“Qaradağ Lökbatan”la premyer-liqaya qalxmaq istəyirəm”
Srağagün 1-ci liqa çərçivəsində keçirilən “Qaradağ Lökbatan” – “Difai Ağsu” oyununu izləyənlər arasında bəndəniz də var idi.
Oyun qarşılıqlı hücumlarla başladı. Gözlənilənin əksinə, qonaqlar lider qarşısında inam mübarizə aparırdı. Ağsulular erkən qol vurmağı da bacardı. Kapitan Kamil Hüseynov 6-cı dəqiqədə komandasını önə çıxardı. Lakin bu qol “arı yuvasına uzadılan çöp” rolunu oynadı. Seyxan Fərəcov 21-ci dəqiqədə penaltidən hesabı bərabərləşdirdi. Çox keçmədən Kənan Cəfərov “Qaradağ Lökbatan”ın 2-ci qolunu vurdu. 30-cu dəqiqədə “Difai Ağsu”dan İlham Allahverdiyev ikinci sarı vərəqəni alaraq komandasını azlıqda qoydu. İkinci yarı meydan sahiblərinin taç üstünlüyü şəraitində keçdi. Hissənin startında Xəlil Bəşirov hesabı 3:1 etdi. Ardından Seyxan Fərəcov dublunu rəsmiləşdirdi. Rəqibi əks-hücumda yaxalayan lökbatanlılar Mehdi Tahirovla daha bir qol vurdu. Qonaqların gücü ilə yalnız 85-ci dəqiqədə təsəlli qolu vurmağa çatdı – 5:2.
Bununla da “Qaradağ Lökbatan” xalını 27-yə çatdıraraq qış fasiləsinə lider yollanıb. Oyunda diqqətimi çəkən məqamlar da oldu. Məsələn, “Qaradağ Lökbatan”ın köməkçi məşqçisi qapıçıya “Əmrah, qol buraxmasan sənə İtaliyadan xüsusi corab hədiyyə edəcəm”, - deyə onu motivasiya etdi. Yeri gəlmişkən, oyunu izləyənlər arasında “Karvan”ın futbolçuları da var idi.
Oyunun ən parlaq siması, təbii ki, dublla komandasını qələbəyə daşıyan Seyxan Fərəcov oldu:
“Qarşılaşmaya çox ciddi hazırlaşmışdıq. Baxmayaraq ki, rəqib 9-cu pillədə qərarlaşıb, yenə də həmişəki ciddiyyətimizi qorumuşduq. Məqsədimiz çempionluqdu. Bu yolda bacardığımızı edəcəyik. İkinci dövrədə də indiki kimi oynasaq, vuruşsaq, istədiyimizə nail olacağıq. Məğlub olduğumuz matçlardan sonra belə, inamla məşqləri davam etdiririk. Mövsümün sonuna qədər komandada qalacam. Burda hədəflərim var. “Qaradağ Lökbatan”la çempion olmaq, premyer-liqaya qalxmaq istəyirəm”.
İSMAYIL XEYRULLAYEV
