“Karvan” MOİK-lə xal fərqini minimuma endirdi
1-ci liqada mövsümün ikinci yarısı MOİK – “Karvan” oyunu ilə canlandı.
6-cı pillədə qərarlaşan yevlaxlıların çempionluğa real namizədlərdən sayılan “hərbçilər”lə görüşündə tribunalarda təkəm-seyrək azarkeş var idi. Diqqətimi çəkən məqamlardan biri də qonaqların ehtiyat oyunçular skamyasında cəmi üç futbolçunun əyləşməsi idi ki, Kənan Kərimov sona qədər onların xidmətinə ehtiyac duymadı.
Oyun qarşılıqlı hücumlarla başladı. Gözlənilənin əksinə, qonaqlar ilk dəqiqələrdən üstünlüyü ələ almağı bacardı. Oyunda ilk təhlükəni də yevlaxlılar yaratdı. 6-cı dəqiqədə Emil Qasımovun təxminən 17 metrdən endirdiyi zərbə az fərqlə qapıdan aralı keçdi. Çox keçmədən yenidən Emil səhnəyə çıxdı. Onun ikinci cəhdini MOİK-in qolkiperi əngəllədi. 39-cu dəqiqədə qonaqlar daha bir dəfə qola yaxın oldu. Kinqsin cərimə meydançası həndəvərindən zərbəsini Zeynal Əhmədzadə dəf etdi. 51-ci dəqiqədə Qnapi gözəl ötürmə ilə Qasımovu qapıçı ilə üz-üzə qoydu. Lakin Emil bu epizodda topa toxuna bilmədi. Hissənin sonluğunda hücumlarını daha da artıran qonaqlar Şahmuradovun zərbələri ilə təhlükəli oldu. Onun ilk cəhdində top qapıdan yan keçdi, ikinci zərbəsini isə qolkiper küncə çıxardı. Buna baxmayaraq, “Karvan” qol istəyinə 85-ci dəqiqədə çatdı. Elvin Dəmirovun zərbəsini Əhmədzadə qaytarsa da, dönən topu İzzət Müştaqov qapıdan keçirdi – 1:0. Bu qələbə ilə xalnı 21-ə çatdıran “Karvan” MOİK-lə xal fərqini minimuma endirdi.
Oyundan sonra “hərbçilər”in çalışdırıcısı Qəzənfər Abbasov “Futbol+”ə bunları dedi:
“Bu gün komandamda hər şey normaldı. Sadecə, hücumalara çıxmaqda çətinlik çəkirdik. Ümumi baxsaq, hər iki komanda əsasən meydanın mərkəzində mübarizə aparırdı. Təhlükəli vəziyyətlətin çox yaşanmadığını da vurğulamaq lazımdı. Künc zərbəsindən sonra qapımızda qol gördük. Sadəcə, bəxtimiz gətirmədi. “Karvan”ı təbrik edir, gələcək oyunlarda uğurlar arzulayıram”.
Abbasov təlim-məşq toplanışını dəyərləndirdi və növbəti turda “Mingəçevir”lə səfərdə keçirəcəkləri oyun haqda da danışdı:
“Qış fasiləsini istədiyimiz kimi keçirdik. Hər şey arzuladığımız kimi oldu. Sumqayıtda 5 yoxlama oyununda qüvvəmizi sınadıq. “Mingəçivir”lə qarşılaşma ağir keçəcək. Səfərdən qələbə ilə qayıtmaq üçün əlimizdən gələni edəcəyik”.
“Karvan”ın baş məşqçisi Kənan Kərimovla da söhbətləşdik:
“Səfərdə oynamağımıza baxmayaraq, komandanın çıxışından çox razıyam. Çünki qarşılaşma tam nəzarətimiz altında keçdi. MOİK-in necə güclü komanda olduğunu bilirik. Həmin rəqibə ilk dövrənin ev oyununda uduzmuşduq – 0:3. Bura kasad heyətlə gəlmişdik. Əsas komandanın 3 oyunçusunun xidmətindən yararlana bilmədik. Oyunboyu dəyişikliyə getmədik. Əsas odu ki, futbolçularımı bura 3 xal üçün gəldiyimizə inandırdım. Onlar da meydanda döyüşüb qələbə qazandı. Lazım olan nəticəni əldə etdik. Bütün komanda üzvlərinə təşəkkür edirəm. Bu gün xarakter göstərdilər. Düzdü, qarşımıza çempionluq hədəfi qoyulmayıb. Lakin məqsədimiz yüksək pillələrdə qərarlaşmaqdı”.
Mütəxəssisin növbəti turun “Qaradağ Lökbatan”la qarşılaşması haqda düşüncələri:
“Artıq 13 turu geridə qoymuşuq. Növbəti turda çempionluğa namizədlərdən “Qaradağ Lökbatan”la qarşılaşacağıq. MOİK-lə oyuna necə hazırlaşmışdıqsa, həmin matça da elə köklənəcəyik. Çalışacağıq ki, zədəli və xəstə futbolçularımızı bərpa edək, onların xidmətindən yararlanaq. Yoxsa bugünkü problemlər yaşana bilər. İnanıram ki, qələbə qazanacağıq. Komandama güvənirəm”.
İSMAYIL XEYRULLAYEV
Digər xəbərlər
