İlin ilk rəsmi oyunu Masazırda keçirildi. Bakı derbisində tərəflər “Sabah”la “Neftçi” idi. Meydan sahibləri uğursuz başladıqları mövsümdə nəticələrini yaxşılaşdırmaq, “ağ-qaralar” isə əsas hədəf olan gümüş medallar uğrunda mübarizədə şansını artırmaq istəyirdi.

Oyun baş məşqçilər baxımından da xüsusi prinsipiallıq daşıyırdı. Çünki Murad Musayevlə Miodraq Bojoviç Rusiya premyer-liqasında da dəfələrlə üz-üzə gəlmişdi. “Tələbələr”in çalışdırıcısı bütün rəsmi oyunlarda – həm çempionat, həm də kubok matçlarında rəqibi məğlub etmişdi.

Qapıya ilk zərbə “Sabah”dan gəlsə də, Till “çərçivə”ni dəqiq nişan ala bilmədi. Ardından “Neftçi” cərimə zərbəsi sayəsində hesabı açmaq imkanı qazandı. Bu dəfə Matias Eminin göndərdiyi topa başla müdaxilə etsə də, Nicat təhlükəni sovuşdurdu. Real qol vəziyyətini isə nominal meydan sahibləri yaratdı. Burda öncə Letiç bəxtini sınasa da, “Neftçi”nin müdafiəsini yara bilmədi. Buna baxmayaraq, serbiyalı müdafiəçi qarşı tərəfdə təşviş yarada bildi. Daha sonra Anatoli rəqib futbolçuya dəyib geri qayıdan topu ünvansız yönə göndərdi. Halbuki komandasını hesabda önə çıxara bilərdi.

Emin Mahmudov 35-ci dəqiqədə inanılmaz fürsəti boşa verdi. Belə ki, Boqomolski topu qapı önünə qədər gətirib kapitana ötürdü, “al və vur” dedi. Amma cari mövsümü imkanlarından aşağı keçirən Emin Nicatı aldada bildisə, dirək ona “yox” dedi. Azarkeşlər bu epizodun həyəcanından qurtulandan az sonra “Sabah” hesabı açmağa yaxın oldu. Çakla topu meydanın “Neftçi”yə aid hissəsində ələ keçirib Sekidikaya ötürdü. O da Tilli vaxtında “gördü”. Lüksemburqlu yarımmüdafiəçi dərhal qapıya zərbə endirsə də, top az fərqlə tirin üzərindən keçdi. Baxmayaraq ki, epizod sanki futbolçunun ayaqları üçün “biçilmişdi”. Birinci hissə “Neftçi”nin növbəti faydasız hücum cəhdiylə yekunlaşdı. İkinci yarısı süst başladı və bir neçə dəqiqə belə davam etdi. Oyunçuların yorğunluğu yavaş-yavaş özünü büruzə verirdi. Lakin nə Musayev, nə də Bojoviç onları əvəzləmək haqda düşünürdü. Nəhayət, 70-ci dəqiqədən sonra tərəflər oyuna “yeni nəfəs verdi”. Bu ərəfədə azarkeşlərin dəstəyi zirvə nöqtəsinə çatmışdı. Tərəfdarlar bir neçə həftəlik futbol aclığını qolla doyuzdurmaq istəyirdi. Hətta “Forza Neftçi” pirotexniki vasitələrdən istifadə edərək stadionu bir neçə dəqiqə tüstü dumanında “boğdu”. Maraqlıdı ki, məhz bundan sonra “ağ-qaralar” daha təhlükəli qol vəziyyətiylə yadda qaldı. Emin künc zərbəsini yerinə yetirərkən birbaşa “çərçivə”ni nişan aldısa, Nicat təhlükəni sovuşdurdu. Çox keçmədən qonaqların növbəti hücum cəhdi qeydə alındı. Şinyaşikinin qapı önünə qədər gətirdiyi top Eminə çatdı. Kapitan Boqomolskiyə ötürmə versə də, belaruslu hücumçu hesabı aça bilmədi. Ardından Eminin sol ayaqla uzaqdan zərbəsi də işə yaramadı. Gərginlik əsas vaxta artırılan beş dəqiqədə də davam etdi. “Sabah” öncə Marqaritanın baş rolunda olduğu qol epizodunda hədəfə çatmadı. Sonra Çakla bəxtini sınadı. O, topu qapıdan keçirsə də, ofsayd səbəbindən qol sayılmadı. Beləliklə, hücum cəhdləri fonunda hesab açılmadı.

Gözdən qaçmadı
* Oyundan əvvəl stadionun girişində azarkeşlər arasında viktorina keçirildi. “Sabah”ın futbolçularını tanıyanlara fanşop məhsulları hədiyyə edildi.
* “Sabah” havanın kəskin soyuq olduğunu nəzərə alıb, azarkeşlərin pulsuz çay içməsi üçün şərait yaratmışdı.
* “Neftçi”nin müşahidə şurasının rəhbəri Rövşən Nəcəf və üzvlər Emin Əmrullayevlə Orxan Soltanov, yeni transfer Brayan Moreno, millimizin məşqçisi Arif Əsədov və sabiq qapıçısı Kamran Ağayev, həmçinin gənclər və idman naziri Fərid Qayıbov oğlu ilə birgə matçı stadiondan izlədi.
* Bojoviç oyundan sonra Ayaz Quliyevlə görüşüb səmimi söhbət etdi.

KƏNAN BAHADIR