“Liverpul” – “Fulhem” oyununun 68-ci dəqiqəsinə qədər hər kəsə elə gəlirdi ki, Kloppun yetirmələri uduzacaq.

"Football-plus.az" xəbər verir ki, ancaq Cons “Enfild”ə toplaşanlara özünə gəlmək və ənənəvi mahnıları oxumaq imkanı yaratdı. Kertis əvvəlcə hesabı bərabərləşdirdi, cəmi 3 dəqiqə sonra isə Qakpoya məhsuldar ötürmə verdi. Leno “çərçivə”də xarüqələr yaratmasaydı, “bağbanlar” meydandan daha böyükhesablı məğlubiyyətlə ayrılardı. Aleksander-Arnoldun əvəzinə start heyətində yer alan Bredli mersisaydıların heyətində özünü yaxşı göstərdi, Qranvenberx də pis deyildi, Qakpo yenə Liqa kubokunda qol vurdu, ancaq hamıdan daha çox Consu fərqləndirmək lazımdı. Qonaqların heyətində isə qolkiper, həmçinin Villian və Pereyra seçilirdi. “Liverpul” heç də asan qələbə qazanmadı. Kloppun komandası heyətlə bağlı problemlərə rəğmən, bütün turnirlərdə qələbələri sıralamaqdadı. Amma bu cütdə hələ intriqa ölməyib, “Fulhem” cavab görüşündə məğlubiyyətin əvəzini çıxa bilər. Baxmayaraq ki, “Liverpul” qatıldığı bütün turnirləri qazanmağa köklənib.

yarımfinal, ilk oyun
Liverpul – Fulhem 2:1
Cons, 68. Qakpo, 71 – Villian, 19.
Liverpul: Kelleher, Bredli, Konate, Van Diyk, Qomes, Makallister, Cons, Qrabenberx (Nunyes, 56), Elliott (Qakpo, 56), Dias, Jota.
Fulhem: Leno, Kastan, Adarabioyo, Diop, Robinson, Palyinya, Rid (Lukiç, 83), Pereyra (Kerni, 72), Villian (Uilson, 72), De Kordova-Rid, Ximenes.
Bu mərhələnin “Midlsbro” – “Çelsi” (1:0) oyunu çərşənbə axşamı keçirilib. Cavab oyunları yanvarın 23-24-də keçiriləcək.

Oyundan sonra
Yürgen Klopp, “Liverpul”un baş məşqçisi: “Çox ağır oyun oldu. İlk yarıda özümüz-özümüzə hansısa problemlər yaratdıq. Rəqib çox yığcam müdafiə olunduğundan fasilədə müəyyən dəyişikliklər etməli olduq. Fasilədən sonra futbolçularım çox yaxşı oynadı. “Fulhem” çox təhlükəli əks-hücumlar qururdu. Ancaq ardından biz dominantlıq etdik, qol vurduq və hər şey qaydasına düşdü. Bu heç də ən yaxşı oyunumuz deyil, ancaq hamımız adamıq. Hədsiz ləng oynayırdıq, bunu dəyişmək lazım gəldi. Bundan sonra oyun yaxşı getdi. Fanatlar daim bizi dəstəklədirlər, sadəcə, biz onlara sevinmək üçün elə bir əsas vermədik. Ancaq ikinci hissədəki əsl “Liverpul” idi. Cavab görüşü açıq xarakterli olacaq. Finala adlamaq istəyirik və gerçəkdən yaxşı oynasaq, bunu bacaracağıq. Bacarmasaq, “Fulhem”i finala çıxması münasibəti ilə təbrik edəcəm”.