Millimizin futbolçusu Renat Dadaşovun formasını geydiyi “Hatayspor”un Türkiyə kubokunda mübarizəni dayandırdığını xəbər vermişdik.

Xatırladaq ki, komanda 1/8 finalda “İstanbul BŞ”nin qonağı olub. Matçın əsas və əlavə vaxtı 1:1 hesabı ilə başa çatdığı üçün qalib penalti seriyasında müəyyənləşib. Buraa daha dəqiq olan meydan sahibləri (3:2) 1/4 finala yüksəlib. Renata gəlincə, hücumçu start heyətində meydana daxil olub və 90-cı dəqiqədə əvəzlənib.

Əlbəttə, “Hatayspor”un azarkeşləri bu nəticədən narazı qalıb. Onlar həm tribunada, həm də klubun sosial şəbəkə hesablarında iradlarını dilə gətirib. Tənqid hədəfində olanlardan biri də yığmamızın futbolçusudu. Renat bir neçə vacib epizodda özünü yaxşı tərəfdən göstərə bilmədiyindən, daha dəqiqi, qol müəllifi olmadığından “Hatayspor” tərəfdarlarının təzyiqinə məruz qalıb. Maraq üçün qeyd edək ki, matçı izləyən azərbaycanlılar həmyerlimizi müdafiə edib. Onlar Renatın “Qrasshopper”də daha yaxşı oynadığını, çoxlu qol vurduğunu yazıb, indiki susqunluğunu “Hatayspor”un durumunun yüksək səviyyədə olmamasıyla əlaqələndirib.

Mövzunun diqqətçəkən tərəfi isə “Sky Sport”un “Hatayspor” haqda yaydığı məlumatdı. Nəşr komandaya yeni mərkəz hücumçusunun cəlb ediləcəyini tirajlayıb. Bildirilib ki, söhbət David Okerekedən gedir. Fubtbolçu hazırda icarə əsasında İtaliya “Torino”sunda çıxış etsə də, müqaviləylə “Kremoneze”yə məxsusdu.

Mətbuatın iddiasına görə, transfer gerçəkləşərsə, Renatın işi xeyli çətinləşəcək. Həmçinin David ümidləri doğruldarsa, millimizin üzvünün start heyətindəki yeri də silkələnə bilər. Hələ ki danışıqlar davam edir.

Əlavə edək ki, Okereke mövsümün əvvəlində “Beşiktaş”la anlaşmaq üzrə ikən son anda sövdələşmə baş tutmamışdı.

KƏNAN BAHADIR