“Rəsmi təklif daxil olub və klub üçün yaxşıdı. Ancaq Leandro indi bizə lazımdı. Onu komandada saxlamağa çalışırıq. Hələ ki Andrade bizim oyunçudu” – bu sözləri Qurban Qurbanov “Zirə” ilə oyundan sonra deyib.

İntuisiyam məni aldatmırsa, “Qarabağ”ın baş məşqçisi demək istəyir ki, çinlilərin 2 milyon avro təklifi bizi razı salmır, amma 3 milyon verərlərsə, vəziyyət dəyişəcək. Vallah-billah, “hələ ki”nin başqa yozumu yoxdu.

Məncə, “Şanxay Şenxua”nın təklifi “Qarabağ” üçün göydəndüşmədi. Son illərdə həm də futbolçu ixracı ilə məşğul olan ağdamlılar Kadi Borgesin ardından daha bir çoxmilyonluq oyunçu satmağa yaxındı. Çin klubunun ambisiyaları aydındı. Yanvarın 1-dən “sükan arxasına” rusiyalı mütəxəssis Leonid Slutski keçib. Çox güman, o da “Qarabağ”ı və Azərbaycan futbol bazarını yaxından izləyən, hətta bəlkə Kadi ilə Lunyovun keçidində önəmli rol oynayan rusiyalı agentlərin yardımı ilə Landroya “elçi” düşüb. Bəli, Kabo-Verdedən olan 24 yaşlı yarımmüdafiəçi yetərincə istedadlı və bacarıqlıdı. Amma nə Kadidən güclüdü, nə də həmvətəni Patrik Andradenin “Partizan”a yollana qədər olan obrazından. Bir məqamı da vurğulayaq ki, Çin klubu Leandroya görə 2 milyon avrodan daha çox pul təklif edir. Mən mümkün sonrakı satışdan gələcək payı nəzərdə tuturam. Bəs onda “Qarabağ” niyə bu qədər ehtiyatlı davranır, ehtiyac duyduğu milyonları istəmir?

Güman edirəm ki, Qurban bəyin əl-qolunu bağlayan yeganə maneə “Braqa” ilə oyunlardı. O artıq tarix yazdığı mövsümü daha da gözəlləşdirmək istəyir. Hətta elə bu gün Portuqaliya klubunun mərhələ adlamaq şansı daha yüksək olsa da, “Qarabağ”ın da Avropa Liqasının 1/8 finalında oynaması tam realdı. Və bu yolda Leandro komandaya əməlli-başlı yardım edə bilər. Kadi qədər qeyri-standart qərarlar verən oyunçu olmasa da, qabında nəsə var. Amma Çin klubunun milyonları çox cəlbedici deyə, biz bu məsələyə təkcə futbol yox, biznes maraqları baxımından da yanaşmalıyıq. Həqiqət isə çox sərtdi və sadədi: “Qarabağ” “Braqa”nı keçəcəyi təqdirdə cəmi 1,2 milyon avro qazanacaqsa, çinlilər bu məbləğdən az qala ikiqat artığını təklif edir. Yəni Qurbanov, “Qarabağ” rəhbərliyi qeyri-real, hələ ki qazanılmayan 1,2 milyonla faktiki masanın üzərində olan 2 milyonu müqasiyə etməyə məcburdu. Və nə qədər qəribə olsa da, hələ ki qeyri-real məbləğin arxasınca düşüblər. Belə seçimin praqmatik əsası yoxdu, romantik əsası var. Yəni ki “Braqa”nı da udub, tarixdəki yerimizi bir qədər də möhkəmləndiririk, dünyanın gözündə ucalırıq, yeni statusla nəinki Leandronu, hətta bəlkə başqa futbolçuları da daha baha qiymətə satmaq imkanı qazanırıq.

Bir sözlə, “Qarabağ” və şəxsən Qurbanov çətin seçim qarşısındadı. Güman ki, bu məsələdə son nöqtə qoyulmayıb. Mənə elə gəlir ki, hadisələrin bundan sonrakı axarını iki məqam müəyyənləşdirəcək. Söhbət ilk növbədə çinlilərin hara qədər bazarlıq edəcəyindən, məsələn, məbləği 2,5 milyon avroya qaldırıb-qaldırmayacağından gedir. İkinci vacib məqam isə Leandronun verəcəyi qərardı. Yaşının bu çağında Avropanı Asiyaya dəyişəcəkmi? Prinsipcə Kadi oxşar vəziyyətdə qalanda, yəni böyük pullar gözünü qamaşdıranda “Qarabağ”dan ayrılmağa qərar verdi. Düzdü, Rusiya Avropa ölkəsidi, amma dünya futbolundan təcrid olunmayan, müharibəyəqədərki Rusiya. Müharibə dövrünün Rusiyası isə mahiyyətcə elə Çin deməkdi. Beləliklə, lap yaxın günlərdə “Qarabağ” qeyri-real 1,2 milyonla real 2 milyon arasında seçim etməlidi. Fərq çoxdu, adamın ağlını başından alır!

HUŞƏNG