üstünlüyü şəraitində keçdi və Kolo Muani 80-ci dəqiqədə intriqanı öldürən qolu vurdu.

Turun digər mərkəzi oyununda “Nitsa” evdə “Monako”ya uduzdu. “Qartallar” iki dəfə hesabda geri düşdü və hər dəfə də bərabərlik qolunu vura bildi. Lakin Qolovinin 77-ci dəqiqədə vurduğu qol həlledici oldu. “Knyazlar” bu qələbə sayəsində ilk “3-lüy”ə qayıtdı və indi “Nitsa”dan yalnız 1 xal geri qalır.
Ardıcıl 3-cü oyunda qələbəyə həsrət qalan “Brest” də mövqeyini əldən verməkdədi. Erik Ruanın komandası səfərdə aşkar autsayder “Klermon”un müqavimətini qıra bilmədi. Vitse-çempion “Lans” isə “Strasbur” üzərində inamlı qələbə qazanmaqla xal hesabında “Lill”ə çatdı. “Qan-qızılılar”la yanaşı, “Renn” də sürət yığmaqdadı. Bretaniyalılar səfərdə “Havr”ın öhdəsindən gəldi.

“Marsel” yenə azarkeşlərini məyus etdi. Cennaro Qattuzonun çalışdırdığı komanda ardıcıl 5-ci dəfə qələbəyə həsrət qaldı. Özü də autsayderlərdən biri “Mets”lə oyunda. Ədalət naminə onu da vurğulayaq ki, “Marsel” Jiqonun meydandan qovulması üzündən 31-ci dəqiqədən azlıqda mübarizə apardı.

Mövsümün qışa qədər olan bölümünü faciəvi keçirən “Lion” tədricən özünə gəlməkdədi. Ölkə kubokunu da nəzərə alsaq, “şirlər” ardıcıl 3-cü qələbəsini “Monpelye” üzərində qazandı. Baxmayaraq ki, hesabı məhz “Monpelye” açmışdı. Turun digər oyunlarında “Loryan” evdə “Reyms”i, “Nant” səfərdə “Tuluza”nı məğlub etdi.

21-ci tur
PSJ – Lill 3:1
Ramuş, 10. Aleksandro, 17-öz qapısına. Kolo Muani, 80 – Yazıcı, 6. (47716)
PSJ: Navas, L.Ernandes (Hakimi, 69), Beraldo, Pereyra, Mukiele, Dembele (Barkola, 62), Uqarte, Ruis (Vitinya, 62), Asensio, Ramuş (Zair-Emeri, 74), Kolo Muani.
Lill: Şevalye, İsmaili, Aleksandro, Yoro, Santuş, Bentaleb, Andre (Devid, 67), Qudmundsson (Kabella, 67), Qomes, Jeqrova (Unas, 67), Yazıcı (Haraldsson, 81).
Nitsa – Monako 2:3
Lyabord, 37-p. Gessand, 74 – Zakariya, 16; 50. Qolovin, 77. (24788)
Nitsa: Bulka, Bar, Dante, Todibo, Lotomba (Rosario, 67), Budaui (Perro, 76), Ndaişimay, Sanson (Rozye, 83), Luşe (Türam, 67), Gessand, Lyabord (Şo, 75).
Monako: Ken, Salisu, Maripan, Kerer, Kamara (Diop, 90+4), Zakariya, Fofana, Yakobs, Qolovin (Baloqun, 80), Minamino (Akliuş, 79), Ben Yedder.
Marsel – Mets 1:1
Mumbanya, 56 – Udol, 61. (62686)
Marsel: Lopes, Merlen (Qarsiya, 68), Balerdi, Jiqo, Kloss, Onana, Unai, Arit (Meyte, 33), Mumbanya (Enrike, 85), Obameyanq, Ndiaye (Sarr, 68).
Lans – Strasbur 3:1
Vai, 16. Koşta, 30. Sotoka, 58 – Delen, 43. (38161)
Havr – Renn 0:1
Burijo, 60. (23702)
Klermon – Brest 1:1
Kiey, 69 – Lis-Melu, 50. (8893)
Tuluza – Nant 1:2
Dallinqa, 90+6 – Məhəmməd, 2. Kadevere, 51. (28933)
Loryan – Reyms 2:0
Bamba, 70. Bakayoko, 87. (15096)
Monpelye – Lion 1:2
Nordin, 23 – Lakazett, 74. Kakere, 82. (15519)
1. PSJ 21 15 5 1 51-18 50
2. Nitsa 21 11 6 4 22-14 39
3. Monako 21 11 5 5 40-30 38
4. Brest 21 10 7 4 30-18 37
5. Lill 21 9 8 4 29-17 35
6. Lans 21 10 5 6 27-20 35
7. Renn 21 8 7 6 31-25 31
8. Marsel 21 7 9 5 29-23 30
9. Reyms 21 9 3 9 27-29 30
10. Strasbur 21 6 7 8 22-29 25
11. Havr 21 5 9 7 23-25 24
12. Nant 21 6 4 11 22-32 22
13. Lion 21 6 4 11 22-34 22
14. Tuluza 21 4 8 9 20-29 20
15. Monpelye 21 4 8 9 21-27 19
16. Loryan 21 4 7 10 28-42 19
17. Mets 21 4 5 12 18-32 17
18. Klermon 21 3 7 11 15-33 16
Bombardirlər: K.Mbappe (PSJ) – 20, Ben Yedder (Monako), Lakazett (Lion) – 11, Devid (Lill) – 8.
Növbəti turun oyunları fevralın 16-18-i aralığında keçiriləcək: Lion – Nitsa, Lill – Havr, Nant – PSJ, Strasbur – Loryan, Renn – Klermon, Monako – Tuluza, Monpelye – Mets, Reyms – Lans, Brest – Marsel.

Turun rəqəmi
3 – Kilian Mbappe PSJ karyerasında 3-cü dəfə çempionat oyununda ehtiyatda qaldı. Luis Enrike çərşənbə günü “Brest”lə kubok oyununda topuğundan zədə alan ulduz forvardın sağlamlığı ilə bağlı risk etmək istəmədi. Kilian əvvəllər iki dəfə - 2018-ci ilin aprelində (“Monako” – 7:1) və 2017-nin noyabrında (“Nant” – 4:1) ehtiyatda qalmışdı.

Turun ulduzu
Denis Zakariya (Monako) – buna qədər mövsümdə cəmi bir qolu olan isveçrəli yarımmüdafiəçi “Nitsa” ilə oyunda “partladı”. O, ilk qolu uzaq məsafədən gözəl zərbə ilə vurdu, ikincidə isə yaxın dirək önündə topa başını toxundurdu.

Turun sitatı
Aleksandr Qolovin, “Monako”nun yarımmüdafiəçisi: “5 qol, daimi mübarizə, çoxlu sarı vərəqə, “qırmızı”, bir sözlə, əsl derbi. Üstəlik 1-ci dövrədə biz evdə “Nitsa”ya uduzmuşduq, əvəz çıxmaq lazım idi. Turnir cədvəli baxımından da önəmli oyun idi. Bizi yalnız 3 xal qane edirdi, belə oyunda qələbə çox dəyərli və vacibdi. Yaxşı ki, hesab 2:2 olandan dərhal sonra 3-cü qolu vura bildik. Bilirəm ki, “Nitsa” üzərində qələbə azarkeşlərimiz üçün xüsusi hadisədi. Onları sevindirə bilməyimiz əla oldu”.

Fakt
PSJ bütün turnirləri əhatə edən məğlubiyyətsiz oyunlar seriyasını 16-ya çatdırdı. Parislilər bu müddətdə 12 qələbə qazanıb, 4 oyunda heç-heçə edib.

Reaksiya
Luis Enrike, PSJ-nin baş məşqçisi: “Yaxşı, yetkin oyun göstərdik. Bu oyun mənə “Brest”lə kubok qarşılaşmasını xatırlatdı. “Real Sosyedad”a qarşı da məhz belə oyun gözləyirəm. Futbolçularımın böyük həvəslə oynadığını gördüm. Məşqçilər həmişə kollektiv yaratmağa çalışır. Kilian Mbappe səviyyəsində oyunçular fərdi ustalığa malikdi, oyunun axarını dəyişməyə qadirdi, ancaq önəmlisi odu ki, biz komandanın səviyyəsini də dərk edirik. Kilianın sağlıq durumu yerindədi, ancaq risk etmək istəmədim. Bu, final görüşü olsaydı, onu da meydana buraxardım, ancaq çərşənbə günü Çempionlar Liqasında 100 faiz oynayacaq”.