Azərbaycanlı futbolçulardan ikisi Messini, biri Holannı seçdi
FİFA-nın yanvarın 15-də 2023-cü il üçün “The Best” mükafatını argentinalı superulduz Lionel Messiyə verməsini futbol ictimaiyyəti birmənalı qarşılamadı.
Çoxları bu mükafatın “Mançester Siti”nin oyunçusu Erlinq Holanna verilməməsinin haqsızlıq, ədalətsizlik olduğunu dilə gətirir, həm təşkilatçı FİFA-nı, həm də sorğuya qatılanları qınayır. Axı norveçli forvard komandasıyla 2023-cü ildə qazanmadığı mükafat qoymamışdı. Dünya futbol ictimaiyyətini ikiyə bölən bu mövzu ilə bağlı, görəsən, azərbaycanlı futbolçular nə düşünür? Yığmanın kapitanı Emin Mahmudovun “The Best” mükafatında 5 xalı Holanna verməsinin düzgün seçim olduğunu təsdiqləyirlərmi?
Orxan Əliyev (Araz-Naxçıvan):
“Sözsüz, Messi dünyanın ən yaxşı futbolçularından biridi. Lakin 2023-cü ildə hansısa ciddi uğura nail olmadı. Holann isə əksinə, həm ili bombardirlər siyahısında ilk “3-lük”də bitirdi, həm də komandası ilə vacib olan bütün titulları qazandı. Buna görə mənim də seçimim Holanndan yana olardı. Daha sonra ikinci yerə Messini, üçüncü yerə Mbappeni layiq görərdim. Amma çox istərdim ki, bu siyahıda Kriştiano Ronaldonun da adı olsun. Çünki, o, bu yaşında belə 54 qola imza ataraq 2023-cü ildə ən çox qol vuran futbolçudu”.
Elvin Cəfərquliyev (Qarabağ):
“Messi dünyanın bütün mükafatlarına layiq oyunçudu. Onun seçilməsi mənim üçün çox xoş oldu. Mənim də seçimim ondan yana olardı. Nəzərə alaq ki, mən də Messi azərkeşiyəm. İkinci yerə Mbappeni, üçüncü yerə isə Holannı layiq görərdim”.
Vüqar Mustafayev (Sumqayıt):
“Bir Messi tərəfdarı kimi, sözsüz, argentinalını seçərdim. Həm də, demək olar ki, karyerası yekunlaşır. Bəlkə də sonuncu fərdi mükafatını qazandı. Buna layiq olduğunu düşünürəm. Holann da çox güclü oyunçudu. Gələcəyi hələ qabaqdadı. Buna görə də elə ikinci yerə onu, üçüncü yerə isə Vinisusu seçərdim”.
KAMAL SƏFƏR
Digər xəbərlər
